Kikia 22
22
Pɔɔl ŋɔɔne o pa o tete
Kikia 9:1-19; 26:2-23
1O déem ma ta o we, “A nɔɔna bam, a kwoa de a nu-bia, ta‑á cheigi-na se a tole ko na ye tei to a bere abam.” 2Ba na lɔre we o ŋɔɔne ba tete taane dem to, ba ma fɔge ba tiini ba cheigi sɔɔ.
3O laam ma ta-ba o we:
“Amo ye Juu tu mo. Ba loge-ne Kilikia teo Tasusi ne. Amo ma daare a ke nɔɔno teo konto wone. A ma zamese Gamaleli tei ne ye a lɔre debam nabaara chwei sem na ye tei to chekke.#Kikia 5:34 Amo déem chɛ lanyerane a kwei a tete a pa Wɛ, nenɛɛne abam zem de na ke tei to mo. 4Amo déem yeini a bɛɛse balo na sɛ ba tɔge Wɛ chwo-doŋa kam to se ko yi ba toone. A maa yeini a jaane nɔɔna a ke peena diga ne, baara de kaana maama.#Kikia 8:3 5Debam kaanem yuu tu wom dedaane dé nakwa kɔgɔ kom maama wó wane ba zege amo chega kam kwaga ne. Maŋa kadwoŋi ne a yeini a vei ba tei mo a jwoŋi twanno telo a na wó kwei a bere Juu tiina balo na wo Damasika ne to. A ma vo da se a ja balo na tɔge Yezu chwoŋa kam to, se a vɔ-ba a ja a ba Jerusalem se ba na waarem.
6Amo na maa vei to, a ma daare fee se a yi Damasika. Ko na maŋe de wea tetare to, pwooni ma pɔpɔ de nwoŋi wɛyuu ne de ba de pepele de kekare-ne. 7Amo ma to tega ne ye a ni kwora na bwoŋi-ne ka we, ‘Sɔɔl, Sɔɔl! Bɛ mo ye n bɛɛse-ne konto?’ 8Amo ma bwei a we, ‘Amo tu, n ye wɔ mo?’ O ma leiri o we, ‘Amo ye Yezu mo, Nazarete tu wolo nmo na bɛɛse to.’
9Nɔɔna balo na tɔge de amo to ma na pwooni dem ye ba wo nigi wolo kwora na ŋɔɔne de amo to. 10A laam ma bwei a we, ‘Amo tu, bɛ mo a nam wó ke?’ Dé Teiru wom ma leiri-ne o we, ‘Zaŋe n vo n zo Damasika teo wo, se dáane mo ba laam wó bere‑m kolo maama Wɛ na boŋe se n ke to.’ 11Amo ma zaŋe wɛɛne, ye a yia daa ba nae, pwooni dem na tiini de pepele-ya to ŋwaane. Konto ma pa se a dwonna bam ja amo jeŋa ba vaŋe-ne ba ja vo teo kom wo.
