Luk 1
1
Itase ja makana ma Luk akwɛlɛsɛ
1Ɔbɛ Teofili wa nɛni, bato buce banyekasa ikwɛlɛcɛ beyaya byayekanasa opanga bɛhɛ. 2Bakwɛlɛsɛ byango, nda bakumɛsɛ utase batandasa bɛhɛ. Na bango ikalakasa batande ba iyɔkɔ ja Zambe. 3Bosina mɛnɛ namɛ mayɛnɛ te yaje obwɛji ilwaka ihimwaka iyamɛ ekusi, masina ma mambo nda mango abekubwɛsɛ utase, na ikwɛlɛcɛ ɔbɛ Teofili wa nɛni, beyaya byɛ, nda byango byayekanasa, na njanga mwa mbɛ. 4Okate mabeka nɛ, oyebace te, maheya moyokasa maje mombo.
Ngɛlɛ atanda ijibwɛ ja Zabatisi
5O sondi ya Elodi ajasa Nkani o Zude, yajasa na we mwa be buwa mwa jinɔ te Zakali, wa lupu ja Abya wa we mwa bebuwa. Mwaji neji ajasa mwehito wa ikaka ja Alɔn wa we mwa bebuwa, jinɔ jeji Elizabɛti. 6Bahajɛ baba bajasa hongololo o boho bwa Zambe, bakɔlɔkosɔ obwɛji maheya na mapeko mahajɛ ma Ku wa mini. 7Nde bijasa na bana, bosina te Elizabɛti ajasa ekomba, bajasa te betolubwa.
8Ibwate buya, Zakali abekakasa ehaji eji ya we mwa bebuwa okatwa Elongwɛ ya Zambe, bosina te yajasa ekusi ya lupu jeji ijazaka. 9Ihinjɛcɛ ibonwu ja ehaji ango ya bawe ba bebuwa, Zakali abɔnubwɛ ikweyaka o njimba wa Ku wa mini itumbaka nguma. 10Lupu jahajɛ ja babɔndɔkɔsɔ bya hɛnjɛ o elɔmɔ ya batumbakasa nguma. 11Okate, ngɛlɛ wa Ku apwa o boho bwa Zakali ntɛtɛ opɛyi obɔ bwa hangwɛ okuna etaka ya batumba nguma. 12Usya Zakali ayɛnɛ ango, ayɛnɛ bohihi, bɔngɔ te bwa banda ango. 13Nde, ngɛlɛ asɔhɔ neji te: «Teka lɔngɔ, ngwɛnɛ Zambe eyoka membɔndu myɔbɛ, mwaji ɔbɛ Elizabɛti ejiyaka ɔbɛ mwana wa ndomana wa oyocɛcɛ jinɔ te Za. 14Obijaka o ncebo bosina bweji, na bato buce babicebaka bosina bwa ijibwɛ jeji, 15bosina te abijaka njazi munɛnɛ mwa Ku wa mini. Mwaji wan maku nde maku, ejaka humɔn na Ekokoyi ya Pu aneci o mwɛnyi mwa nyangwɛ. 16Abihuwanka boyaka na bana buce ba lupu ja Izahɛli o boho bwa Zambe Ku ango, 17na ijongaka o boho bwa Zambe na njanga mwa tuma ya ntɔci mwa Zambe Eli ajasa na yango, ehangwɛcɛ bahangwɛ na bana, ebekaka te bateka siswa Zambe, basiswace ango nda bato ba hongololo, okate bato bahajɛ bejaka obwɛji ibokaka iye ja Ku wa mini.» 18Zakali ahimwa ngɛlɛ te: «Meyebaka te yejaka mombo na? Majetɛ ntolu, na mwaji amɛ etolubwa.» 19Ngɛlɛ te ahujɛ na neji te: «Imɛ Ngabyɛli, matɛmɛ o boho bwa Zambe ijazaka ango, amuloma mɛ itandaka ɔbɛ itundu ja mbɛ jitɛ. 20Nde yoji teka myala iyɔkɔ jamɛ je bekubwɛcɛ o elɔmɔ eji, ɔbɛ obikalaka nkina, moji mini sɔhɔ ngu na usya bemba byɛ byahajɛ bye bekubwɛcɛ.»
21O elɔmɔ yɛ, lupu ja bokakasa Zakali ja yɛnɛ ngambala bosina bwa ango ayimwasa buce o njimba. 22Usya ango apundasa mujasa minɛ na pizo ya isɔhɔkɔ na bango, na bango na iyebaka te, ajasa eyɛnɛ emba bya njimba, asɔhɔkɔsɔ bosimɛcɛ nda nkina.
