2 Timoteo 2
2
O bo soldado de Cristo
1Polo tanto, ti, meu fillo, faite forte coa graza que hai en Cristo Xesús. 2E todo o que me escoitaches en presenza de tanta xente, propónllelo ti a homes de confianza que sexan capaces de llelo ensinaren a outros.
3Comparte os meus traballos coma un bo soldado de Cristo Xesús. 4Ningún soldado en activo se deixa enguedellar nos negocios da vida, se quere compracer ó que o alistou. 5E a ningún atleta lle dan o premio se non compite conforme ás regras atléticas. 6Pero o labrego que traballa é o primeiro que ten dereito a participar dos froitos. 7Entende ben o que che digo, pois o Señor hache dar entendemento en todo.
8Lémbrate de Xesús Cristo, resucitado dos mortos, da semente de David. Este é o meu Evanxeo, 9polo que padezo ata estar preso coma un vulgar criminal. Pero a palabra de Deus non está encadeada. 10Por iso soporto todas as cousas por mor dos escolleitos, para que tamén a eles lles toque en sorte a salvación que vén de Cristo Xesús, coa gloria eterna. 11Esta é unha gran verdade:
Se morremos con el, tamén viviremos con el.
12Se padecemos con el, tamén reinaremos con el.
Se renegamos del, tamén el renegará de nós.
13Pero se fallamos na fe, el permanece fiel,
porque non pode renegar de si mesmo.
Gardarse dos falsos mestres
14Failles diario o acordo disto, amoestándoos diante de Deus, para que non discutan sobre palabras: que iso non vale para nada máis que para botar a perder ós que escoitan. 15Esfórzate por presentarte grato a Deus: coma un traballador que non ten de que se avergonzar, xa que reparte a palabra da verdade. 16Evita leriar en van; os que se deixan levar van sempre a máis na impiedade. 17As súas palabras son coma a gangrena. Destes son Himeneo e Fíleto, 18que se extraviaron da verdade, dicindo que a resurrección xa aconteceu, e botaron a perder a fe dalgúns.
19Con todo, os cimentos sólidos de Deus mantéñense rexos, e teñen o selo seguinte: O Señor coñece ós que son del; e: "afástese da inxustiza todo o que invoca o nome do Señor".
20Nunha casa grande non hai soamente vaixelas de ouro e de prata, hainas tamén de madeira e de barro; e unhas son para uso nobre e outras para uso menos nobre. 21Polo tanto, se un se limpa destas cousas, será un utensilio honorable, santificado, útil para o dono, axeitado para todo uso bo.
22Fuxe das paixóns da mocidade e procura a xustiza, a fe, o amor e a paz con tódolos que invocan o Señor cun corazón limpo. 23Evita as discusións parvas e as controversias testalanas, que xa sabes que xeran loitas: 24en quen serve ó Señor non di ben a contenda, senón o ser manso con todos, hábil para o ensino, tolerante; 25con moito xeito para educar os que sosteñen doutrinas contrarias: quizais lles dea Deus a conversión para o coñecemento da verdade, 26e para se desenguedellaren das trapelas de Satán, que os ten apreixados vivos para que lle fagan o que el quere.
Atualmente Selecionado:
2 Timoteo 2: ABGS
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Dereitos reservados: SEPT