Левит 16
16
Кипурималъул къо#16:1 Кипурималъул къо – тархъанлъиялъул къо, мунагьаздаса хвасарлъиялъул къо. Кипурималъул къоялъ КӀудияв кашиш унаан Бищунго Мукъадасаб бакӀалда жаниве БЕТӀЕРГЬАНАСДА цеве, жиндасаго хъурабги тӀолабго халкъалдаса хъурабги хасаб къурбаналъул биги босун, лъагӀалида жаниб халкъалъухъа ккарабщинаб мунагьалда Аллагь тӀасалъугьиналъул мурадалда.
1БЕТӀЕРГЬАНАСДА цере Гьарунил васал хун хадуб, БЕТӀЕРГЬАН кӀалъана Мусада. 2БЕТӀЕРГЬАНАС Мусада абуна:
«Дурго вац Гьарунида абе бокьа-бокьараб мехалъ вачӀине бегьуларин хасаб пардавалда нахъа бугеб Бищунго Мукъадасаб бакӀалда жаниве ва гьениб бугеб КъотӀиялъул гъансил тӀалъелалда цеве, гурони гьев хвезе вугин, гьениб накӀкӀул парчадулъ Дица Дунго загьир гьавизе вугелъул.
3Бищунго Мукъадасаб бакӀалде лъугьиналда цебе Гьаруница мунагьал чурулеб къурбаналъе хъвезе оцги, тӀубан бухӀулеб къурбаналъе хъвезе куйги бачӀине ккола. 4Биччанте гьес цин черхалда лъим бахъизе ва кашишзабазул хирияб ретӀел тӀад ретӀине: бацӀцӀадаб хӀебтил кашишасул гурдеги, гӀаврат бахчулеб бацӀцӀадаб хӀебтил тӀажуги, гьединабго хӀебтил рачелги. БотӀрода хӀебтил тӀагъурги лъе. 5ГӀизраилазул жамагӀаталъухъа гьес къабул гьабизе ккола мунагь чурулеб къурбаналъе хъвезе кӀиго дегӀенги, тӀубан бухӀулеб къурбаналъе хъвезе куйги.
6Биччанте жиндирго рахъалдасан мунагь чурулеб къурбаналъе къачӀараб оц хъвезе Гьаруница жиндасагоги жиндирго хъизан-къаялдасаги, мунагьаздаса рацӀцӀалъизе рукӀине. 7Гьединго гьес кӀиябго дегӀенги бачине ккола БЕТӀЕРГЬАНАСДА цебе ДандчӀваялъул Чадиралъул кӀалтӀе 8ва можоро рехизе ккола, гьезул кинаб БЕТӀЕРГЬАНАСЕ гӀоло хъвезе бугеб, кинаб Азазелалъе#16:8 Азазел – (некӀсиял таржамабазда, «рикӀкӀаде битӀулеб дегӀен»). Гьедин мунагьал чурулеб къурбаналъе цояб дегӀен хъвеялъулги, рикӀкӀаде чи гьечӀеб бакӀалде цогияб дегӀен щвезабиялъулги магӀна букӀана халкъалъ гьаруралщинал ва гьез дагӀнида тӀаде гьурщаралщинал мунагьал къурбаналъул биялъ чуранин ва мунагьал халкъалдаса абадиялъго рикӀкӀад гьарунин абураб (бал. Заб. 102:12; Мих. 7:19; гьединго 10 – леб ва 26 – леб мухъалда). букӀине бугебали лъазе. 9Гьаруница бачина можороялъ БЕТӀЕРГЬАНАСЕ бихьизабураб дегӀен ва мунагь чурулеб къурбаналъе хъвела. 10Можороялъ Азазелалъе бихьизабураб дегӀен БЕТӀЕРГЬАНАСДА цебе чӀаго бачина, халкъ мунагьаздаса рацӀцӀалъиялъул низам тӀобитӀизе ва хадуб гӀалахалде Азазелалъе биччан тезе букӀине.
11Мунагь чурулеб къурбаналъе хӀадурараб жиндирго оц хъун хадуб ва жиндасаги жиндирго хъизан-къаялдасаги мунагьаздаса рацӀцӀалъиялъул къурбан тӀобитӀун хадуб, 12Гьаруница босила гьуинмахӀал рухӀулеб щурун, къурбан-бакӀалда тӀаса бухӀулеб тӀурччиги жаниб лъун, ва, дангъура цӀураб гьуинмахӀазул жубайги босун, хасаб пардавалда нахъе ина. 13Гьениб БЕТӀЕРГЬАНАСДА цебе гьес гьуинмахӀазул жубай тӀурччиялда тӀаде бала ва КъотӀиялъул гъансил тӀалъел кӀкӀуялъ бахчизабила, – гьедин гьабизе ккола гьев хвечӀого хутӀизе. 14Гьелдаса хадуб биччанте гьес оцол би босизе ва, бидулъ килищги ччун, би пунхъизе гъансил тӀалъелалъул бакъбаккул рахъалде ва анкьго нухалъ тӀалъелалда цебесеб рахъалде.
15Хадуб Гьаруница тӀолабго халкъалдаса мунагь чуриялъул къурбаналъе дегӀен хъвела ва, гьелъул биги босун, хасаб пардавалда нахъе ина; оцол биго гӀадин, гьебги пунхъила КъотӀиялъул гъансил тӀалъелалда тӀаде ва тӀалъелалда цебесеб рахъалде. 16Гьедин бацӀцӀад гьабила Гьаруница Бищунго Мукъадасаб бакӀ халкъалъул хъублъиялдасаги, гьезул такъсираздасаги, гьезул мунагьаздасаги. Гьединго гьабизе ккола ДандчӀваялъул Чадиралъеги, щайгурелъул гӀадамазда гьоркьоб бугелъул гьеб, гьезул хъублъиялъ сверунги ккун. 17Мунагьаздаса рацӀцӀалъиялъул низам тӀобитӀизелъун Гьарун гьениве жаниве аралдаса нахъе, гьев къватӀиве вачӀинегӀан, ДандчӀваялъул Чадиралда жанив цониги чи вукӀине бегьуларо. Гьедин Гьаруница мунагьаздаса рацӀцӀалъизарила: живгоги, жиндирго хъизан-къайги, тӀолабго халкъги.
18Гьеб кинабго гьабун хадуб, гьев БЕТӀЕРГЬАНАСДА цебе бугеб меседил къурбан-бакӀалда аскӀове ина, ва гьелда тӀадги рацӀцӀалъиялъул низам тӀобитӀила: оцолги дагӀнилги биги босун, гьеб бахина къурбан-бакӀалъул ункъабго бокӀнида чӀварал лълъурдузда, 19ва гьебго би пунхъила къурбан-бакӀалда тӀаде анкьго нухалъ. Гьедин бацӀцӀад гьабила гьеб гӀизраилазул хъублъиялдаса ва гьеб мукъадасаблъун букӀина.
Азазелалъул дегӀен
20Бищунго Мукъадасаб бакӀги, ДандчӀваялъул Чадирги, къурбан-бакӀги бацӀцӀад гьабун хадуб, Гьаруница чӀагояб дегӀен БЕТӀЕРГЬАНАСДА цебе бачина. 21КӀиябго кверги дагӀнил ботӀрода лъун, гьес гӀизраилазул кинабниги мунагь-хӀакъ рехсела, гьеб дагӀница баччизе букӀине. Хадуб гьеб дегӀен гӀалахалде битӀила, гьеб бачун цо чиги ина. 22Ва гьеб дагӀница рикӀкӀадаб мегӀер-гӀалахалде росун ина халкъалъулго мунагьал, гьениб дегӀенги биччан тела.
23Гьелдаса хадуб Гьарун ДандчӀваялъул Чадиралъуве лъугьина, ва Бищунго Мукъадасаб бакӀалде лъугьиналда цебе гьес ретӀараб бацӀцӀадаб хӀебтил ретӀел тӀаса бахъина ва гьениб тела. 24Биччанте гьес, мукъадасаб бакӀалда черхалдаса лъимги бахъун, цогидаб ретӀел тӀад ретӀине. Цинги гьев Чадиралъуса къватӀиве вачӀина, ва жиндасагоги халкъалдасаги тӀуран рухӀулел къурбанал тӀоритӀила, ва живгоги халкъги рацӀцӀад гьарила. 25Мунагьал чуриялъул къурбаналъул тӀатӀи къурбан-бакӀалда тӀад бухӀизе ккола.
26Азазелалъул дегӀен бачун ун вукӀарав чияс жиндирго ретӀелги черхги чуризе ккола, цинги халкъалда гьоркьове тӀад вуссине бегьула. 27Мунагь чуриялъул къурбаналъе хъураб оцги дегӀенги шагьаралдаса къватӀибе босизе ккола; гьезул тӀомги, гьанги, кинабго ургьимесги гьениб бухӀизе ккола, щайгурелъул гьезул би, мунагьаздаса рацӀцӀалъиялъул низам тӀобитӀиялъе, Бищунго Мукъадасаб бакӀалде босун букӀиндал. 28Гьеб бухӀарав чиясги жиндирго ретӀелги черхги чуризе ккола; хадуб гьев халкъалда гьоркьове тӀад вуссине бегьула.
Кипурималъул къоялда бан жеги амруял
29Нужее абадияб къанунлъун лъазабулеб буго: Анкьабилеб моцӀалъул анцӀабилеб къоялъ, ай Кипурималъул къоялъ, кӀал ккве ва щивниги чи хӀалтӀуге, я гӀизраилав, я нужеда гьоркьоб гӀумру гьабун чӀарав къватӀиса чи. 30Щайгурелъул гьеб къоялъ кашишас мунагьаздаса хвасарлъиялъул низам тӀобитӀула, нужехъа ккарал тӀолалго мунагьаздаса БЕТӀЕРГЬАНАСДА цере нуж рацӀцӀад гьаризе. 31Гьеб къо нужее хӀалхьиялъул ва Аллагьасе мутӀигӀлъиялъул къолъун букӀине ккола; гьеб къанун букӀина нужее абадиялъего. 32Мунагьаздаса рацӀцӀалъиялъул къурбан тӀобитӀизе ккола хирияб нахги бахарав ва умумуздаса кашишлъиялъул ирсги босарав КӀудияв кашишас. Биччанте гьес бацӀцӀадаб хӀебтил хасаб ретӀел тӀад ретӀине 33ва Бищунго Мукъадасаб бакӀги, ДандчӀваялъул Чадирги, къурбан-бакӀги бацӀцӀад гьабизе. Гьединго гьес рацӀцӀад гьарила кашишзабиги тӀолабго ГӀизраилил халкъги.
34ГӀизраилил халкъ тӀолалго мунагьаздаса рацӀцӀалъиялъе чӀезабураб къанун абадиялъего бугеб къанун буго; лъагӀалида жаниб цо нухалъ тӀубазабе гьеб».
Гьез кинабго гьабуна БЕТӀЕРГЬАНАС Мусада абухъе.
Atualmente Selecionado:
Левит 16: АварАК
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Институт перевода Библии, 2005-2023