प्रेरित 5
5
हननिया र सफीरा
1इसे न समयाङ हननिया म्यार्मीनौ काट जना भर्मी र मेन मास्टो सफीरा लेया, होखुरीकै र लहो चेक्जा ह्या आर्ला, 2अनि होसे पैसा मेन मास्टो र मेल्हा सल्लाह जाटा र चेक्जा पैसा लाहाखाटा डा, अनि बाँकी पैसा राकार पट्ट न पैसा इडीक न हो डेयार प्रेरितकोलाक याहा। 3पत्रुसै डेया, “ए हननिया, पवित्र आत्माकी ढाँट्डीच र ह्या आर्लाच पैसा चेक्जा लाहाखाटा डाच कुरा शैतानै कुटजाट्न नाकुङ मीमनाङ काम याहा? 4होसे ह्या नाकै माआर्लाठर ही नाकुङ लहो न मालेया र? होसे आर्लारखीङ र होसे पैसा नाकुङ न अधिकाराङ मालेया र? याङ्च काम जाट्च विचार नाकुङ मीमनाङ कुटजाट्न राहा? नाकै भर्मीकोलाक मट्टै होइन तर परमेश्वरकी न ढाँट्डीमे!” 5इसे कुरा सेच बित्तिकै हननिया झाङ कुरुह्वार सीया। अनि इसे कुरा सेचको पट्ट न साह्रै बीह्रीया। 6अनि रेन्जा भर्मीको राहार होसकी कात्रोये बेह्रडीयार बाहिर आल्हार ठाका।
7सोम घण्टा न्हुइङ हननियो मास्टो र भित्री राहा। होसकी मेन लेन्जा ही छाना डेच बारेयाङ हीर थाहा मालेया। 8होटबाटै पत्रुसै होसकी गीना, “ङाकी डेनी, नाखुरीकै ह्या होडीकाङ न आर्लाच हो?” होचे डेया, “होडीकाङ न हो।” 9तर पत्रुसै होसकी डेया, “नाखुरीक प्रभुओ आत्माकी ढाट्डीकी कुटजाट्न नीस जनौ विचार काट न छाना? ङोस्नी, नाकुङ लेन्जाकी ठाकार राछ भर्मीको गालामटुआङ मट्टै टाह्रामने। होखुरीकै नाकोकी र होटजाट्न न बुवार ठाक्की आल्हे।” 10इसे कुरा सेच बित्तिकै होसे र पत्रुसौ मीकु छीनी कुरुह्वार सीया। होटै होसे रेन्जा भर्मीको भित्री राहार होसकी सीम भ्याच डाङार बाहिर बुवार आल्हा र मेन लेन्जा छीनी न ठाका। 11होटै मण्डलीयुङ पट्ट भर्मीको र इसे घटनौ बारेयाङ सेच पट्ट न साप्फी बीह्रीया।
अचम्मौ कामको र चिन्हको
12प्रेरितको लकीङ अचम्मौ कामको र चिन्हको भर्मीकुङ मीघ्याङ वास्टै छान्की ठाला। अनि विश्वास जाट्च पट्ट न परमेश्वरौ मन्दिरौ सोलोमनौ दलानाङ घरि न घरि भेला छानन्या। 13अरु भर्मीको बीह्रीयार होखुरीकखाटा खाट्की राछ आँट सुयेर जाट्की माह्योक्न्या तर भर्मीकै होखुरीककी आदर चहिँ साप्फी जाट्नन्या। 14अनि प्रभुकी विश्वास जाट्चै लेन्जा मास्टोकुङ भीड होखुरीकुङ समुहाङ ठप्डीस्की ठाला। 15अगाडि ही-ही घटना छाना होच्यो कारणै भर्मीकै लामाङ छाचकोलाक राकार डामन्या। हीजैडेनाङ पत्रुस रान्हाङ होच्यो छाया मट्टै लेनाङ र छाचको मीटाक पर्ख्यो डेम ओछ्यानकोखाटा न होखुरीककी मीसाक्ङ डामन्या। 16यरूशलेम वार्लाक-पार्लाकुङ लाङ्घा लकीङ र वास्टै भर्मीकै छाचको र दुष्टआत्मै दु:ख याछकोलाक लार राम्हन्या अनि होखुरीक पट्ट न गेप्मन्या।
प्रेरितकोलाक सतावट राछ
17प्रधान पूजाहारी र होसेखाटा लेच अरु सदुकीको पट्ट न मीरीसै प्रेरितकुङ विरुद्धाङ सोवा। 18अनि होखुरीकै प्रेरितकोलाक घोवार झ्यालानाङ का। 19तर प्रभुओ काट स्वर्गदूतै नाबीक झ्यालखानौ गालामको फोम याहा र होखुरीककी बाहिर राकार डेया, 20“नुङ्नी र परमेश्वरौ मन्दिराङ खडा छानार इसे नयाँ जीवनौ पट्ट न खबर भर्मीकोलाक सेटाक्नी।” 21इसे कुरा सेरखीङ होखुरीक कागोराक न परमेश्वरौ मन्दिराङ नुङार भर्मीकोलाक शिक्षा याखी ठाला।
