Kikia 25
25
Fɛsitu ŋɔɔne Pɔɔl taane
1Fɛsitu déem na tu o ji logo kom tu wom ye da yatɔ kɛ to, o ma zaŋe Kazaria ne o vo Jerusalem. 2O na vei o wora konto to, Juu tiina kaanem yiga tiina bam de ba yiga tiina ma vo o tei ba saŋe Pɔɔl. 3Ba ma tiini ba lwoori‑o se o woli-ba o pa Pɔɔl ba Jerusalem. Ko ye ba na ke ni daane se ba go Pɔɔl chwoŋa ne to ŋwaane mo ba lwoori Fɛsitu se o ke konto. 4O ma leiri-ba o we, “Pɔɔl wo Kazaria ne ye ba jege‑o ba yera. Ko nam bá dáane ye amo tete jwoori a vo da. 5Ko nam ná ye o ke woŋo mo o chɔge, á pa se á yiga tiina bam tɔge de amo ba vo se á laam saŋe‑o dáane.”
6Fɛsitu na ke nenɛɛne da nana naa da fuga ba teo kom ne to, o laam ma zaŋe o jwoori Kazaria. O na yi da ye tega poore to, o ma nwoŋi o jeini se o di taane dem. O ma pa ni se ba ja Pɔɔl ba ba. 7Pɔɔl na tu o ba o yi ba tei to, Juu tiina balo na nwoŋi Jerusalem ba ba to maa zege ba gilimi‑o. Ba ma bobo se ba taa tɛ wo-kamunnu dedɛ ba pa‑o. Ba nam ware ba ta kolokolo ye ba bere we ko ye chega. 8Pɔɔl ma ŋɔɔne o jwoŋi o tete ye o we, “Amo wo ke kolokolo na wó wane ko chɔge Juu tiina nia yam, de Wɛ diga kam chullu tem to. A nam wo ŋɔɔne kolo na wó chɔge Rom Pa-faro wom yuu to.”
9Fɛsitu déem maa lage se o pa Juu tiina bam wo pwoli. Konto ŋwaane o ma bwei Pɔɔl o we, “Nmo wó sɛ se n vo Jerusalem se a di nmo taane dáane na?” 10Pɔɔl ma leiri‑o we, “Amo nam maŋe a zege nɔɔno wolo Rom Pa-faro wom na pɛ‑o ni se o di amo taane to yiga ne mo. Ywo-seeni mo maŋe se á di amo taane dem. Ko ná ye Juu tiina bam, amo wo chɔge ba kolokolo. Nmo tete nam maŋe n yei we konto ye chega. 11Amo nam ná ke a tusi ye a ke kolo na maŋe se a te to, amo sɛ toone. Wonnu telo Juu tiina bam nam na ŋɔɔne ba pa amo to ná ba jege chega, nɔɔn-nɔɔno ba jege chwoŋa se o ja amo o ke ba jeŋa ne. Konto ŋwaane amo laam ke a tete Rom Pa-faro wom jeŋa ne mo se o di a taane.”
12Fɛsitu na nigi konto to, o ma ŋɔɔne de o kwaga nɔɔna bam, ye o laam daare o ta de Pɔɔl o we, “Nmo na ke n tete dé Pa-faro wom jeŋa ne to, n nam wó vo dáane mo.”
