Kikia 17
17
Ko na ke tei Tɛsaloni ne to
1Ba déem ma tole Anfipola de Apolonia ba kɛ ba vo ba yi Tɛsaloni. Teo kom konto ne mo Juu tiina jeerim diga wora. 2Pɔɔl ma vo da, ne o na maŋe o yeini o ke tei to. O déem wora mo ba siu da yatɔ wone o gare Wɛ tɔnɔ kom ye o bere-ba ko kuri se ba ni. 3O ma maŋe o bere-ba chekke ye o we, ko déem ya maŋe se Wɛ Dam Tu wom na yaara o te ye o daare o bi toone wone. O maa we, “Yezu wom, amo na jege o taane a tɛa a bere abam to mo seene o ye Wɛ Dam Tu wom.”
4Juu tiina bam na nigi konto to, ba badwonna ma sɛ o na tage kolo to, ye ba laam tɔge ba woli Pɔɔl de Silas ne. Girisi tiina balo na tu ba kɔre Wɛ to kɔgɔ dedɛ de ma sɛ Pɔɔl taane dem, dedaane kaana balo jeŋa na gare to dedɛ.
5Juu tiina badaara maa jege puseŋa de-ba. Ba ma vo yaga ba la nɔn-wo-korro ba ke daane. Ba kɔgɔ kom ma pa se bobɔga ja teo kom maama. Ba ma vo ba chiŋi jara Jason sɔŋɔ ne, ye ba kwaane ba lage Pɔɔl de Silas jei se ba zi-ba ba ja nwoŋi ba ke nɔɔna bam jeŋa ne. 6Ba maa wo nɛ-ba. Ba ma zi Jason de Yezu tɔgena badwonna ba ja vo teo kom dedɛɛra bam tei, ye ba bage ba we, “Nɔɔna banto yeini ba beeri logo baŋa jei maama mo ba daane nɔɔna. Ba laam tu ywo mo. 7Jason mo pɛ se ba zoore o sɔŋɔ ne. Ba maama yeini ba chɔge dé Pa-faro wom nia yam mo, ye ba tɛ ba we pɛ wodwoŋi mo wora, o yere mo Yezu.” 8Teo kom dedɛɛra bam de kɔgɔ kom maama na nigi konto to, ba bane ma zaŋe dedɛ. 9Dedɛɛra bam ma pa se Jason de o dwonna bam tiŋi sabu kolo na wó pa-ba chwoŋa se ba jwoŋi ba tete to. Ba laam ma yage-ba pa ba viiri.
Ko na ke tei Berea ne to
10Tega na tu ka yi to, Yezu nɔɔna bam ma pa se Pɔɔl de Silas nwoŋi teo kom ne ba vo Berea. Ba na vei ba yi da to, ba ma vo ba zo Juu tiina jeerim diga kam. 11Teo kom konto Juu tiina bam maa jege boboŋ-ŋona ba dwoi Tɛsaloni nɔɔna bam. Ba ma cheigi Wɛ kwora kam lanyerane de ba wo maama. Dɛ maama wone mo ba yeini ba zamese Wɛ tɔnɔ kom se ba nii Pɔɔl na bere kolo to seene ko ye chega na. 12Ba dedɛ ma sɛ Pɔɔl taane dem, de Girisi tiina dedɛ de sɛ, baara de kaana balo jeŋa na gare to dedɛ.
13Tɛsaloni Juu tiina bam ma ni we Pɔɔl wo Berea ne o tɔɔle Wɛ kwora kam. Ba ma zaŋe ba vo Berea ye ba la kɔgɔ ba pa se teo kom nɔɔna bam bane zaŋe de Pɔɔl. 14Yezu nɔɔna bam na nɛ konto to, ba ma pa se Pɔɔl zaŋe lela o nwoŋi o vo naneo kom ni. Ko ma daare Silas de Timoti mo maŋe Berea ne. 15Nɔɔna badwonna ma tɔge dedaane Pɔɔl ba vo ba yi Atena. Pɔɔl ma toŋe-ba se ba jwoori ba vo ba pa Silas de Timoti ni we, ba zaŋe ba tɔge o kwaga ba ba lela.
Ko na ke tei Atena ne to
16Pɔɔl déem na wo Atena ne o cheigi Silas de Timoti se ba ba to, o wo ma tiini ko di de o na nɛ we jwona dedɛ su teo kom to. 17O maa yeini o zo Juu tiina jeerim diga kam o ŋɔɔne dedaane ba de dwi-gɛ tiina balo na tu ba sɛ Wɛ to. Dɛ maama o ta maa yeini o vei yaga ni o ŋɔɔne de balo na maŋe ba wora to. 18Yi-pore-nyena badwonna de ma ba ba dwoni ded‑o. Ba badaara déem tɔge Epikuri berem dem, badaara de maa tɔge Sitoka berem dem. Ba badaara tage ba we, “Yiyira kanto boŋe se o bere bɛ mo?” Badwonna de ma ta ba we, “Ko nye de o ŋɔɔne sa-teena jwona taane mo.” Ba tage tento kolo ŋwaane o tɔɔle kwor-ywoŋa kalo na tɛ Yezu de twa biim taane to mo.
