ISAÍAS 34
34
Edom suyuman Diospa muchuchiy kachaykusqan
1Yaw llaqtakuna, uyariq qayllaykamuychis,
yaw suyukuna, allintapuni uyariychis,
hallp'a pachapas chaypi tiyaqkunapiwan uyariychis,
teqsimuyuntinpi wiñaq qorakunapas uyarichunku.
2Señor Diosmi k'arak phiñasqa kashan
llapan suyukunapaq soldadonkunapaqwan,
llapantañan huchacharqan ch'usaq tukunanpaq,
hap'iykachirqanñan wañuchisqa kananpaq.
3Ayakunaqa hina wikch'usqan kanqa,
hinaspan millayta asnarinqa,
orqokunapin yawar mayu phawarinqa.
4Llapan ch'askakunaraqmi ñut'ukunqa,
hanaq pachapas papel hinaraqmi k'uyusqa kanqa,
llapan qoyllurkunapas higos sach'aq raphin hinaraqmi t'akarikamunqa,
uvas yuraq raphin hinaraqmi urmamunqa.
5Señor Diospa espadanmi hanaq pachapi rikhurin,
paymi Edom suyuta wañunanpaq unancharqan,
chaymi espadanta chay llaqta pataman chayachimun.
6Señor Diosmi Bosrapi sacrificiota ruwan,
Edom suyupitaq sinchi askhata wañurachin,
askha ovejakunata, cabrakunata, anejokunatawan nak'an,
chaymi espadanqa yawarkama wirakama kashan.
7Paykunawanmi salqa torokunapas wañullantaq,
torokunapas torillokunapas kumpakullantaq.
Hallp'ankun yawarkama kanqa,
ñut'u hallp'ankutaq wirawan wiswirinqa.
8Arí, kayqa Señor Diospa ayni-kutichinan p'unchaymi,
hinan Sión contra rimasqanmanta Edomta muchuchishan.
9Edom suyuq mayunkunan breaman tukunqa,
ñut'u hallp'antaq azufreman tukunqa,
hallp'anmi brea hina rawrarinqa.
10Manan wañunqachu tutapas p'unchaypas,
sayarishallanqapunin q'osñisqanqa,
watan-watan purunyasqan kapunqa,
manapunin pillapas chaynintaqa purinqachu.
11Chaypiqa tiyanqaku hukukunan pikpikunan,
chaypiqa q'esachakunqaku ch'usiqakunan alqamarikunan,
chay suyutaqa Señor Diosmi purunyachinqa,
mana piqpa purinan ch'usaqmanpunin tukuchinqa.
12Manapunin kamachiqninku reypas kapunqachu,
llapan umallinkunan ch'usaq tukupunqa.
13Qhapaq wasikunapiqa khiskakunan wiñapunqa,
pukarankunapipas kisakunan t'ankarkunan wiñapunqa,
chacal nisqa animalkunaq tiyanan cheqasmi kapunqa,
surikunaq llanthukunanmi kapunqa.
14Usqhollo michikunan chacalkunawan tupanqa,
salqa cabrakunan paykuna pura waqyanakunqa,
tutalla puriq animalkunapas chaypin tiyanqa,
chay animalkunaq samaranan cheqasmi kanqa.
15Chaypin hukupas q'esachakunqa,
runtuspan chiwchinkunata horqonqa,
huñuykuspa ima sumaqta uywanqa.
Chayllapitaqmi ankakunapas huñukunqa,
sapanka orqon chinantinkama kanqa.
16Señor Diospa qelqanta maskhaspa leeychis:
Kikin Señor Diosmi chay hina kananta unancharqan,
paypa espiritunmi chay animalkunata huñumurqan,
chayraykun sapanka chinantin orqontin Edompi kashan.
17Señor Diosmi sapankapaq tiyananta wakichipurqan,
makinwanmi tiyananku hallp'ata rikuykachipurqan,
chaypin pasaqpaq tiyakapunqaku,
watan-watanpaqmi chaypi tiyakapunqaku.
Atualmente Selecionado:
ISAÍAS 34: QC88
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Biblia en Quechua de Cuzco © Sociedades Bíblicas Unidas, 1988.