13Da fenfee déem na kɛ to, pɛ wodwoŋi o yere na ye Agiripa to ma zaŋe o tɔge de o nakɔ o ba Kazaria. O nakɔ wom yere mo Bɛnisi. Ba tu se ba jɔɔne Fɛsitu de o na jigi teo kom tu to ŋwaane. 14Ba na wora da yam konto ne to, Fɛsitu ma ta taane delo na wo Pɔɔl yuu ne to o bere pɛ wom. O maa we, “Nɔɔno mo wo ywo-seeni Feliki na jaane‑o o ke peena diga ne ye o yage‑o da. 15Amo nam vei Jerusalem ye Juu tiina kaanem yiga tiina bam de ba teo kom nakwa bam ta o taane ba bere amo. Ba ma ta ba we, ko maŋe se a di o taane a vane‑o mo. 16Amo ma ta-ba a we, debam Rom tiina ba jaane nɔɔno dé ke nɔɔna jeŋa ne ye o ta wo zege balo na saŋe‑o to yiga ne se o ŋɔɔne o jwoŋi o tete de ba na saŋe‑o kolo ŋwaane to. 17Ba laam ma tɔge de amo ba ba ywo-seeni. Amo maa wo pɛ se taane dem dim dáane. Tega na poore to, a ma zaŋe a nwoŋi se a di taane dem. A ma pa ni se ba ja nɔɔno wom ba ba. 18Balo na saŋe‑o to ma zaŋe se ba ŋɔɔne. Amo ya maa boŋe we ba lage ba ŋɔɔne wo-kamunnu ba pa‑o, ye ba nam wo ke konto. 19Ba na zaŋe ba ŋɔɔne kolo to ye ni-kantɔgɔ botare mo ba tete Wɛ chwoŋa kam wone. Ko ma woli de nɔɔno wodwoŋi na tega, o yere mo Yezu, ye Pɔɔl maa pae se o ŋwe. 20Amo boboŋa vugimi de a na wó ke tei a bwei ba taane dem to. Konto ŋwaane amo ma bwei Pɔɔl, se o ná wó sɛ o vo Jerusalem se a di o taane dem dáane. 21Pɔɔl ma lwoori se dé daa taa nii‑o mo ye dé yage taane dem se dé Pa-faro wom tete laam wane o di o taane. Konto ŋwaane a ma pa ni se ba taa yere‑o se ko taa nii maŋa kam a na wó wane a pa se o vo Pa-faro wom tei to.”
22Fɛsitu na tage konto o ti to, Agiripa laam ma ta o we, omo tete wó taa laga se o ni nɔɔno wom tete ni taane. Fɛsitu ma leiri‑o we, “Jwa ne mo nmo wó ni.”
23Tega daa na poore to, Agiripa de Bɛnisi ma zaŋe ba kwɛ nenɔŋa lanyerane ba nwoŋi. Soja tiina dedɛɛra dedaane teo kom yiga tiina ma tɔge ba kwaga ye ba vo ba zo taane dim jei sem. Fɛsitu laam ma pa ni pa se ba ja Pɔɔl ba ba ba zo. 24O ma ta Pɔɔl taane o we, “Pɛ Agiripa, de abam balo maama na wo ywo-seeni zem to, nii-na! Nɔɔno wonto mo ye wolo Juu tiina bam maama ywoba seeni, de Jerusalem ne na jege o taane ba ŋɔɔne de amo to. Ba maa tiini ba ŋɔɔne de dam we ko wo maŋe se nɔɔno wonto daa ta ŋwe. 25Amo nam wo nɛ kolo o na ke se ko maŋe se ba go‑o to. O nam na ke o tete Pa-faro wom jeŋa ne to, amo nam boŋe se a pa o vo dáane mo. 26Ko daare amo nam ba jege o woŋo kolo na jege kuri to se a popone a pa amo tu Pa-faro wom. Konto ŋwaane mo amo pɛ se o ba o zege abam yiga ne se á nii, ko fɔge ko dae nmo Pɛ Agiripa. Dé nam ná bwei‑o dé ti, ko wae ko pae se a nae o woŋo kolo a na wó popone a pa Pa-faro wom to. 27Amo boŋe we, ko bá taa jege kuri se a toŋe peeno se o vo Pa-faro wom tei, ye a wo tage o na jege taane woŋo kolo ŋwaane to.”
Atualmente Selecionado:
Kikia 25: KBG
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2020, Ghana Institute of Linguistics, Literacy and Bible Translation (GILLBT)
