ZƐKARIA 7
7
AGWANGWAMA Peni Ezumi na Shɛ Shɛ a Na Tɛcara Tụwụma
1Ti ga Darius yɛ tugwama, yaa namɛ shiywa shi neshi, nazhɛ AGWANGWAMA jɛmɛ n-ndumwa ne mi, Gamba gɛ Zɛkaria, tu upiana ucinjishi na ɛɛ hiɛŋ kislɛv#7:1 Kislɛv: Ubwa shɛ Bicinjishi be Ehibru, bu namɛ na ashashɛ November ni December nu utakada upiana wo Oyibwo. Ubwa du shɛ Bicinjishi ba Abassa. namɛ ijitɛ ineshi, bɛɛ hiɛŋ.
2Atwa Bɛtɛl tumwanɛ Sharɛza, nɛ Rɛgɛm-mɛlɛk keeni etwenyi aba maa a tabwa AGWANGWAMA, maa mapana aŋ iwɛ; 3maa e unseni onongbo umwono wa AGWANGWAMA na Hwuri Kpaaŋ, keeni egesere, maa, Ta uranga suu ụkwụla-tuta keeni ezumi tɛnda nu upiana butana#7:3 upiana butana: Ubwa Ehibru ɛ hiɛŋ Ab, ubwa shɛ butana be Ehibru, bu namɛ gana ta ashashɛ July na August nu utakada upiana wo Oyibwo. Ubwa du kaa shɛ Butana ba Abassa. gana na otu towo la na shiywa shɛ na shi koshikwo?
4Nazhɛ AGWANGWAMA na Hwuri Kpaaŋ m mbishi, bɛɛ hiɛŋ. 5Hoŋtono atwa cɛnjɛ tu ga kpaaŋ keeni onongbo maa, Iwɛ mi hŋ ohi to la ụkwụla, ahiɛ njɛ ezumi shiywa shɛ ga dupu-nu-woshi? 6Ama aka na ahiɛ yɛ, ehi swe, shɛ iwɛ ikɛnyi hiŋ suu ahiɛ yɛ, ehi swe?
7Shɛ n-ndumwa mu ganana suu AGWANGWAMA jɛmɛ la ne egesere cala, na aka na ta atwa jɛjɛtanɛ tuwebiye nu Jɛrusalɛm, ta ashɛpwụ na rungwutwonu aŋ keeni atwa na jɛjɛ tuta keeni uwaŋna-twonuo?
A 'Imɛ Aŋ Iwɛ Unu wa Aba Hwụjɛ Shɛ
8Nazhɛ AGWANGWAMA mbishi Zɛkaria n-ndumwa, bɛɛ hiɛŋ, 9Iyi AGWANGWAMA na Hwuri Kpaaŋ jɛmɛ la cala na, bɛɛ hiɛŋ, Dumangana ma miaụŋ-mo-bino hiŋ ụshɛrɛya u tishiriri, mapana aŋ ma iwɛ, hioko ma inyɛmɛnyɛmɛ ya aba. 10Ta nda ma olulo, na miaụŋ-me-e'weteji, no okofwo, keeni alashɛ tuhwulo; maa kede bụtụ be elele heŋshi na ahaŋsa ubwa maa nda yɛu-bino bwa iyi iwɛ ye elele o. 11Ama a lacɛ maa a hwụjɛ, shihaŋsa sha aba shɛ shɛshɛpanɛ, ee utegeji shɛcɛbɛ sha aba. 12A njɛ maa shɛmɛ sha aba shɛ 'yaga ikɛnyi gana utayɛ, maa kede a hwụjɛ iwɛ undwa keeni n-ndumwa mu na AGWANGWAMA na Hwuri Kpaaŋ tumwanɛ tedure na Mpiala mu bwa, maa egesere ubwa a cala jɛmɛ o. Ibɛ po AGWANGWAMA na Hwuri Kpaaŋ a nda isɛbwɛ duwa duwa. 13AGWANGWAMA na Hwuri Kpaaŋ hiɛŋ, Gana na Ngaa suyanɛ aŋ, aa hwụjɛ shɛ, gana ata du ɛɛ zhɛ ma n suyana Ngaa zha shɛ mɛ jishijɛ aŋ. 14Ibɛ po Ngee gereteji aŋ la gana ujipo, ee zwegeni ya na amɛ edenji na ee te mepi shi la kwukwuŋ. Ee genji ya cɛnjɛ ta ata, taa shɛ ya osombo, ma tu na bụtụ be elele eri shi bo tono kwo kaa ba banɛ. Ibɛ po cɛnjɛ ta ata te tuwebiye tɛ shɛ ya osombo.
Atualmente Selecionado:
ZƐKARIA 7: RBT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Rubassa Bible © Bible Society of Nigeria, 2008