Isaías 50
50
1Dawan yulwi:
“¡Manna kukulwinih, yang Israel yakat dutni kaltalnayang, manna nanangmana kidika,
sihm al as yalni kau dutni talwa kapat,
kidika awaskat warau kapat wauhtik manabakannayang,
kat tras dutayang dai bahang!
Manna manawauhwi bakakanna kat dutni yamnamana dai bahang;
manna nanangmana Israel yakat dutni talna dai,
kat manna kidika kulnamna dutni dai bahang.
2¿Amput dawak yang aiwanayang kat muih as bik kalpaktasyang daih?
¿Amput dawak yang yulting muih as bik nangkitlawas daih?
¿Kukulna dai katpah, yang adika sip-awasyang laihtik yakna atnik?
Kuma buhlaknin kidika yang yulki kau manah buhlawarang ki;
was murwa balna kidika bik sihm kauhmak wanilang kalna atnin,
dawak waspadini balna kidika dauwi dutlana atnin was dis bahang.
3Yang lawik makau kisang kidika asnina sani manah ātayang,
dawak muktayang kulnin bukna asnina kau.”
Dawan dini yamyang kidika wauhnin balna pasyakat rahm kulnin āwi duwi
4Dawan yaklauwi yasumalna,
disuhna balna yakat walanina āna atnin yul parasni duwa kidika kau.
Mapiris bitik yakat yayamwak kidika yakat dakayang limahni.
5Dawan yaklauwi amanglanin kidika yana,
dawakat yang witing nining yakat lawasyang,
kaput bik dangbuh datasyang witing yakat.
6Yang dangki kalanayang kaunah kidika laih yawisnin yulni,
kaput bik laih dating kungkibas bik dakna.
Dutni yayuyulwa kidika dawak susuih yatutuhwa kidika
yang muhki wirlawasyang dai pa ūk yakat.#Mt 26:67; Mk 14:65.
7Dawan kuduh yaklauwi ilp yawa kidika:
kidika bahang dutni yayuyulwa kidika dalani yawas ki;
kidika bahang barangni sakyang sihm kidara kapat,
yang amanglatayang nikingkakaras karang ki.
8Yang yaihkit yakat sakki nakitdakyang kidika:
¿Muih as yang niking kauh yaklaunin sakyah?
¡Wihta nining yakat albupak mawang!
¿Muih as witing rahmni duwa kulwih yang yulki yakwi yulna atnin?
¡Kaiwi yang akat yayulwang!
9Dawan kuduh yang ilpki yamwa kidika;
¿wais sipyah dutni yakat yaruhmnin?
Yang kau dutni yakukulwa balna bitik dislalawarang
sihm asna as banibil kaswa kapat.#Rom 8:33-34.
10Manna Dawan yakat ayangni nuhni yamtamana
kidika witing dini yamyang yulwa kidika dakanauh:
manna puksani yakat yaringni as bik dis pasyakat lapaktamana kidika,
Dawan yakat yamni kultanauh,
dawak Papang yakat laihtanauh.
11Kaunah angdika muihni balna kuh biwi dadahlwa balna bitik
dawak sibang sutni yakat dadahlwi ridi yayamwa balna kidika laih
sihm kidika kuhni yakat bubukna karang,
manna silp lawa sibang sutni yakat dahlnamana dai kidika.
Dawan yaklauwi adika wahni sihna karang,
daihni buswa pasyakat alangwanama.
Atualmente Selecionado:
Isaías 50: SUMU
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Biblia Sumo
Texto © Sociedad Bíblica de Nicaragua 1998