12Nɔɔno wodwoŋi maa wora, o yere mo Anania. O maa kɔre Wɛ lanyerane, ye o tɔge debam Juu tiina chwei sem. Juu tiina balo maama na zoore Damasika ne to maa tiini ba pa‑o zula. 13O laam ma ba o zege amo tei ne ye o we, ‘A nu-bu Sɔɔl, jwoori n ta‑n nae!’ O na tage konto to, bedwe baŋa ne mo a yia yam puri ye a wae a nii o yibia. 14O ma ta o we, ‘Debam nabaara Baŋa Wɛ mo le nmo se n lɔre o boboŋa na lage kolo to, se n daare n na Wo-pwoŋo Tu wom, ye n daare n ni o na ŋɔɔne de o kwora. 15Kolo ŋwaane nmo wó zege o chega kam kwaga ne se n ta n bere nɔɔna maama nmo na nɛ kolo de n na nigi kolo to. 16Nmo nam ba jege se n daa‑n dáane. Zaŋe se ba pa n jwoŋi sɛɛm, se n pa n wɛleera yam saare de n na lwoori Wɛ dé Teiru wom yere ŋwaane to.’#Lei 51:2
17Konto na ke to, amo laam ma jwoori a vo Jerusalem. A ma vo Wɛ diga kam a wora a ware Wɛ. A na wora to, Wɛ ma pa se a na wo-kenkagele ne dendwɛ mo tei. 18Amo nɛ dé Teiru wom na ŋɔɔne de amo ye o we, ‘Zaŋe n ke lela n duri n nwoŋi Jerusalem ne, kolo ŋwaane teo kom nɔɔna bam bá sɛ kolo nmo na wó ta amo ŋwaane to.’ 19A ma leiri a we, ‘Amo tu, nɔɔna bam yei lanyerane we amo tole Juu tiina jeerim di sem mo se a ja nɔɔna balo na sɛ nmo to, se ba pe-ba se ba daare ba mage-ba. 20Ko daare maŋa kalo ba na go Stiiven wolo na zege nmo chega kam kwaga ne to, amo tete wora ye a sɛ se ba go‑o. A maa zege a nii ba gwaaro tem ba na le se ba daare ba dole‑o ba go to.’#Kikia 7:58 21Dé Teiru wom laam ma ta de amo we, a nam véi, se omo wó toŋe-ne yiga yiga se a vo dwi-gɛ tiina bam tei.”#Kikia 9:15
22Pɔɔl na ŋɔɔne tei maama to, nɔɔna bam ya chem mo ye ba cheigi‑o. O nam na tage dwi-gɛ tiina bam taane to, ba laam ma zaŋe ba bage de ba kwori maama ba we, “Ti-na o momwɛ! Ko wo maŋe se o taa ŋwe!” 23Ba maa nana ye ba vuvuga ba gwaaro wɛɛne ye ba ta mɔɔne fwogo ba chaara. 24Soja tiina dedɛɛro wom na nɛ kolo na ke to, o ma pa o nɔɔna bam ni se ba ja Pɔɔl ba zo ba dam jei sem. O ma ta-ba se ba fere‑o se ba daare ba lɔre o na ke kolo ye Juu tiina bam nane o baŋa ne to. 25Ba na vɔge‑o ba ti se ba daare ba fere‑o to, Pɔɔl ma ta de soja yiga tu wolo na zege da to o we, “Abam jege chwoŋa se á ja Rom teo jeŋa nɔɔno á fere ye ba ta wo bwei ba nii amo na chɔge kolo to na?”
26Soja yiga tu wom na nigi konto to, o ma vo o ta de o dedɛɛro wom o we, “Nmo boŋe se n ke bɛ mo? Nɔɔno wom ye Rom teo jeŋa nɔɔno mo.” 27Dedɛɛro wom ma vo Pɔɔl tei o bwei‑o o we, “Nmo seene n ye Rom teo jeŋa nɔɔno mo na?” Pɔɔl ma leiri o we, “Ɛɛ, a ye konto mo.” 28Dedɛɛro wom ma ta o we, omo ŋwe sabu-fɔrɔ mo ye o daare o ji Rom teo jeŋa nɔɔno. Pɔɔl ma leiri‑o we, “Ba nam loge amo pa se a maŋe a ye ko jeŋa nɔɔno mo.”
29Nɔɔna balo ya na zege se ba bwei‑o taane to na nigi konto to, ba ma kwei o yera ba yage lela. Dedɛɛro wom de na lɔre we Pɔɔl ye Rom teo jeŋa nɔɔno to, foone ma ja‑o de o na pɛ ba vɔ‑o de chaponno to.
Pɔɔl zege nakwa bam yiga ne
30Dedɛɛro wom déem maa lage se o lɔre kolo na kea ye Juu tiina bam saŋe Pɔɔl to. Tega na poore to, o ma pa ba le Pɔɔl ba yage. O ma daare o toŋe ni o pa Juu tiina kaanem yiga tiina bam de ba teo kom nakwa kɔgɔ kom maama se ba jeeri daane. O laam ma ja Pɔɔl o vo o pa se o zege ba yiga ne.
Atualmente Selecionado:
Kikia 22: KBG
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2020, Ghana Institute of Linguistics, Literacy and Bible Translation (GILLBT)
