2 Korintus 3
3
Sé maselewir im perjanjian weru
1Paweroten iow réén kami marayo in owak ami ka'i? Ra'ica taniitu em paémaan ami. Awéan piraan tou maperlu in surat kaloasan e mangé ituru' ai camu, kuma'pa surat aipatic iow paalin angé an tampa walina. Taan icami ra'ica maperlu sé surat tanu siitu. 2Icamuo in esa en surat kaloasan ami sé ipatic an untep in até ami wo sé ro'na kakailekan wo kabacaan é pakasa in tou. 3#Kel. 24:12; Yer. 31:33; Yeh. 11:19, 36:26 Séra in esa oka en suméré sapaoka icamu tanu surat i Kristus si a itoké paalin ami. Wo en surat itu ra'ica aipatic in tinta, taan ang karapi i Roh i Amang Kasuruan si menonou; ra'ica ka'i am bawo im batu papatican taan an untep in até é tou.
4Icua ami en andumoro' in owak ami tanu siitu ampa'paan icami maéman a si Amang Kasuruan wo em pakasa in itu mamuali ampa'paan i Kristus. 5Kami ra'ica wana alasan eng kumua sapaoka kawooan ami méma' in tawoien anio', taan si Amang Kasuruan i méé mai icami makawoo. 6#Yer. 31:31 Siao e méma' icami makawoo imamuali maselewir sé makua in esa perjanjian weru a sé tou. Em perjanjian itu ra'ica an ukum sé aipatico indior, taan asi Roh i Amang Kasuruan owo. Ampa'paan en ukum aipatic itu sa ra'ica kiiten, makawali am papaté, taan e Roh i Amang Kasuruan mawéé ing katouan.
7 #
Kel. 34:29 An tutuw em perjanjian uré si makawali am papaté itu aipatic am batu maké im pupulat, en sendot i Amang Kasuruan menéla-nélang an amo i Musa. En télangna itu masendot keli wo kala'meren oka mai akar sé tou Israel ra'ica makawoo suméré in amo i Musa, mandé ka'i en sendot an amona itu meka'pu-ka'puo en télangna. Anaé, sa en perjanjian uré si makawali am papaté itu nisahkan ang karapi in sendot tuméla-télang an amo i Musa, 8wopé' taré en perjanjian weru si aiwéé i Roh i Amang Kasuruan, tantu nisahkan ka'i ang karapi in sendot si lumébé mai en télang asi télang an amo i Musa. 9Sa en perjanjian uré imukum sé tou itu taniitu eng kasendotna, tantu eng kasendot im perjanjian weru lébé sendotai si méma' sé tou mamuali wutul an dior i Amang Kasuruan. 10Ro'na icuata sapaoka eng kasendotan indior, ra'io talos sendot ampa'paan ing kasendotan intarépé'. 11Wo sé itumang itu asalo ang karoro'anke' imasendot, taan sé akar ing kauré-uré tantu ulit-ulit lébé sendot.
12Ampa'paan kami makaanu in arapan tanu siitu, kami ra'ica maindé' en tumindak. 13#Kel. 34:33-35 Icami ra'ica tanu si Musa, si makatutuw ing kaéng an amona wosama' sé tou Israel ra'ica suméré in sendot si mape'delo itu. 14Indior sé tou Israel, em pakawerot éra kinatutuwano. Wo akar asi endo anio' em pakawerot éra kinatutuwané', ra'ica kaangéan éra sa maca ing kitap-kitap andumoro' im taar uré itu. Icita ro'na kumua sapaoka em bewerot éra pakatutuwané' ing kaéng. Eng kaéng itu ro'na imawuka' an tutuw éra maéman a si Kristus. 15Tantu ka'i akar intarépé', sa séra maca ing kitap- kitap si aipatic i Musa, awéan en tumutuw in até éra akar ra'ica kaangéan éra sapa sé binaca itu. En itu meputé wo ing kaéng itumutuw in amo éra. 16Taan sa awéan sé mai an dior i Casuruan, tantu em bewerot éra si kinatutuwan itu imawuka. En itu meputé wo ing kaéng icaangkai an amo éra. 17Si Casuruan ituo e Roh. Wo am bisa en awéan Roh i Casuruan, am bitu ka'i awéan kaloasan. 18Intarépé' en amota im baya ra'io pakatutuwan ing kaéng wo icita masendot in télang i Casuruan. Wo ampa'paano in itu icita peroba-roban mamuali tanu Sia, menguré-uré icita makatélango. Eng katélang itu asi Casuruan owo, Siao e Roh.
Atualmente Selecionado:
2 Korintus 3: TNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
En Taar Weru a nunuwu' é Tontemboan @ LAI 2018