Luc 1
1
1Baari kuna ama baana oteende maami ma ayiri o mpanihi e saabe. 2Bo atoosi maami maa ma osuumbu a baari ma amoni ebanihi e mo, bo se aduhi saabe. Bo se ama kiriha adzandzi a Ndzyami ma otooso mbari e Nde. 3Ŋa kya obila o me se emoni ove, me yiri na osaha, na opisa ndzele ndzele, maami aso ma ayiri ma ebaanihi, me eteende we osaangumu o yemihi, nkani Tiofile. 4Me esa vwa mo bu mbri, we oyaa mbri maami ma ayisihi we, aki asisyele.
5Ntini Erode akihi nkumu osi o Zide, eki na osi avwoŋi omo, nkuumi e nde Zakari a ndzuɓu Abya asi ma avwoŋi. Okari a nde Elisabete ama ombisa Arone.#1.5 Arone oma kaha osi avwoŋi onini, o ntini e Moyize aki nkumu a Izayele. 6Bo aso vwele aki tele o miisi a Ndzyami, ma anyiima angri na esiɓi e Nkumu eso ndzele ndzele. 7Bo aki baana kali, obila Elisabete aki onguma, bo aso vwele aki aya ekuɓu.
8Tsuhu mo, Zakari akihi ma osa dzandza e nde, lempa la avwoŋi ntsa ndzo e Ndzyami. Dzya eki tsuhu odzwa a ndzuɓu e nde e dzandza. 9Kya otiiri ma asi ma avwoŋi, aswoli nde ma onyunuŋa ntsa nkiina e Nkumu, ma otsuha vwoŋi oyombo. 10Baari a Ndzyami kuna aki o ndzi ma ovwono o ntini ma ampihi vwoŋi oyombo. 11O ŋa, obaandzi a Nkumu owasihi o paani e Zakari. Nde akihi mo kwoho olumi o nkiina, mpili ma atsuha eyombo. 12Zakari omono nde, ongwo osi nde bla vwoho bo mini. 13Ŋa obaandzi na nde ndi: «We ka mono vwoho ni Zakari, Ndzyami omi yalaha evwonihi e we. Okari a we Elisabete adze okula mwana a balaha, we adze ompa nde nkuumi e Zan. 14We adze omono oswere bo mini. Baari kuna ma adze otsaɓa me ekulihi e nde. 15O miisi a Nkumu, nde adze oka mvuuru onini. Nde aka adze onywa mali a ba, na mali akima a nkala ni. Oduduma Santi adze oluula o nde ntsa mwo a nguhu a nde. 16Nde adze osa ndi baana a Isayele avuruha na e Ndzyami a Nkumu a bo. 17Nde adze oya mva ntuma a Ndzyami na oduduma bla mpari Owoɓi a Ndzyami Eli. Ma oyeese etima ma ataara bla baana. Nde adze okaala etima e baari ma ali i nyiima Ndzyami ni. Bo ma adze otsimiŋa mva baari ma ali tele. Nde ayeese baari aka tele o miisi a Nkumu.» 18Zakari okaali na obaandzi ndi: «Me oyaa mbri dzaa dzaa buni?» Me okuɓu, okari a me oya okuuru. 19Obaandzi okaali nde ndi: «Me Ngabriyele, me okaaha bla Ndzyami atumi me na aduha we ntsya e mve. 20Ŋa we aka yalaha mbari e me ni, we adze oka nkena tii ngo e maami ma adze oto.»
21Baari aso ma adilihi, akimi lebihi le Zakari ntsa nkiina. 22Etsuuhi e nde, oya i tiha ni, bo ayaa ndi nde omi mono maami a lwari ntsa nkiina. Nde oya owoɓo na bo ma elyemi.
23Zakari omana etsuhu e nde e dzandza ntsa ndzo e Ndzyami, ovurihi ndzo e nde. 24Etsuhu ema yira, Elisabete obiri yimi. Osi angondo ataani i tsuuha o ndzi ni. Nde ntsa otima ndi: 25«Mono dzaa e Nkumu ami sa o me ma antini ma, nde omi sa me dzaa e mve, nde omi tsyese me okru o miisi a baari.»
Ntsya ekulihi e Zezi
26Yimi e Elisabete eto angondo asyami, Ndzyami otumi obaandzi a nde Ngabriyele ntsa Nazarete, onguundu o Ngalili. 27Mpili ondzambu okaasi a nkuumi Mariya, aki okini onkiina. Ompala Zuzefe, ombisa o nkani Davide. 28Obaandzi owasihi na nde ndi: «Swere, mpolo e Ndzyami eli bla we, na Nkumu oli bla we.» 29Mariya okimi, otsimiŋi ndi: «Bi ewosihi ema?» 30Obaandzi okaali ndi: «We oka mono vwoho ni Mariya, mpolo e Ndzyami eli bla we. 31We adze obira yimi, we adze okula mwana a balaha, we adze ompa nde nkuumi e Zezi. 32Nde adze oka mvuuru onini ma adze otwolo nde o Mwana Ndzyami a Nkara Yulu. Ndzyami a Nkumu adze ompa nde onkani mva eki ombisa o nde Davide. 33Nde adze okuuma o yula baari a ndzo e Zakobe#1.33 Ndzo e Zakobe oma kaaha baari a Israyele., onkumu o nde ma oka adze owa ni.» 34Mariya okaali na obaandzi ndi: «Kari edze oyira buni? Me kini onkiina.» 35Obaandzi okaali ndi: «Oduduma Santi adze oya o yula we, mpari e Ndzyami a Nkara Yulu edze owuha we mva odziiŋi. Kya obila ma adze otswolo mwana ma kula dzwa, ma opeende, ma adze otswolo nde o Mwana Ndzyami. 36Nkwono e we Elisabete se, ma atswolihi ma onguma oya na yimi angondo asyami, ntsa okuɓu, nde adze okula mwana a balaha. 37Obila Ndzyami okwono kali.» 38Mariya okaali ndi: «Me odzandzi a Nkumu. Ndzyami osa ma osuumbu a we aduhi.» Emana obaandzi onyili nde.
