Wahyu 16
16
Sé pitu kawangkuran
1Kekawus in itu, palinganku en suara taangko' an untep im Balé Le'nas si makua a sé pitu malaékat, “Mangéo wo tuaso ang kayo'baan sé an untep é pitu paelepan kae'bowan i Amang Kasuruan!”
2 #
Kel. 9:10 Wo si malaékat kataré mangé wo ituasna sé an untep im paelepanna itu ang kayo'baan. Wo pakasa é tou sé awéan tuus i binatang itu wo makuru en sumiri' asi patongna, linemboan ing kupes léwo' wo kaindéén keli.
3Kekawus in itu, ituas i malaékat karua sé an untep im paelepanna itu an ta'sic. Wo en dano in ta'sic mamuali enda' tanuoka in enda' é tou imatéo. Wo pakasa sé menonou an ta'sic ka'i makapaté-paté.
4 #
Kel. 7:17-21; Mzm. 78:44 Wo ituas i malaékat katelu sé an untep im paelepanna itu am pakasa in doyongan wo am pakasa im palemboian in dano, wo pakasa en dano mamuali enda'. 5Wo kalingaanku si malaékat makakawasa an dano itu kumua,
“Icoo si le'nas,
si awéano indior, wo ka'i awéan akar intarépé'.
Ico si ra'ica marapit,
ampa'paan Ico imééo in ukuman anio'.
6Ampa'paan sé tou le'nas wo ka'i sé nabi pinatéo éra.
Winéan-Muo enda' en elepen éra.
En ukuman ituo em patus teriman éra.”
7Wo kalingaanku awéan suara asi pawetaan i raragés makua,
“O Kasuruan, Amang Kasuruan Si Makakawasa.
En ukuman si aiwéé-Mu
wutul wo ra'ica marapit!”
8Kekawus in itu ituas i malaékat kaepat sé an untep im paelepanna itu a si yéndo. Wo si yéndo winéan kawasa en rumengis sé tou ang karapi im paso'na si ra'io icakua. 9Sé tou rinengis im paso' in api si ra'io icakua, akar ojaten éra e ngaran i Amang Kasuruan si makakawasa ing kawangkuran-kawangkuran itu. Wo séra ra'ica mape'dis wo ka'i ra'ica rumayo wo sumiri' Sia.
10 #
Kel. 10:21 Kekawus in itu ituas i malaékat kalima sé an untep im paelepanna itu am palukutan pasiri-siriin i binatang itu wo eng kakolanoanna mariréimbéng, akar séra kumarét in lila' éra ampa'paan menanang i me'nget. 11Wo ojaten éra si Amang Kasuruan an sorga ampa'paan séra menanang i me'nget wo ampa'paano ing kupe-kupes éra, taan séra ra'ica mape'dis am pengéma- ngémaan éra.
12 #
Yes. 11:15 Wo ituas ka'i i malaékat kaenem sé an untep im paelepanna itu an doyongan wangker makangaran Efrat, wo en dano in doyongan itu mapera akar tu'tulo en lalan é kolano sé mai a micona owo. 13Wo kaséréanku awéan telu roh léwo' tanuoka kesol. Sé telu roh léwo' itu, si esa kumesot am ba'ba' i naga, si esa kumesot am ba'ba' i binatang, si esa ka'i cumesot am ba'ba' i nabi ra'ica wutul. 14Séra ituo sé roh é sétang sé mengaéma' in tuu-tuus kakaya'kaan. Wo séra mangé meta'up asé im pakasa é kolano am pakasa ing kayo'baan wo lumi'us iséra e mangé merang asi endo si Amang Kasuruan si Makakawasa makim sé tou.
15 #
Mat. 24:43-44; Luk. 12:39-40; Why. 3:3 Icua i Casuruan “Séréno, Yaku maai oka tanu rombit. Pakakamangen sé tou sé tumu'tulo ing katouanna, sia itu puté wo sé tou en tumu'tulo ing karaina wosama' sia ra'ica malawi' kaséréan é tou sa sia metangkol.” 16#2Raj. 23:29; Za. 12:11 Wo li'usen é telu roh léwo' itu sé kolano an esa tampa, en tampa itu a nunuwu' é Ibrani patuulen Harmagedon.
17Kekawus in itu tuas i malaékat kapitu sé an untep im paelepanna an langit, wo kalingaan en suara taangko' am palukutan pasiri-siriin owo si am Balé Le'nas, makua in tana'i “Kumawuso waya.” 18#Why. 8:5, 11:13, 19 Kekawus in itu kumilato mai pakiiten in téngéna in erut si melio-liondong, ang karapi im pangéro' repet. Wo en anio' ra'ipé' sumangkum ako mamuali ang kayo'baan tumo'tolke' mai sé tou niéma' i Amang Kasuruan. Em pangéro' anioo si repet keli. 19#Yes. 51:17 Wo eng kota wangker itu maweté' mapetelu, wo kai sé kota-kota é bangsa walina sé ra'ica makatuus si Amang Kasuruan makateri-teri waya. Wo kata'néiano i Amang Kasuruan eng kota Babel wangker itu wo émaan-Na eng kota itu melep in anggor am paelepan si wuta ing kae'bowan-Na. 20#Why. 6:14 Wo pakasa em pulou icatala, wo eng kuntu-kuntung ka'i ra'io wana eng kaséréanai. 21#Kel. 9:23; Why. 11:19 Wo awéan uran éis sela an langit owo marongkorai a sé tou. Esa éis eng kauterna lima ngapulu' kilo. Wo ojaten é tou e ngaran i Amang Kasuruan ampa'paan ing kawangkuran wangko' itu.
Atualmente Selecionado:
Wahyu 16: TNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
En Taar Weru a nunuwu' é Tontemboan @ LAI 2018
