PANGERANGU 16
16
1Peku-mana la pa-pakaka hahangu na tau,
tàka i Ala na ma-wuangu botangu.
2Nimbihu-na na pawunda tau talànga wanguna nahàmu la pakaka wikina,
tàka i MIRI duna na-mahukutu-ya na pawuku etina.
3Huharu-nya lai MIRI mbuu ndàbada da pakakangu-mu,
napa ungalangu-ma pa-palaku-ha.
4Mbuu ndàba-daka da pawunda-na i MIRI, ninguma ngia pa-orangu-na;
tàka na ngia pa-orangu nduma tau àkatu jiaya na tàlaru.
5Mbuu ndàbana na tau ngànjangu na-karaü-nya eti paraïna i MIRI;
nda napuli-anja pa-pahàla welingu la hukungu.
6Na tau na ma-tuturu-nya i Ala na-ngalangu paaïngu;
na tau ma-mangàdatu-nya i MIRI na-hinggilu welingu la ma-akatu mbuu ndàbana.
7Jàka mu-pambaha etiya i MIRI,
na-panjadi-ha angumu da muhu-muka.
8Narihi-pa pahàmu ba ngalangu hawutu wàngu matànji,
welingu ba ngalangu madangu wàngu pa-lapingu.
9Na-ngalangu-ma pa-pakaka hahangu na tau,
tàka i Ala duna na mauli-nya na ànda lurina.
10Na maràmba na-ngalangu kuaha-na welingu lai Ala,
jia ba tuna, hi nda nanjala-a la botangu-na.
11Na pambuha-na i MIRI ka natànji na tau la danggangu-na,
dàngumbu la pakina hukutu dàngu timbangu.
12La ma-kuaha, na ngera wunda ma-akatu ma-iraku-ya,
nadu na pareta-na hi na-undungu ruku matànji-a.
13Na lii kaloka ma-tubangu na-pambaha eti ma-katangu kuaha,
na tau na ma-patànjingu la kareuku-na nambuha-nya.
14Na mbenina na maràmba beri lii hukungu metiya;
na tau ma-manggàna nahimbu-nya wihu ka pa-wadaru-ya.
15Na hàmu etina na maràmba na-patàkangu luri mambiru,
beri hamana na karumangu ma-papurungu urangu la wula wàndu.
16Ba ngalanya na manggàna kanjupu rihi hàmu-mayapa welingu ba ngalangu àmahu rara;
na ngalanya na papingu wàngu narihi pa-wilingu-pa welingu ba ngalangu àmahu bara.
17Na tau hàmu na-wiliru-nya na ma-akatu;
na tau na maeti wànya na huri lurina, opangu-nanya wikina.
18Na ngànjangu pa-taweharu wànguya;
na abungu pa-tanyungguru wànguya.
19Narihi-pa pahàmu ka karàda eti dàngu ka nda ningukai banda malanja,
welingu ba tundunja da tau ngànjangu dàngu ba luri wànja da banda malanja parambangu-da.
20Eti wànyawa jàka nggàraya na lii papekangu lai nyumu, napa mungala-nya na mahàmu.
Pawaiwa lai MIRI, napa mungala-nya na pa-ohangu.
21Na tau manggàna patanda-ya la kanandingu-na na ma-dàkatu;
na huri kareuku-na na ma-payila eti, na pawiti-nya napawai wànya na papanii-na.
22Na manggàna jia na pingi pola luri pa-ohangu-na na tau paeti;
na tau nduba na-pa-mayila-ya nduba wikina.
23Na kanandingu tau paeti na-pawiti-nya na kareuku manggàna-na,
tàka hi hama huka waiya na lii papekangu-na.
24Na kareuku ma-minangu beri manggaluangu-ya;
nalàngga ba pàdanya dàngu na-pahayandalu tàda ihi.
25Ningu ànda na matànji ba itaya,
tàka na hupu njàpuna na ànda nuna na-hanggangu la meti.
26Na rinjungu la pangangu jiaya na mawànda-ya na tau la pa-pamukarungu;
mulana na kambuna lupangu naràma lerangu.
27Na tau akatu nahimbu wihu ka pa-hanggàmaru anguna patau;
na kareuku-na na-akatu hama epi pa-lawarangu-ya.
28Na tau kaleka eti na-patumbu-ya na pa-lumungu;
na mapawau tamu anguna na-pahewangu ma-pakandua nditakungu.
29Na tau mbana eti na-panyonga-ha da anguna,
hi nairu ngàndiha la hanggàmaru.
30Murima-nya na tau na mariki miri dàngu na ma-pakamàdikungu mata,
nu pakakangu-nanya ma-akatu la etina.
31Na tau tànji pa-wuangu malai luriya;
da uwangu-na beri tubuku ma-kalilangu-ha.
32Na manda rengga mbeni nahàmu-pa welingu ba katangu kuaha;
na roputu wiki narihi hàmupa welingu ba bera paraingu.
33La papi wàngu ura, natungu undi na tau,
tàka na matunya hemana jiaya i MIRI wikima-a duna.
@LAI 1995 Indonesian Bible Society (Lembaga Alkitab Indonesia)