Mariya akye Elisabete
39Etsuhu eyiri, Mariya oyeni asisari onguundu o yulu okuri o Zide. 40Nde onyunihi ntsa ndzo e Zakari, owoosi Elisabete. 41Elisabete oma yuha dzuuhi le Mariya, mwana ofuɓi ntsa mwo a nde, Oduduma Santi oluuli mo Elisabete. 42Nde owoɓi nkara yulu ndi: «O yulu akaasi aso, Ndzyami omi mpa we andosoho, na mwana ali ntsa mwo a we se. 43Na me ŋa se mvuuru a nguhu a Nkumu abuuna okye? 44Obila we na owooso me ŋa mwana ofuɓi, osweri ntsa mwo a me. 45Oswere oka na we, mvuuru ayalihi maami a Nkumu aduhi, ma adze omono mo!»
Luumu le Mariya
46Mariya ndi:
Me ekuusa onkani o Nkumu,
47oduduma a me oli ntsa oswere
obila o Ndzyami ama vusiha me,
48Nde se ama yiɓiha me, odzandzi a nde a mvunu kali.
Ee, ma obaana o tsuhu e loɓi, na antini aso, baari a yula ntsye aso ma duha ndi me eli ntsa oswere,
49ma oma, Ndzyami a mpari ama asa maami ma ave, nkuumi e nde opeende.
50Nde oli ove antini aso mo baari ma anyiima nde.
51Nde ama laha onkani o nde ntsa mpari: ama tsuura anga otima e kuuna,
52Nde ama buuna ankani ma ambara a bo,
emana okuusi baari ma nyimaha.
53Nde ama mpa anga ndzala biila, otsuuri anga osolo dzyala onyaŋa.
54Nde aya na ayamaŋa baari a Isayele, adzandzi a nde:
nde aka limiha olaha ove o nde
55na Abraame bla baana ni, mva e nde alehi ndahi na akuuru a saabe.
56Mariya oki bla Elisabete angondo mbri atari, emana ovuruhi mpuhu e nde.
Ekulihi e Zan Batise
57Ntini ema to, Elisabete okuli mwana a balaha. 58Baari ma aki paani e Elisabete bla nkwono e nde, ayuhi ndi Nkumu omi sa nde ove bo mini, bo se amoni ove bla nde. 59Amana okula mwana etsuhu ntsaami eyiri, o mfwomo asi nde sasi, bo asahi oluha nde nkuumi e taara nde Zakari. 60Ŋa nguhu a nde ndi: «Kali, nkuumi e nde edze oka Zan.» 61Bo na nde ndi: «Nkwono e we nkuumi dzya kali.» 62Alaɓi elyemi mpili e taara ma opisa nkuumi e nde asaha ompa mwana. 63Zakari opisi kiila mo oteende, oteendi ndi: «Nkuumi e nde Zan.» Bo aso aya ntsa lekimi. 64O ŋiŋa Zakari oya avuruha owoɓo, nde oya avwono Ndzyami. 65Baari ma aki o paani bo amoni vwoho, osi o Zide oso o yulu okuri, oya ewobo lo. 66Aso ma ayuhi maami maa, aya ma tsimiŋa, ma pisa abuha ndi: «Mwana yu adze oka buni?» Mpari e Nkumu eli bla nde.
Luumu le Zakari
67Oduduma Santi oluuli o Zakari a taara a mwana, oya aduha ndi:
68«Leve le Nkumu, Ndzyami a Isayele
ma obila o nde ayi na ayamaha, na levusaha le baari a nde.
69Nde omitusaha saabe ovusihi onini
ntsa ndzo e nkani Davide, odzandzi a nde.
70Nde aki ama biha na otooso na kala, ma enywa ma awoɓi a mbari e nde ma ali epeende:
71Nde ovusihi atusaha saabe o ntsa dzyala ma anga ombangu,
na o mpari e baari ma ali na mbele e saabe.»
72Nde olahi ove o nde na akuuru a saabe,
oyiɓihi ondihi ma opeende le etini.
73Ndzyami olaɓi okesi na Abraame a taara saabe,
74ma otusaha saabe ntsa dzyala ma anga ombangu,
mo bu ndi i ma vwono nde bla vwoho ni,
75mo bu ndi, saabe leka tele ntsa opeende o miisi a nde etsuhu eso ma lebihi le saabe.
76Zakari ovurihi oduhi ndi: «Ŋa we mwana me, ma adze otwolo we ma owoɓi a mbari e Ndzyami a Nkara Yulu.»
We adze otswomo levusu le Nkumu, ma oselehe nde ndzila.
77Ma oduha se na baari a nde ndi, nde adze ovusaha bo,
na leboloho la ambiini a bo.
78«Ndzyami a saabe ama luula ma oduusu, nde se ove:
nde adze olehe saabe oyalala o yulu, mva ebalihi e mui na entsyere,
79ma olaha baari ma ali ntsa lempiiɓi na odziiŋi a leku, oyalala,
ma obira saabe o ndzila oduusu.»
80Mwana akula, na oduduma nde se abaha mpari. Nde aki okaha ntsa ebiri e kayi, tii ngo tsuhu e nde ayi o miisi a baari a Isayele.
Atualmente Selecionado:
Luc 1: MDT
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES