Matəw 3
3
Anó da Jon ŋunə yə́ mə́ naʼa une
1Amaʼazənə Yeso mə́ bugə Nazared, Jon ŋunə yə́ mə́ naʼa une ŋu ungɨŋ imbayn zomo á Judeya. Yə pey ni ghayn inayn Nwiye kwi, 2#Mat 4.17; Mak 1.15“Mbən beŋe tən fiŋ wa unó iboŋ damugə anó ufon Nwiye si tinə.” 3Jon wu mə wa ŋunə, wa ukən Nwiye Azaya ghayn da uŋwen kwi, “Wa moʼ yə́ kyay ungɨŋ imbayn zomo ghayn kwi,
‘Mbən tana inji abú Asɨyisəg,
Mbən tana inji ma itəm.’”
4Mbə́ tana ndwi Jon akə inyoŋ kaməl. Yə mə tiŋe utwiy gob itin ma. Yə mə jəgə ingweme foro jəw aka. 5Ba noʼo Yerusanem, ungɨŋ usin ujum mbənə umə Judeya foro ungɨŋ usin ujum mbənə u kad ugwi Jodan iŋu abú uŋwən. 6Mbə́ mə́ pey yə́ beni unó iboŋ uma, anigə wə́ naʼ une abú úŋwən ungɨŋ ugwi Jodan.
7 #
Mat 12.34; 23.33 Asɨmə Amaʼazənə wə́ zən ba Farasay nə ba Sadusi nanaʼ umə́ zaʼa kwi u naʼa une abú úŋwən, yə́ ghayn abú úŋwən kwi, “Mbən mə jugə, amə ngwa chere ngwən kwi mbən noro ingəʼ zənə imə zaʼa? 8Mbən aghəy unó mbənə u tey kwi, mbən si beŋe itən fiŋ iwaʼ unó iboŋ. 9#Jon 8.33Ka mbən kono ngwən kwi, mbən si du angəʼ aba umugə mbən mə ghayn kwi, mbən mə buŋ aghaŋ Abraham. Ayə ghayn inen kwi, Nwiye kyay umugə inum atəy zəŋ beŋe akə buŋ aghaŋ Abraham. 10#Mat 7.19Kaba akinine, Nwiye si tana ijɨŋ wa uzad akə ighaŋ. Uyi iwa uzad ujum mbənə cha umə kuwə ma itɨŋi chuŋ i maʼ ungɨŋ uwəd. 11Ayə naʼa une inen itey kwi mbən si beŋe itən fiŋ, asɨmə wa ŋunə umə zaʼa inyi injim mede chigə ma akə aŋu. Cha adi ikoʼ aŋu ibeʼe kaba utabay ma. Uŋwən yi cha Azugə zayn zayn nibi cha uwəd igun inen.
12U yə́ nə asugə zənə amə nə itugi ikyugə, ikoro ijob ichi akaʼa ikwi. U yi fere ikwi ma cha ungɨŋ ingən si tuŋ ijob ungɨŋ uwəd nu cha umi noʼo nimə.”
Yeso num une
13Akaʼa maʼa wu, Yeso noʼ Galeli ŋu abú Jon á Jodan. Yə ŋú kwi Jon naʼa une abú uŋwen. 14Asɨmə Jon kaba ukən uŋwən ghayn kwi, “Amə ngwə koʼo inaʼ une iniŋ, ngwə si ni zaʼa kwi a naʼa une inigə?”
15Yeso ywiri abú uŋwen kwi, “Siy aməŋi nigə akinine damugə yə koʼ kwi mba aghəy unó ujum anji zənə Nwiye kabay.” Amaʼazənə yə́ ghayn nigə, Jon zəw ibeni anigə inaʼ une abú uŋwen.
16Amaʼazənə Yeso si num une, yə́ du ungɨŋ ugwi wu, aba ighara wu, azobo fiʼe anigə yə zən Azugə Nwiye amə swiʼi zaʼa ni buŋ. Yə pey yi naŋana iguni ma. 17#Mat 12.18; 17.5; Mak 1.11; Luk 9.35Igəg nayn azobo ighayn kwi, “Amə́ uŋu ŋwə̂ ŋunə a wuʼi kwaʼa ingəʼ, inyi fiŋ yə wuʼe ma nə uŋwən azəd.”
Atualmente Selecionado:
Matəw 3: NGI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2023 CABTAL