ZƐKARIA 5
5
Utakada u Tukwungwulo na wa Hila
1Tu Ngaa mbiyanɛ sasana, Ngaa kwụbɛ utakada u tukwungwulo na wa hila na azuba! 2Ibɛ butumwa ata ba azuba n hiɛŋ, Imbe abụ kwụbɛɛ?
Ngɛɛ jishijɛ bụ, Ngɛɛ hiɛŋ, N kwụbɛ utakada u tukwungwulo na wa hila na azuba. Ụnjɛswa ubwa ụ shɛ ivwunɛ talacɛ, uholo ubwa ụ shɛ ivwunɛ umpwa-ni-bɛ-tɛ.#5:2 ivwunɛ talacɛ, ivwunɛ umpwa-ni-bɛ-tɛ: Abayiburu oko hiɛŋ, imbele i'ɛlɛ woshi…imbele i'ɛlɛ umpwa.
3Nazhɛ bɛɛ n hiɛŋ, Unu-tukalana na zhɛ wo botogwu hwuŋ cɛnjɛ tu ga hwɛ hwɛɛ na. E 'nyeci nu upada utakada ata uko, ɛɛ hiɛŋ, Bụtụ be elele na zunji izunde, ɛ zhɛ a bacɛnga bụ na cɛnjɛ tu ga, ee 'nyeci nu upada ubwa uyebi, ɛɛ hiɛŋ, Bụtụ be elele na jwe-ụzagwụ ɛ zhɛ du a bacɛnga bụ gana na te e 'nyeci nu bwa. 4AGWANGWAMA na Hwuri Kpaaŋ hiɛŋ, N zhɛ ma kalana aŋ unu ga, ibɛ wɛɛ zhɛ wo tono umwono buzundo be elele keeni bụtụ be elele na ba ta-tuwa tụ ụzagwụ. U zhɛ wa nama nu umwono ata, wɛɛ zhɛ kaa wo hwuŋzo uŋ, ti i'wɛ'wɛ ibwɛ, ta atayɛ ubwa.
Biyikwo na Shiyeni ni Igwumi
5Nazhɛ butumwa ata ba azuba na ba njɛ n-ndumwa ne mi kaanɛ izhɛ, bɛɛ n hiɛŋ, Shapa eshe bu na azuba, mbiyana maa kwụbɛ iyi ye zhɛ ụbanụ.
6Ngee unseni bu, Ngɛɛ hiɛŋ, Imbe tɛɛ?
Bɛɛ jishijɛ, bɛɛ hiɛŋ, Inɛ gɛ shɛ igwumi bimenji, nɛ shɛ tusakana ti iwɛwɛ ya atwa cɛnjɛ tu ga kpaaŋ.#5:6 iwɛwɛ ya atwa: Kwo kaa tụwụma ta atwa cɛnjɛ tu ga kpaaŋ. Kwo kaa, rishe kwo kaa tụkwụba. Tɛjɛshɛrɛga tu ko ti hiɛŋ, ahaŋsa.
7Ngaa kwụbɛ maa igwumi ɛtɛ 'yajɛ bu'urigeni na aa njɛ na bundala, aka na ee ushiji iŋ, Ngaa kwụbɛ te biyikwo bu ko shiyeni ni igwumi ɛtɛ!
8Ibɛ bɛɛ hiɛŋ, Tugworozwo tu ta. Bee wecicinji bu ni igwumi ɛtɛ, bee urigeni iŋ sasana ne bu'urigeni ata bi bɛ. 9Ngee shepi eshe, Ngaa kwụbɛ eyikwo eyebi nu umbe mu, a na 'yajɛ apiambɛ gana a na ugbaanjɛ, uvwugo namɛ na apiambɛ ata aba, ee shepi igwumi ɛtɛ aa hiɛrɛ ni bɛ na ashashɛ cɛnjɛ na azuba.
10Ngee unseni butumwa ata ba azuba, Ngɛɛ hiɛŋ, Cee kwuŋ ɛɛ zhɛ ni igwumi ɛtɛɛ?
11Bɛɛ jishijɛ, bɛɛ hiɛŋ, Ɛ zhɛ Babulon ni bɛ, apata ɛɛ zhɛ a mana iŋ umwono. Aka na ee meni iŋ umwono, ee hwuwi, ɛ zhɛ o sho igwumi ɛtɛ no ohwolu ibɛ.
Atualmente Selecionado:
ZƐKARIA 5: RBT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Rubassa Bible © Bible Society of Nigeria, 2008