23Usya Zakali ahijɛsɛ minyan meji ma ehaji, alwa bya itona jeji. 24Onyate elɔmɔ yɛ, Elizabɛti wa mwaji te atombɛ mwɛnyi, ya ango ahɔmɔ bangɔndɛ ba tanyi okatɔ ya Elongwɛ eji, na isɔhɔkɔ te: 25«Ngwɛnɛ bɔnhu bwa Ku wamɛ amubeka mɛ, ayebwa mɛ, na ijɛlɛcɛ mɛ hɔyi o boho bwa bato na iwɛcɛ imɛ mwana.»
Itundu ja ijibwe ja Zɛzi
26Usya mwɛnyi mwa Elizabɛti mwa kokasa bangɔndɛ toba, Zambe aloma Ngabyɛli wa ngɛlɛ o njɛnja mɔngɔ ya Ngalile bya eposi ya Nazalɛti. 27Alomasa ango bya epaka ya mwehito wa Zozɛfi a sojɛsɛ, Zozɛfi ajasa moto wa buka bwa Davidi wa Nkani, jinɔ ja epaka ya mwehito mɛnɛ Mali. 28Ngɛlɛ akweya o Elongwɛ eji na isɔhɔkɔ neji te: «Masosa ɔbɛ Mali, Zambe ebeka ɔbɛ bondonga bunɛnɛ. Ku wa mini ajɛ na nɔbɛ.» 29Mali ayɛnɛ bohihi na mwɛ janga mwa bekana. Ya ango atemanga o katɔ ya lema te: «Mutɛ janga mwa isosaka imɛ nde?» 30Ya ngɛlɛ wɛ ahuwana bosɔhɔkɔ na neji te: «Teka lɔngɔ Mali bosina te, bondonga bwa Zambɛ bwaje na nɔbɛ. 31Ngwɛnɛ, otombɛcɛ mwɛnyi, na ijyaka mwana wa ndomana, wa oyocɛcɛ jinɔ te Zɛzi. 32Abijaka moto unɛnɛ, bebangaka ango mwana wa Zambe wa nyangwɛ wa iko. Zambe Ku wa mini, abiwɛcɛ ango ekozi ya bokani bwajasa na Davidi wa tata eji. 33Abikɔkɛcɛ ukwa lupu ja Zakɔbi, abikɔkɛcɛ mbɛmbɛyi 34Mali asɔhɔ na ngɛlɛ te: «Ya ango mɛnɛ yɛ yebekubwɛcɛ na? Imɛ teka yaba ba ndomana.» 35Ya ngɛlɛ ahungwɛ na neji te: «Ekokoyi ya Pu yabihulaka ukwa ɔbɛ, tuma ya Zambe wa nyangwɛ wa iko yabikubaka ɔbɛ, na bosina mɛnɛ mwana wa ojyaka ejaka Pu bebangaka ango, mwana wa Zambe. 36Taka na Elizabɛti wa moto ɔbɛ, na neji aje na mwɛnyi o botolu. wa babangakasa te ekomba, aje na bangɔdɛ toba, 37bosina te teka emba ya nyeni yeka Zambe.» 38Okate, Mali ahungwɛ te: «Imɛ njazi mwa Ku wamɛ, Zambe abekace ndango amutanda!» Ngɛlɛ te amanya na neji.
Mali alwa itaka Elizabɛti
39O sondi mɛnɛ yɛ, Mali ahula bojongaka kwakwa, alwa o eposi yaji o mabete ma njɛnja mɔngɔ ya Zude. 40Ya ango akweya o elɔngwɛ ya Zakali, okate asosa te Elizabɛti. 41O elɔmɔ ya Elizabɛti ayoka nda Mali asosa ango, mwana te aningana ango o mwɛnyi, Ekokoyi ya Pu yalozɛ ango. 42Ya ango apotanga yoce na isɔhɔkɔ te: «Oje na ipota jayekana bayito bahajɛ, na mwana aji na nɔbɛ o mwɛnyi ajɛ na ipota . 43Imɛ be za? Wa nyangwɛ wa Ku wamɛ oyaka iyɛnɛcɛ? 44Bosina te o elɔmɔ yomu sosa imɛ, mwana aningana mɛ o mwɛnyi na ncebo. 45Oje o mana, bosina bwomubukwɛ te emba ya Ku mini atandasa ye bekubwɛcɛ.» 46Usɛ Mali te asɔhɔ te:
«Masomɛ Ku wamɛ na ngwanda ame, na lema mwamɛ mwahajɛ.
47Ekokoyi amɛ yajetɛ humɔn na ncebo munɛnɛ,
bosina bwa Zambe yonjamɛ.
48Ayebwa imɛ wa njazi mweji mwa mabiya,
bato ba belɔmɔ byahajɛ bemici sɔhɔ te majete o mana.
