Rom 1
1
1Amo Pɔɔl wolo na ye Yezu Krista kabaa to mo popone tɔnɔ konto. Wɛ mo tiŋi-ne se a taa ye Yezu totoŋa nakwe, ye o kuri-ne se a taa tɔɔle o kwor-ywoŋa kam.
2Faŋa faŋa to Wɛ maŋe o da o sampwori sem ŋwaane mo o pa se ba popone o tete tɔnɔ kom wone we, o pwooli se o toŋe o kwor-ywoŋa kam konto se nɔɔna lɔre-ka.#Hiburu 1:1 3Ka ye o Bu wom taane mo, wolo na ye debam Teiru Yezu Krista to. Wonto na jigi nabiinu to, ba loge‑o Pɛ David dwi tiina bam wone mo. 4Wɛ Sin-laao kom nam wo o tei ne de dam, ye Wɛ tɔge ko ŋwaane o bi‑o toone wone se ko bere we o seene o ye Wɛ Bu wom. 5Wonto ŋwaane mo Wɛ ke zaane debam yuu ne, se dé taa ye Yezu tontoŋena ye dé pa o yere zaŋe wɛɛne. O ma toŋe debam se dé vo dwi maama tiina tei ne dé pa ba sɛ‑o de ba wo maama, se ba daare ba taa tɔge o ni. 6Abam de tɔge á ye balo Wɛ na kuri se á ba á ta‑á ye Yezu Krista nyem to mo.
7Amo popone a pa abam balo na wo Rom ne ye Wɛ swoi abam pa se o kuri abam se á ta‑á ye o nɔɔna to.
Dé Kwo Wɛ, de dé Teiru Yezu Krista wó pa abam zaane de yazura.
Lei keim
8Da-yiga to, amo lage a da Yezu Krista ŋwaane a ke amo Tu Wɛ lei a pa abam maama, de nɔɔna na ŋɔɔne abam taane jei maama ne we á ke á wo-dedoa de Yezu to. 9Amo tiini a toŋe a pa Wɛ mo de a wo maama de a na tɔɔle o Bu Yezu kwor-ywoŋa kam tei to. Wɛ wó zege amo kwaga ne we, amo yeini a lwoori‑o, 10ye a guli abam gula o yiga ne maŋa maama. Amo ta yeini a lwoori‑o se, o ná sɛ, se o pa-ne chwoŋa se a ba abam tei leile konto.#Kikia 19:21 11Abam fera tiini ya jege amo. A lage se a na abam, se Wɛ Sin-laao kom laam wane ko da amo ŋwaane ko zeini abam de Wɛ pɛɛre delo na wó pa á ta‑á jege dam to. 12Amo na lage kolo to mo ye se dé na baare da-tei ne, debam maama na jege wo-dedoa de Yezu to ŋwaane.
13A nu-bia bam, lɔre-na we amo kwaane mo kuni dedɛ se a lage chwoŋa a ba a na abam, ye a daa ta wo nɛ chwoŋa de zem maama. A lage a ba se a wane a jwoŋi nɔɔna abam wone a ke-ba Wɛ jeŋa ne, ne amo na maŋe a ke tei dwi-gɛ tiina badwonna tei ne to. 14Amo jege jene nɔɔna maama tei ne, ko ná ye balo yi na poore, naa balo yi na wo poore to, ko woli de swa tiina de balo ta na ba jege swa to. 15Konto ŋwaane mo amo tiini a lage se a ba a tɔɔle Wɛ kwor-ywoŋa kam a bere abam balo na wo Rom ne to de.
