Kikia 10
10
Dwi-gɛ tu lɔre Wɛ chega kam
1Nɔɔno wodwoŋi déem mo wora, o yere mo Kɔnilusi. O maa zoore Kazaria ne. O déem ye Rom soja tiina dedɛɛro mo. Soja tiina kɔgɔ kolo o na tɔge o wo ko wone to yere mo ‘Yitalia tiina kɔgɔ’. 2O déem kɔre Wɛ mo. O de o sɔŋɔ tiina maama maa zuli Wɛ lanyerane. O maa woli Juu tiina balo yiniga na jege-ba to. O maa yeini o ware Wɛ maŋa maama. 3Dɛ dedwe wɛ na guni maŋa kalo to, o ma dwɛ o na wo-kenkagele. O ma yɔɔre o na Wɛ maleka na tu ka bwoŋi o yere ka we, “Kɔnilusi!” 4O ma fi o yia o nii maleka kam seeni ye foone jege‑o. O ma ta o we, “Amo tu, n tu amo tei mo na?” Maleka kam ma leiri‑o ka we, “Nmo na yeini n ware Wɛ ye n kwori n woli yiniga tiina to mo pɛ se n kikia yam konto su Wɛ yi. O nam guli nmo gula mo. 5Leile konto nmo jege se n toŋe nɔɔna se ba vo Jopa ba bwoŋi nɔɔno wodwoŋi, o yere mo Simon Piita. 6O ye veiru mo gɔgɔ kodwoŋi sɔŋɔ ne. Gɔgɔ kom yere mo Simon. O sɔŋɔ kom maa wo naneo kom ni ne.”
7Maleka kam na tage konto ka ti to, ka ma viiri. Kɔnilusi ma bwoŋi o sɔŋɔ kom tontoŋena balei, de soja tu dedoa wolo na toŋe o pa‑o ye o de kɔre Wɛ to. 8O ma ta kolo maama na ke to o bere-ba ye o daare o toŋe-ba se ba vo Jopa.
9Tega na poore to, nɔɔna bam ma daare fenfee se ba yi Jopa. Piita déem diini sɔŋɔ kom nayuu se o ware Wɛ. Ko ye wea tetare ne mo. 10Kana laam maa jege‑o ye o lage wodiu se o di. Ba na wora ba ke wodiu kom to, Wɛ ma pa se o na wo-kenkagele ne dendwɛ mo tei. 11O nɛ wɛyuu na pore o baŋa ne ye woŋo nwoŋi da ko maa tu tega. Woŋo kom nye de gɔr-kamunu mo ye ba zei ko nia yana pa se ko maa tu tega. 12Vara dwi maama mo tigi ko wone, dedaane tega-veila, de zuna. 13O na nɛ to, o ma ni kwora na ŋɔɔne ded‑o ka we, “Piita, zaŋe n go wonnu tem n di.” 14Piita ma leiri o we, “Amo tu, a bá sɛ. Amo wo fɔge a di woŋo kolo na ba lana ye ko wo maŋe de dim to.”#Chullu 11:1-47 15O daa ma jwoori o ni kwora kam na we, “Yé zaŋe n chuli woŋo kolo Wɛ na pɛ se ko maŋe de dim to.”#1 Tim 4:4-5 16Ko ke konto mo kuni betɔ. Wonnu tem laam ma jwoori te vaŋe te di wɛyuu.
17Piita maa bwɛa wo-kenkagele dem o na nɛ to kuri. O na wora konto to, mo nɔɔna balo Kɔnilusi na toŋe o tei ne to maŋe ba lɔre Simon sɔŋɔ kom jei. Ba laam ma vo ba yi manchwoŋo kom ba zega. 18Ba ma bwoŋi ba bwei ba we, “Nɔɔno zoore ywo, o yere mo Simon Piita na?”
19Piita daa ta maa kwaane se o lɔre wo-kenkagele dem o na nɛ to kuri. Wɛ Sin-laao kom ma ta ded‑o ko we, “Nii! Nɔɔna batɔ mo tu ywo ba lage nmo. 20Zaŋe n tu tega. Yé ta‑n jege boboŋa yalei se n tɔge de-ba n kɛ, kolo ŋwaane amo mo toŋe-ba.” 21Piita ma tu tega ye o ta de-ba o we, “Amo mo ye wolo abam na lage to. Bɛŋwaane mo ye á ba?” 22Ba ma leiri ba we, “Soja tiina dedɛɛro Kɔnilusi mo toŋe debam. O ye nɔn-ŋom mo ye o kɔre Wɛ lanyerane. Juu tiina bam maama maa pa‑o zula. Wɛ maleka mo tage ded‑o se o bwoŋi nmo o sɔŋɔ ne se o wane o ni kolo nmo na lage n ta to.” 23Piita ma pa se ba zo sɔŋɔ kom ba peini.