प्रधान पूजाहारी र होसेखाटा लेचको राहार इस्राएलीकुङ पट्ट न अगुवाकोलाक महासभाङ आर्घा होटै प्रेरितकोलाक झ्यालखानीङ राक्की डेयार भर्मीकोलाक बीर्न्हका। 22तर सिपाहीकै होखुरीककी झ्यालखानाङ माडुपार ल्हेस्न राहार इसे खबर याहा, 23“कानै झ्यालखानाङ सेम्हजा साँचा काच र पाल्याको गालामकोवाङ टोङ्ह ङुच न डाङा तर कानै गालाम फोवार भित्री ङोस्नाङ सुकीर माडुपा।” 24होटै परमेश्वरौ मन्दिरुङ सिपाहीकुङ कप्तान र मुख्य पूजाहारीकै इसे खबर सेया अनि इसे पट्ट अब ही छान्ने औला डेम होखुरीक प्रेरितकुङ बारेयाङ अलमल्लाङ पर्या। 25तर होडीक न बेला काट जना भर्मी राहार होखुरीककी डेया, “सेनी! नाखुरीकै कुसे भर्मीकोलाक झ्यालखानाङ डामन्या होखुरीक च मन्दिराङ खडा छानार भर्मीकोलाक शिक्षा याम्हन ले।” 26इसे कुरा सेरखीङ कप्तान र सिपाहीको प्रेरितकोलाक लाकी नुङा र जबरजस्ती माजाट्न न राका हीजैडेनाङ भर्मीकै होखुरीककी ल्हुङै ङापार आसाटै डेम होखुरीक बीह्रीया।
27प्रेरितकोलाक महासभौ म्याहासाङ होखुरीकै टोङ्हाका अनि प्रधान पूजाहारीये होखुरीककी गीना, 28“कानै नाखुरीककी इसे म्यार्मीनाङ हीर शिक्षा माह्याखी डेम कडा आज्ञा याम्हन्या तर नाखुरीकै च लहो शिक्षै पट्ट यरूशलेम न्हेपाक्ङ भ्या। अझै होसे येशूकी साट्च दोष कान मीटाक लैडीकी पाले।”
29पत्रुस र अरु प्रेरितकै डेया, “कानै भर्मीकुङ होइन तर परमेश्वरौ आज्ञा मन्डीकी न पर्ले। 30कानुङ बोइ बाज्युकुङ परमेश्वरै येशूकी सीच लकीङ जीवाटाका, होसकोकी नाखुरीकै क्रूसाङ टङ्गडीयार साट्नन्या। 31परमेश्वरै इस्राएलीकोलाक पश्चात्ताप जाट्ख्यो र होखुरीकै पाप लकीङ क्षमा डुप्ख्यो डेम येशूकी मुक्ति याछ राजा खासार लहो डोरमीहुट पट्टी डा। 32इसे पट्ट न कुराकुङ कान र पवित्र आत्मा साक्षी ले। अनि होटजाट्न न परमेश्वरै लहो आज्ञा मन्डीचकोलाक पवित्र आत्मा याम्हने।”
33जब होखुरीकै इसे कुरा सेया अनि होखुरीक साप्फी मीरीस ख्योहा र प्रेरितकोलाक साट्की निधो जाटा। 34तर धर्मगुरु र भर्मीकै आदर जाट्च गमलिएल म्यार्मीन लेच फरिसीये महासभाङ सोवार प्रेरितकोलाक काटछीन बाहिर नुङ्की लैडीया। 35होटै होचे महासभाङ लेच भर्मीकोलाक डेया, “ए इस्राएलीको, इसे भर्मीकोलाक नाखुरीकै ही जाट्की पामने, होशियार छान्नी। 36हीर समय अघि काट जना थुदास डेच भर्मी लाहाकी ङा बाड्को हो डेम राहा। बुलीसय टडीक भर्मीको होच्यो न्हुङ-न्हुङ ह्वा तर होसे भर्मीकी साटा र होसे पट्ट न भर्मीको छरपष्ट छानार ही न ही छाना। 37होटै न्हुइङ इसे भर्मी न्हुइङ जनगणनौ समयाङ गालीलुङ यहूदा डेच काट भर्मी राहा। होचे वास्टै भर्मीकोलाक लाहा पट्टी पार्या, तर होसकी र साटा होटै होसे पट्टी नुङ्च भर्मीको पट्ट न छरपष्ट छाना। 38होटबाटै इसे मामिलाङ ङा नाखुरीककी डेले, इसे भर्मीको लकीङ लोस ङुनी र इखुरीककी डास्न यान्ही, हीजैडेनाङ इखुरीकुङ योजना र काम भर्मीको लकीङ हो लेसा डेनाङ होसे मेल्हा न म्हाटार नुङ्ले। 39तर इसे परमेश्वर लकीङ न हो लेसा डेनाङ नाखुरीकै इसकी रोकडीकी माह्योक्ले। नभा च नाखुरीक परमेश्वरौ विरुद्धाङ सोच छान्ने।”
40महासभाङ लेच भर्मीकै गमलिएलौ सल्लाह मन्डीया। अनि होखुरीकै प्रेरितकोलाक भित्री आर्घा र होखुरीककी डुङ्की सिपाहीकोलाक लैडीया र “अब येशूओ म्यार्मीनाङ नाखुरीकै हीर मापाहाक्की” डेम कडा आज्ञा याहार होखुरीककी डास्न याहा। 41प्रेरितको महासभालकीङ आनन्द मन्डीचै बाहिर ख्योहा, “परमेश्वरै कानकी येशूओ म्यार्मीनाङ दु:ख र अपमान सहडीकी ह्योक्च खास्नने” डेयार होखुरीक आनन्द छाना। 42होटै होखुरीकै दिन-दिनै परमेश्वरौ मन्दिराङ र इम-इमाङ नुङार येशू मुक्ति याछ ख्रीष्ट हो डेयार पाहाक्की र सेछ समाचार सेटाक्की माडासा।
© 2025 by Mother Tongue Translators Society and Wycliffe Bible Translators, Inc.