49Bosina te Zambe wa tuma ebeka imɛ bemba binɛnɛ,
jinɔ jeji jaje Pu.
50Cɛyi yeji yalandanga o menkola na menkola na bato basiswa ango.
51Aya na obɔ eji wa tuma,
na ihangaka bato baji na matemange o melema,
52na ijɛlɛcɛ ba mapizo o bekozi byango bya bokani,
na ibesɛcɛ bato ba mabiya.
53Okate ahowa metende bokumani, na ipepaka bakani na ihunwanaka mabɔ nɛnɛ.
54Ya ango aya inyamwaka Izahɛli wa njazi mweji,
na bosina bwango aji teka yebijɛ cɛyi bweji,
55na Abalami, na ikaka jeji jahajɛ mbɛmbɛyi
nda ango atandasa na batata baho.»
56Usɛ Mali abekasa bango na Elizabɛti ice bangɔndɛ bahanto, na ango ihunwanaka bya mboka eji.
Ijibwe ja Za batisi
57Usya elɔmɔ ya Elizabɛti ijiyaka yakoka, ajiya te mwana wa ndomana. 58Bananyangwɛ na yali eji, bayoka te Ku wa mini eyɛnɛ ango cɛyi, ya bango aceba bango ango. 59Usya minya makokasa nanyi na hanto, bwa mwambi, bango te baya ipubɛcɛ mwana saci, ya bango abangasa ango te Zakali wa jinɔ ja hangwɛ. 60Okate nyangwɛ te akwa iyɔkɔ na isɔhɔkɔ te: «Hamama! Bebangaka ango Za.» 61Bango asɔhɔ neji te: «O bana ba ikaka jɔbɛ teka moto wa babanga na jinɔ jɛ.» 62Ya bango asime hangwɛ iyakaka nda bebangaka mwana. 63Zakali te ahimwa bango ejali na ikwɛlɛcɛ te «jinɔ jeji be Za.» Bahajɛ te bayecɛ. 64O elɔmɔ mɛnɛ yɛ, honko mwa Zakali te mwa jibwana, elemi yahundwana, na isɔhɔkɔ na iwɛcɛ Zambe kuma. 65Okate, bato bahajɛ bɔngɔ te bwabanda bananyangwɛ bango, na bajasa o mabete ma njɛnja mɔngɔ ya Zude, na itatubaka na bosina bwa beyaya byɛ. 66Bahajɛ bayokakasa byɛ byahajɛ, bakɔlɔkɔsɔ o melema myango, itemangaka na ihimwakasa te: «Wɛ mwana ejakasa na?» Usɛ tuma ya Ku wa mini yajɛ na neji.
Zakali ayemba bondonga bwa Zambe
67Ekokoyi ya Pu yalozɛ Zakali hangwɛ wa mwana, ahula isɔhɔkɔ nda ntɔci te:
68«Masomɛ Ku wamɛ, Zambe wa Izahɛli,
ya ango amuya inyamwaka lupu jeji, na ipokwaka jango.
69Okate eloma mini Yonji munɛnɛ
o buka bwa Davidi wa Nkani wa njazi mweji,
70ndango asɔhɔsɔ sondi ya ka o mehoko mya mentɔci mweji mya Pu.
71Atandasa te abiyonjɛcɛ mini na bato bahajɛ babena mini,
na banjinyɛ mini.
72Okate ahɛlɛ cɛyi eji na batata bamini,
na iyebwaka yonga eji ya Pu.
73Akanasa na Abalami wa tata wa mini te 74epokwaka mini na bato banjinyɛ mini,
na ijazaka na neji teka bɔngɔ,
75na ijaka pu na hongololo
o boho bweji minya mahajɛ ma mini ejaka o hehe.»
76Okate Zakali te asɔhɔ te: «Mwana mɛ bebangakasa ɔbɛ ntɔci mwa Zambe wa bya iko.
Usɛ ojongakasa o boho bwa Ku wa mini na iyebɛcɛ mapeyi meji,
77na ihɛlɛcɛ lupu jeji te eyɛnɛ cɛyi ya mesɛmbɛ myango,
na ipokwaka bango.
78Lema mwa Zambe wa mini mwaje na cɛyi,
elomaka njazi mweji nda moji mwa yoyi ya iko,
79na iyonjɛcɛ bato baji o epundu na baji oha ekokoyi ya ilɛlɛ,
na ilazɛcɛ mako ma mini o pɛyi ya itabu.»
80Okate mwana wɛ anɛnɛkɛsɛ na ijelaka o ekokoyi eji. «Ajakasa o masi ma bato teka pwa, ngu na buya bwango apwasa o boho bwa Izahɛli.»
Atualmente Selecionado:
Luk 1: KOQ
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES