Nlb 11
11
Nduane Nti
(Dt 9:22; Yk 5:16)
1Bôt be nga kobô e menyiñ a Nti a nga wô'ô mboone te *abé. Eyoñ a wô'ôya jame te, ayaa dé e nga yôñ ane nduan. Nduan a nga lôm é nga mane di'i éfase minkan. 2Nde bôt be nga ye'elane Môze a beta miñyôn. Môze a nga ye'elane Nti, a nduan é nga dim. 3Ane be nga yôlé vôm ate na Tabéra, nalé a tinane na: Nduan ja di'i, amu vôm ate Zambe a nga di'i minkan.
Bôt ba kômbô di tit
(Sam 78:17-31; Nk 16:1-18; Yd 16)
4Môs éziñ, beyeñ be mbe Israél été be so'o mevôm mevôm, be nga jaé ne lut a nkômbane ya di tit; ja'ana bone b'Israél bebiene fe be nga beta taté nkobane menyiñ a jô na: Ngo'é nge bi bili tite ya di! 5Bia simesan e kos bi nga di zesé Ejipte, ngon, mebok, bitetam, anyon a laé. 6Eyoñe ji ngule jangan é maneya. Jôme ya di é ntoo momo, vengevenge ve mana bia di *môs ôse nyô.
7Mana a mbe ane bone mefes, éfumulu é tôñe nyôle mfô. 8Bôt be nga mialan asu ya kôane nye; be nga ko'o nye e meko'o bityé, nge tya'a nye bone mintuba. A mbe *zam anyu ane biwôlé bi ne ñyaman a mbon. 9Eyoñ mfô a ku a alu e minkan, éyoñe te fe mana a ku.
10Môze a nga wôk ane bôt ba yôn, môt ase e vôme wé, anyiine *nda éndelé. Eyoñe te ayaa Zambe e nga dañe yôñ a Môze a nga wô'ô jame te *abé. 11Nde a nga jô Nti na: Amu jé wo bo ma avale te? Amu jé wo bene liti ma mvame jôé? Amu jé wo beté ma mbe'e ya wulu e bôte bana bese e bituu' 12Sa ñhe ma me nga be'e abume ya bôte bana nge biaé be, ve ô maneya bendé na me be'e be e mo mam ane minga a nyaa nkeñelé mon, na me wulu be a kui be e si ô nga ka'a bimvame biap. 13Ma ye kooé tite ya di asu bôte bese ba yône ba a yemete na me ve be je vé' 14Me se nguleya be'e mbe'e ya bôte bana bese étam. Mbe'e te ô dañeya ma adit! 15Nge nne wo kômbô bo ma nalé, jibi'i wôé ma! Eyoñe te wo ye liti ma mvame jôé, a ma ye bo te bo ngaa ya bidime biame mamien.
16Ane Nti a nga jô Môze na: Sula'ane bôt mewômezamgbwa be so'o e be bemvendé y'Israél ba wo yeme ma be ne fo'o bemvendé a be kobô mejô a zuu be e *nda éndelé bendôba'ane, vôm ate mia be be mia ye tebe tetele. 17Ma ye sise valé a kobô wo; ma ye nyoñe ngab éziñe ya *nsisim me nga ve wo a sôé wô e be be; éyoñe te ba ye bo nguleya volô be'e wo mbe'e ya bôte ba, a wo ye bo te beta bo ésaé te étam. 18Wo ye jô bôte na: Tunane miabebien asu y'akiti a mia ye di tit, amu mia mi nga yôn e melo me Nti me wô'ô na: Za a ye ve bia tite ya di? Amu bi mbe bi nyiñe mvaé Ejipte. Nti a ye ve mia tit a mia ye di je. 19Mia ye bo te di je môse wua, mibaé, mitan, awôm nge mewôm mebaé, 20ve ngume ngon, akekui ja ye vame mia e mimbile mi môé a bo mia abume mintaé, amu mi nga biasé Nti a ne mia e zañ, a amu mi nga yône be nye a jô na: Amu jé bi nga kôlô Ejipte'
21Môze a nga semé a jô na: Bôte ba bômane ma ba be ne toyini mintete misaman, éyoñe te wo kôme jô na wo zu ve be tite ya di tañe ngume ngon! 22To'o bia wôé mintômba miañgan mise, bikela biangan bise a benya'a bangan bese, abime te da ye bo fe ve tyôtyoé! 23Ane Nti a nga yalane Môze na: Ye wo Nti wo ye bo étun? Wo ye yen éyoñe ji nge jam ma te jô wo da ye boban nge momo. #11:23 Ye ngule jam é nji bo abime da yian?
24Eyoñe te Môze a nga ke kate bôt mejô me Nti. Ane a nga sulane bôt mewôme zamgbwale ya bemvendé y'Israél a telé be mbôma'an a *nda éndelé bendôba'ane. 25Nde Nti a nga sis e nsume *nkut été a kobô Môze. Ane a nga nyoñe ngab éziñ ya *nsisim ô mbe be nye a sôé wô e be bemvendé mewôme zamgbwa. Eyoñe *nsisim ô nga sis e be be, be nga taté na ba kulu mejô, ve teke kee wô ôsu.
26Bôte bebaé môé na Eldad a Médad be nga li'i e minkan, a *nsisim ô nga sis e be be; be fe be mbe ntilan ve be nji ke e *nda éndelé; be nga taté na ba kulu mejô e minkan. 27Ane ndôman éziñ é nga mate a ke kate Môze foé a jô na: Eldad a Médad ba kulu mejô e minkan. 28Nde Yasua e mone Nun, ba'a Môze aso mongô, a nga jô na: A Môze Tate wom, bamé'é be! 29Ve Môze a nga yalane na: Ye wo bo ma éviele? Ke ma dañe yene mvaé nge ayoñe bôte Nti ese e bili fo'o ve bekulu mejô, a ngo'é nge Nti a ne sôé *nsisim e be be! 30Ane Môze a nga ke e minkan baa be bemvendé y'Israél.
31Nti a nga bo na évuñulu é vuñ; é nga soo abem mfa'a ya mañ a zuu de minkan tañe nté dulu ngume *môs mfa'a ya li, nalé fe mfa'a ya li, mbôma'an a minkan, afip tañe menyi'i me mo mebaé a kui si. 32Ngume *môs a ngum alu, a ngume *môs ôvok ô nga tôñe valé, bôt be nga kôlô si a ke ba kôan abem. Môt a nga dañe kôane tyôtyoé a nga kôane tañe betoyini bekili. Be nga yané de mbôma'ane minkan; 33Tit é ngenane be mesôñ te nyalé je, nde ayaa Nti é nga yôñ e nyôle ayoñ ese, a Nti a nga wôé bôt a beta ébubua. 34Be nga yôlé vôm ate na: Kibrôt-Atava, nalé a ne na: Mesoñe ya nkômban, amu vôm ate be nga jame bôte ya ayoñ be nga dañe bili a nkômbane ya di tit.
35Akôlô ya Kibrôt-Atava, bone b'Israél be nga ke Azérôt, e vôm be nga vule minkane miap.
Atualmente Selecionado:
Nlb 11: BDCB
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Bible en langue Bulu © L'Alliance Biblique du Cameroun, 2007, 2015.