19Ba laam ma ja‑o ba vo Arɛpaga, mɛ ba yiga tiina bam na tigisi daane to. Ba ma bwei‑o ba we, “Debam ya lage se dé lɔre berem-doore dem nmo na jege n ŋɔɔne to mo. 20Wonnu tedwonna nmo na bere to, dé ta wo fɔge dé ni te dwi. Dé nam wó taa lage se dé lɔre te kuri na ye tei to.” 21Atena tiina bam maama dedaane veira balo na zoore ba tei ne to déem tiini ba lage se ba taa lare daane mo maŋa maama, se ba lɔre wonnu telo ba na ni leile to kuri.
22Pɔɔl ma zaŋe o zege Arɛpaga yiga tiina bam tetare ne ye o we:
“Atena tiina bam, amo na nii to, abam ŋwea maama wone á tiini á zuli jwona mo dedɛ. 23Amo beeri abam teo kom wone a nii a na jei sem maama á na zuli á jwona da to. Amo na beeri to mo a nɛ kaanem bimbini dedoa ye ko popone de yera ne we, ‘WƐ DELO DÉ NA YEIRI TO’ mo ko zege ko pae. Tɔ. Wɛ delo abam na jege á zuli ye á ta yeiri-de to mo a lage a ta dento taane a bere abam. 24Wonto mo ye Baŋa Wɛ wolo na ke logo baŋa de wonnu telo maama na wo ko wone to. O maa tei wɛyuu de tega baŋa maama, ye o ba zoore di selo nabiina na lɔge ba pa‑o to wone.#Izaya 66:1 25Wɛ nam wo gɛ kolokolo se nabiina taa toŋa ba pa‑o, ko na ye wonto tete mo kwei ŋwea, de siu, de woŋo maama o pa nabiina to ŋwaane. 26Wɛ na ke nabiinu dedoa Adam to mo o laam pɛ se nabiina dwi maama zege wonto yera ne. O ma pa se ba jage ba zoore logo baŋa maama wone. O ke konto mo ye o boboŋa ya maŋe ya ja se o lɔre ba dwi dwi maama na wó taa wora maŋa kalo de maŋa kalo to, de ba na wó taa zoore jei selo ne to. 27Wɛ na ke nabiina konto to ye se ba kwaane se ba lɔre-o mo. Ba jege se ba taane mo ba nii o jei, se ba laam wane ba lɔre‑o. Wɛ nam maŋe o dae yiga yiga dedaane debam maama. 28Konto nam tɔge nɔɔno wodwoŋi na tage o we, ‘Wonto ŋwaane mo dé ŋwe dé wora ye dé via.’ Abam tete lein-leenu dedoa de tage konto dwoŋi o we, ‘Debam de maŋe dé ye o bia mo.’
29Debam na seene dé ye Wɛ bia to, dé ba jege se dé boŋe we dé Keiru Wɛ wó taa nye de kamɔgɔ nabiinu na mɛ o tete boboŋa o mɔ de o jea to, ko ná ye sabu-seŋa naa lu-nyenno naa kandwa mo o mɛ o ke.#Izaya 40:18 30Faŋa faŋa ye nabiina ta yeiri kolo na lana se ba ke to, Wɛ wo ke-ko o boboŋa ne. Ko daare leile konto o laam pɛ ni we, nɔɔna maama logo baŋa ne jege se ba leiri ba wo de ba wo-balwaaro keim. 31Kolo ŋwaane o tiŋi dɛ mo o na wó di nabiina maama taane. O wó tɔge chega mo o di ba bora. O nam maŋe o kuri wolo o na wó tɔge o ŋwaane o ke konto to. O pɛ se nabiinu wom konto bi toone wone mo se ko pa nɔɔna maama lɔre we ko seene ko ye chega.”
32Pɔɔl na ŋɔɔne twa biim taane konto to, nɔɔna bam badwonna maa ke‑o ba mɔna. Ko daare badaara maa tɛ ba we, “Dé lage se n jwoori n ŋɔɔne taane dem konto mo se dé daa cheigi.”
33Pɔɔl laam ma zaŋe o nwoŋi o daare-ba. 34Nɔɔna badwonna déem ma sɛ ba tɔge Pɔɔl, ye ba ke ba wo-dedoa de Yezu. Ba dedoa yere mo Dionusi. O tɔge o wo Arɛpaga kɔgɔ kom nɔɔno dedoa mo. Kaane wodwoŋi de wora, o yere mo Damaris. Nɔɔna badwonna de ta wora ye ba sɛ Yezu.
Atualmente Selecionado:
Kikia 17: KBG
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2020, Ghana Institute of Linguistics, Literacy and Bible Translation (GILLBT)