Tega na poore to, o ma zaŋe o tɔge de-ba o kɛ. Yezu nɔɔna badaara de ma zaŋe Jopa ne ba tɔge ded‑o ba kɛ. 24Tega daa na poore to mo o yi Kazaria. O yi da dedaane Kɔnilusi, de o sɔŋɔ tiina, de o badwonna o na bwoŋi to maŋe ba jei ba cheigi‑o. 25Piita na yi sɔŋɔ kom to, o maa boŋe se o zo. Kɔnilusi ma zaŋe o nwoŋi o jeeri‑o, ye o daare o to o yiga ne o jɔɔne‑o. 26Piita ma pa se o zaŋe wɛɛne o zege, ye o ta ded‑o o we, “Amo tete ye nabiinu mo.” 27O daa ta maa ŋɔɔne ded‑o ye ba maa zoore sɔŋɔ kom. O ma na nɔn-kɔgɔ na gilimi da ba jei. 28O ma ta de nɔɔna bam o we, “Abam maŋe á yei we ko chula se Juu tu taa zoore dedaane dwi-gɛ tiina, naa o taa tɔge de-ba. Wɛ nam mo bere amo we, ko wo maŋe se a taa chuli nɔɔn-nɔɔno, naa a pae o taa ye nɔn-diku. 29Konto ŋwaane, abam na toŋe á bwoŋi-ne to, a wo ve ye a ba. Amo nam lage a bwei a nii, bɛ mo ye á toŋe á bwoŋi-ne?”
30Kɔnilusi ma ta o we, “Zem mo jege da yana, ko maŋe de maŋa kanto ne, wɛ na guni to, ye a wora a ware Wɛ sɔŋɔ ne. Nɔɔno ma pɔpɔ o ba o zege amo yiga ne. O maa zo gare-nyenno. 31O ma ta de amo o we, ‘Kɔnilusi, Wɛ mo jwoŋi nmo wara yam. Nmo na woli yiniga tiina to ŋwaane mo o guli nmo gula. 32Nam toŋe nɔɔna se ba vo Jopa ba bwoŋi nɔɔno wodwoŋi, o yere mo Simon Piita. O ye veiru mo Simon wolo na ye gɔgɔ to sɔŋɔ ne. O maa zoore naneo kom ni ne.’ 33O na tage konto to, a ma toŋe nɔɔna lela se ba vo ba bwoŋi‑m se n ba. A ke nmo lei de nmo na tu to. Debam maama nam zege Wɛ yiga ne mo dé cheigi se dé ni kolo maama dé Teiru wom na pɛ‑m se n ta to.”
34Piita laam ma zaŋe o ta o we, “Amo zem lɔre we ko ye chega mo we Wɛ ba kuri nɔɔna daane.#Nia Gulim 10:17; Rom 2:11 35Wɛ jwoŋi nɔɔno wolo maama na kɔre‑o ye o daare o ke kolo na tɔge chwoŋa to mo, ko ná ye Juu tu naa dwi tu wolo de. 36Abam maŋe á yei Wɛ kwor-ywoŋa kam o na toŋe Isarele dwi tiina bam tei ne we Yezu Krista mo wae o jwoŋi nɔɔna o fɔge ba de Wɛ daane tei to. Wonto mo ye nabiina maama Teiru. 37Abam ta yei wo-kamunnu telo maama na ke Judea ne to. Ko déem bobo Galili ne mo, maŋa kam Jɔn na bere nɔɔna se ba jwoŋi sɛɛm Wɛ ŋwaane ye ko kɛ to. 38Abam lɔre Nazarete tu Yezu yera seina na ye tei to. Wɛ déem lwogi o Sin-laao kom o yera ne ye o kwori o pa‑o dam. Wɛ na wo o tei ne konto to, o maa yeini o vei jei maama o zeini nɔɔna lanyerane, ye o kwori o jwoŋi balo na wo setaana pɛ jeŋa ne to o yaga. 39Debam nam mo nɛ wonnu telo maama o na ke Jerusalem ne de Juu tiina teene dem maama ne to ye dé zege te chega kam kwaga ne. Ba laam jaane‑o mo ba pa dagara yuu ne ba go. 40Wɛ ma pa se o jwoori o bi toone wone da yatɔ dɛ ne. O ma pa se o veere o tete nɔɔna yiga ne pa ba na‑o. 41Ko nam dae we nɔɔna maama mo nɛ‑o, ko ye balo yerane Wɛ na maŋe o kuri se ba taa zege o kwaga ne to mo. Debam mo konto. Yezu na bi toone wone to, debam tɔge ded‑o dé di wodiu ye dé nyɔ na. 42O ma pa debam ni se dé tɔɔle Wɛ kwora kam dé bere nɔɔna se dé daare dé pa ba lɔre we, omo ye wolo Wɛ na tiŋi se o bore nɔn-ŋwena de twa taane to. 43Faŋa faŋa Wɛ sampwori sem maama déem tage wonto taane ye ba ta ba we, nɔɔno wolo maama ná ke o wo-dedoa ded‑o, Wɛ wó yage konto tu wɛleera o ma chɛ‑o wonto yere ŋwaane.”
44Piita ta na wora o ŋɔɔne konto to, Wɛ Sin-laao kom ma tu ko ba balo maama na jei ba cheigi o taane dem to tei. 45Juu tiina balo na maŋe ba sɛ Yezu ye ba tɔge de Piita ba ba to maa ye yaau de Wɛ na lwogi o Sin-laao kom o pa dwi-gɛ tiina o woli da to. 46Kolo ŋwaane ba nigi ba na ŋɔɔne ta-gɛ mo ye ba kwori ba zuli Wɛ.
47Piita laam ma ta o we, “Nɔɔna banto seene ba jwoŋi Wɛ Sin-laao kom ne debam de na jwoŋi tei to mo. Konto to, nɔɔn-nɔɔno bá wane o ve se dé kwei na dé pa ba jwoŋi sɛɛm.” 48O ma daare o ta se ba pa-ba sɛɛm Yezu Krista yere ŋwaane. Ba laam ma lwoori‑o se o maŋe ba tei ne da fenfee.
Atualmente Selecionado:
Kikia 10: KBG
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2020, Ghana Institute of Linguistics, Literacy and Bible Translation (GILLBT)
