1 Korinti 6
6
Yezu kɔgɔ kom taana kwɛɛm
1Abam wolo ná jege taane de o dwoŋi, ye á ye nu-biu Yezu ŋwaane, bɛ mo ye nmo wó ja taane dem n vo kɔɔte, se balo na yeiri Wɛ to di abam taane dem? Ko nam maŋe se Wɛ nɔɔna bam mo di á taane dem. 2Wɛ nɔɔna bam mo wó ba ba di nabiina maama taane. Á yeiri konto na? Konto ŋwaane, bɛ mo kea ye á ware á di ta-balwa á pa á tete? 3Á yeiri we debam mo wó di malese sem taane na? Konto to, dé bá wane zem taana yam dé di na? 4Abam nam ná jege taane konto dwoŋi á wone, bɛ mo ye á ja á vo balo na dae kolokolo Yezu nɔɔna bam yiga ne to tei? 5A tage tento maama se chaveera mo ja abam. Ko wó taa ye chega we, swa tu tere abam wone se o wane o fɔge abam balo na ye nu-biu to daane na? 6Abam na yeini á ke tei to ba lana. Abam wone nɔɔno dedoa yeini o saŋe o nu-bu kɔɔte ne, pa se balo na yeiri Wɛ to di o taane.
7Abam nam ná saŋe daane konto, ko bere we á maŋe á ga bora mo. N nu-bu ná ke‑m wo-lɔŋɔ, naa o ná ŋɔge‑m, ko ya lana se n yage n ma n chɛ‑o mo. 8Ko nam na ye tei to, abam tete yeini á ke wo-lwanno mo, ye á ŋɔne daane, dedaane á nu-bia bam de. 9Á yeiri we balo na ba tɔge chwo-laao to bá na jeiŋa jei Wɛ paare dem ne na? Yé zaŋe-na á gane á tete. Balo na ye ka-lagena, naa jwo-kaana, naa ka-ziina, naa baywallo, naa balo na peini de-ba to, 10naa ŋweena, naa nɔn-kwollu, naa sa-nyɔra, naa nɔn-tweena, naa venverena to bá na jeiŋa jei Wɛ woro kom ne.#Efesia 5:5 11Abam badaara déem ke konto dwoŋi mo. Wɛ nam saare á wɛleera yam maama, se á ta‑á ye wose ye á jege chega o tei ne. Wɛ dɛ dé Teiru Yezu de o Sin-laao kom dam ŋwaane mo o ke konto o pa abam.
Dé yera yam chɔgem taane
12Abam badaara we, kolokolo daa tera ko na chula á tei ne. Amo nam tɛ we, ko dae woŋo maama mo jege nyɔɔre ko pa abam. Amo ná tage a we, kolokolo daa tera ko na chula amo tei ne, amo nam bá sɛ se a pa kolokolo taa jege dam se ko wane ko fe amo. 13Abam yeini á we, Wɛ ke wodiu de kana mo se ba taa zeini daane. Maŋa nam wó ba ye Wɛ ja wodiu de kana maama o chɔge. Wɛ nam wo mɔɔne dé yera yam o pa debam se dé taa mae dé ke kabwoŋa. Wɛ mɔɔne dé yera yam se dé Teiru Yezu mo taa tei-ya, ye dé kwori dé taa ma-ya dé toŋe dé pa‑o. 14Wɛ mɛ o dam mo o bi dé Teiru Yezu toone wone. Maŋa nam wó ba ye o bi debam de toone wone.
15Á yeiri we á yera yam ye Yezu Krista yera yam daa dedoa mo na? Abam yera yam de Yezu yera yam na ye bedwe konto to, á yé zaŋe á kwei-ya á ma á peini de ka-tola, kokuri á yera yam de wonto yera yam wó ji bedwe mo. 16Kokuri, wolo ná peini de ka-tola, kotu de ka-tola kam maama laam jigi woŋo dedoa mo. Á yeiri konto na? Wɛ tɔnɔ kom tage we, “Banto balei wó ji yera dedoa mo.”#Pulim 2:24 17Wolo nam ná me de dé Teiru Yezu, kotu jworo de Yezu jworo maama ye bedwe mo.
18Nam yage-na kabwoŋa kikia maama. Keim-balwaaro telo maama nɔɔno na wó ke to, o bá ke o yage o yera wone. Nɔɔno nam ná ke kabwoŋa, konto ye keim-balɔrɔ kolo o na ke o yage o yera wone to mo. 19Á yeiri we á yera yam nye de Wɛ tete diga kam ye o Sin-laao kom mo zoore ka wone na? Wɛ seene o ke o Jworo kom á bochara ne mo. Konto ŋwaane, á daa ba tei á tete. 20Á ye Wɛ nyem mo. O yeigi abam de o kwora mo. Konto ŋwaane, kwei-na á yera yam á ma á toŋe se ko pa Wɛ na yere.
Atualmente Selecionado:
1 Korinti 6: KBG
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2020, Ghana Institute of Linguistics, Literacy and Bible Translation (GILLBT)