Yohanes 2
2
Um pésta kawéng witi Kana
1Im witu un endo katelu, witi Kana um witi Galilea ém wéwéhan pésta kawéng wo si ina' ni Yesus ém witu. 2Si Yesus wo sé pahtuzu'en-Na kangkasii éng kinua i mangé witi pésta kawéng itii. 3I nimaapumoma un anggor, ang kumuala si ina' ni Yesus wia ni Sia, “Ni séra éng kinaapuanola anggor.”
4A si Yesus mingkotla, “Ma', kaa ko kimuamé téntu wia ni Aku? Zéi'kampé' orasna ni Aku mapata'u séi ni Aku.”
5Taan si ina' ni Yesus éng kimuama wia sé menenelewir, “Wangunela apa un ikua-Namé wia ni kamu.”
6Im witu ém wéwéhan enem tampayang u niimek im penanahu'an zano pememeresi#2:6 Un zano kenu ém pahpakén né tou Yahudi i meresi un tou néra wo a pemamakén néra mengiit ang kinanaram a méipahtuzu'ma né nimaopo néra. mengiit ung kinanaram né tou Yahudi. Witu u sana tampayang én toro tahu'an zano woo waluna pulu' kaapa sana atus wo zuana pulu' liter. 7Si Yesus kimuama wia sé menenelewir itii, “Tahu'ala zano makaz mawuta an tampayang itii.” An tahu'an nérala zano makaz mawuta an tampayang itii. 8Tumondong niitu, si Yesus kumuala wia ni séra, “Tarékan sahapané wo pahalina wia si mahime-imek um pésta.” Am pahali nérama un zano itii wia ni sia. 9Am pé'anala ni mahime-imek um pésta itii un zano nimaéndomo anggor itii, zéi'kan kata'uanna wisa a méyé un anggor itii, taan sé menenelewir, sé simahapé un zano itii é mata'u. An tawahennamé si brédégom, 10ang kumua wia ni sia, “Péléng sé tou é méhépé'mé un anggor wangun wo sa sé tou teweleno, taré iondolé un anggor zéi'kan tahlous wangun. Taan ni ko, limé'os un anggor totoz wangun makaz in tarékan.”
11Niitumo u makakompo'en winangun ni Yesus kataré-taré witi Kana um witi Galilea, karia in téntu ni Sia nimapaileko ung kawangko'an-Na wo sé pahtuzu'en-Na ma'éman ni Sia.
12 #
Mat. 4:13 Kumawusa niitu si Yesus nimangé witi Kapernaum karia ni ina'-Na wo sé katuari-Na wo sé pahtuzu'en-Na. Ni séra é nimento' witu woopirana endo uman.
Si Yesus limenas um Walé ni Opo Empung
(Mat. 21:12-13; Mrk. 11:15-17; Luk. 19:45-46)
13 #
Kel. 12:1-27
I melelezoma un endo mahpésta um pahkuan Paskah né tou Yahudi, si Yesus nimangé witi Yerusalem. 14Im witi lésaz um Walé ni Opo Empung, si Yesus nimilek im witu é lakez sé mahwangkér sapi, domba wo bombo, wo wéwéhan kasii sé menanawel an zoit rimumez witu. 15A Sia méndomé tali am wangunen-Nama sabok, an iwoho-Nama péléng sé tou witu karia péléng sé domba wo sé sapi, an zoit né menanawel zoit é méisera-Nama witu un tana' wo a méja néra é méitonga'-Nama. 16Im wia sé mahwangkér sé bombo ni Sia éng kimua, “Pakaéndona péléng ang kenu im wia'i, tia' kamu mangun um Walé ni Ama'-Ku maéndo pemamangkéran.”
17 #
Mzm. 69:10
Ang kagenangala né pahtuzu'en ni Yesus u méipantik witu um Pinantik Lenas, “U raraatéang-Ku witu um Walé-Mu, o Opo Empung, nimangun un até-Ku wuaya tanumokan un api i mahlayas.”
18Sé tonaas né tou Yahudi é mahsaru si Yesus, ni séra mahkua, “Apa u makakompo'en un toro ipapailek-Mumé wia ni kai i mapailek ni Ko ém wéwéhan kawasa i mangun péléng niia?”
19Kuan ni Yesus wia ni séra, “Kemuna um Walé ni Opo Empung kenu wo wanguneng-Ku mokan sumaup witu un teluna endo.”
20Ang kuan né tonaas né tou Yahudi wia ni Sia, “Epatna pulu' wo enemna ta'un sé tou i nimangun um Walé ni Opo Empung kenu, wo ni Ko é mangun niitu teluna endo uman?”
21Taan um Walé ni Opo Empung um pahza'i-Nala én awak-Na in esa. 22Niitumo, kumawusa si Yesus i méitoumé sumaup ni Opo Empung im wia sé nimaté, sé pahtuzu'en-Na é méikagenanga i niitu é méikua-Namola wo ni séra kangkasii é nima'éman um Pinantik Lenas wo wana a méikua ni Yesus.
Si Yesus é mata'u péléng sé tou
23I si Yesus witi Yerusalem i lumé'os un endo mahpésta né tou Yahudi um pahkuan Paskah, lakez sé tou ma'éman ni Sia pahpaan ni séra é nimileko a makakompo'en am winangun-Na. 24Taan ni séra én zéi'kan pa'émanen ni Yesus, pahpaan péléng sé tou éng kata'uan-Na. 25Niitumo, sé tou én zéi'kan totoz kumua wia ni Sia tumoro péléng sé tou, pahpaan kata'uan-Namo am witu un até né tou.
Atualmente Selecionado:
Yohanes 2: LAITOM
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login