16Amo ba kɔre chaveera se a bere nɔɔna Wɛ kwor-ywoŋa kam. Wɛ kwora kam konto mo jege dam ye Wɛ tɔge ka ŋwaane o vere nɔɔna balo maama na ke ba wo-dedoa ded‑o to, ko bobo de Juu tiina bam mo ye ko laam ba ko woli dwi-gɛ tiina da. 17Ka ta bere nɔɔna Wɛ na wó ke tei o pa ba na chega o tei ne to. Ko maama nam zege wo-dedoa ŋwaane mo, boboa de kweelim maama. Wɛ tɔnɔ kom maŋe ko bere we, “Wolo maama na jege chega Wɛ tei ne to wó na ŋwea o wo-dedoa kam ŋwaane.”#Habakuki 2:4
Nabiina maama gɛ bora
18Baŋa Wɛ nam zege telaao ne o bere nɔɔna o bane na zaŋe de-ba tei to. O bane fuli nabiina baŋa ne ba wɛleera de ba keim-lwanno tem maama ŋwaane. Ba na tɔge wo-lwanno tem chwoŋa konto to mo pae se ba yeini ba kweele chega kam ba yage tega ne. 19Wɛ nam vaŋe ba zwa, kolo ŋwaane o maŋe o pa nɔɔna chwoŋa se ba lɔre o chega kam. Wɛ tete bere-ba o chega kam jaja ye ba wo sɛ. 20Nabiina ware se ba na Baŋa Wɛ de ba yia. Ko nam zege o na ke logo baŋa to, nabiina seene ba nae wonnu telo o na naane to. Ko ma pa ba wane ba lɔre lanyerane we o jege dam delo na ba jege tiim to ye o ye Wɛ chekke. Konto ŋwaane nabiina bá wane ba jwoŋi chwoŋa Wɛ tei ne.#Lei 19:1 21Ba maŋe ba yei Wɛ na ye wolo to, ye ba nam ba lage se ba taa ke‑o lei, naa ba zeiŋi o yere dem wɛɛne. Ko nam na ye tei to, ba boboŋa yam jigi kafɛ, ye ba bochare-fulwooru tem ye lim yerane mo. 22Ba maa pae se ba jege swa, ye ba nam ye nɔn-jworru mo. 23Ba ba sɛ se ba taa zuli Ŋwea Tu Baŋa Wɛ, ye ba daare ba zuli wonnu telo ba na mɔɔne de ba jea to. Ba yeini ba ke wonnu tem konto se te taa nye de nabiina na bá dáane ye ba te to, naa zuna, de vara, de tega-veila mo.
24Konto ŋwaane Wɛ yage-ba se ba taa tɔge wo-yɔɔro telo ba tete boboŋa na lage to. Ba maa yeini ba ke wo-zɔɔna, ye ba tɔge ka-laga kikia yalo na pae chaveera jaane-ba to. 25Ba ve Wɛ chega kam mo ye ba daare ba tɔge vwa. Ba maa yeini ba zuli wonnu telo Wɛ na ke to, ne te ye Wɛ tete mo tei. Ba ma daare ba yage wolo wom na ye te maama Keiru to. Wonto nam mo maŋe se o taa jwoŋi teem taa wuu. Ameena.
26Konto ŋwaane mo Wɛ yage-ba se ba taa tɔge wo-zɔɔna kikia yalo ba boboŋa na laga ye ya jege chaveera to. Kaana bam yeini ba chɔge ba tete baaro de kaane laŋa ne, pa se ba tɔge kikia yalo na wo maŋe de kaana to. 27Ko ye konto mo de baara de. Ba yeini ba ba lage kaana, ye ba pae se ba fera zoore ba dwonna baara se ba peini de-ba, nenɛɛne ko na wo maŋe se ba ke tei to. Baara yeini ba ke chaveera keim da-tei ne, ye ko pa ba na waarem delo na maŋe de ba tusim kikia yam to.#Chullu 18:22
28Ko ta woli da, nɔɔna bam konto maa boŋe we, Wɛ chega kam ba jege kuri se ba taa jege-ka ba boboŋa ne. Konto ŋwaane, Wɛ ma yage-ba se ba taa tɔge ba boboŋ-yɔɔro tem kwaga, se ba taa ke wonnu telo ba na ba jege chwoŋa se ba ke to. 29Ba boboŋa maa sui de wo-balwaaro telo na ba tɔge chega chwoŋa to, de keim-lwanno dwi maama. Ba yi maa sui wonnu dedɛ. Ba tiini ba jege puseŋa, ye ba lage nɔɔna gom. Ba maa swoi nankɔɔre kikia ye ba gane ba dwonna. Ba maa yeini ba yaale nɔɔna. Ba ye bebare-nyena mo, 30ye ba ŋɔɔne ba chɔge ba dwonna yere. Ba maa chuli Wɛ, ye ba twe ba dwonna. Ba ta kwori ba ye banegero nyena, ye ba bere ba tete nɔɔna yiga ne. Ba tiini ba boŋe keim-balwaaro boboŋa. Ba ba nege ba tiina. 31Ba ba jege boboŋa. Ba maa yeini ba kwane ba ni. Ba ba jege ba dwonna swono, ye ba ba jege ba ŋwaŋa de. 32Ba nam maŋe ba yei Wɛ kwora kam na bere kolo we, balo na tɔge keim-balwaaro tento dwoŋi to maŋe se toone mo chɔge-ba. De konto de, ba ta yeini ba ke-te, ye ba lage se ba dwonna de tɔge ba ke-te.
Atualmente Selecionado:
Rom 1: KBG
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2020, Ghana Institute of Linguistics, Literacy and Bible Translation (GILLBT)
