Sirac 26
26
1Palaran an lalake kon bana hiya hin maupay nga asawa; doble an kahilawig han iya kinabuhi tungod ha iya. 2An buotan nga asawa usa nga kalipay han iya bana ngan malinawon an iya bug-os nga kinabuhi. 3An maupay nga asawa usa han mga mahal nga kaupayan nga ihinahatag ngadto hadton nahadlok han Ginoo. 4Magmariko ini nga mga tawo, madiri, malipayon hira ngan mahiyomhiyom.
5May-ada upat nga butang nga nakakapahadlok ha akon: an maraot nga libak nga ginpapasarang ha bungto, an pagtirok hin mga mag-isog nga mga tawo, an diri matuod nga mga sumbong—ini hira labi pa hin kamaraot kay han kamatayon. 6Kundi an babaye nga maabugho tungod hin lain nga babaye nakahatag hin kasakit ha kasingkasing ngan kabidoan; waray tinahod han iya dila.
7An maraot nga asawa sugad hiya hin yugo nga diri nasukol ha liog. Makuri an pugong ha iya sugad hin nakapot ka hin bungad. 8Makaoorit pagkit-on an hubog nga babaye. Waray na niya kaawod ngan an iba nakakasala tungod ha iya. 9Hinsasabotan in babaye nga malingo pinaagi han iya malaw-ay ngan nakakalukmay nga mga paniplat han iya mga mata.
10Kon karuyag han imo anak nga babaye nga pasagdan la hiya, bantayi hiya hin maupay. Kon diri ka bantayan hin maupay, masingabot hiya kon may-ada higayon nga ihatag ha iya. 11Kon magparabuot hiya, pag-ikmat ngan ayaw hipausa kon makabido hiya ha imo. 12Mabirangkat hiya bisan diin para han lalake nga naruruyag ha iya sugad nga an inuuhaw nga magbaraktas mainom hin bisan ano nga tubig nga iya hiagian.
13An buotan nga asawa amo an kalipay han iya bana; an iya mga binuhatan makakapakusog han iya bana.#26:13 an iya mga binuhatan…bana; o maaram gud hiya magpakaon han iya bana. 14An babaye nga diri uraura hin kamayakan usa nga upa tikang han Ginoo. Ini nga pakahimo hin pagpugong sadang pagdayawon ngan diri ini matutukib hin mga pulong. 15An maligdong nga asawa may-ada waray paglubad nga kamatahom; usa ini nga hiyas nga an iya kamahal diri masusukol. 16An kamaanyag han maupay nga asawa amo an iya mahusay nga pag-ayad han iya panimalay sugad hin naudtohan nga pagsirak han adlaw dida ha panganuron han Ginoo. 17An iya matahom nga bayhon ug an iya mahusay nga katindog#26:17 mahusay nga katindog; o samtang nagtutubo hiya. maanyag kaupay sugad han kapawa tikang han mga baraan nga lampara didto ha Templo, ug 18an iya maupay pagkit-on nga mga bitiis ngan magkusog nga mga tiil#26:18 magkusog nga mga tiil; ha iba nga mga hubad, mabakod nga mga dughan o matinguhaon nga kasingkasing. sugad hin bulawan nga harigi nga gintindog ha tumbanan nga salapi.#26:18 Ha iba nga mga hubad igindugang an bersikulo 19-27: Anak, pagmalibsog samtang batan-on ka, ngan ayaw ihatag an imo kusog ha mga lumalangyaw. 20 Usisaha an bug-os nga tuna para hin mabungaon nga uma, ngan tamni ini han kalugaringon mo nga binhe, nga nasarig han imo hinipos nga binhi. 21 Niyan mabubuhi an imo mga anak ngan magtutubo hira nga may pagtapod han ira maupay nga panimalay. 22 Sugad hin lura an babaye nga maraot an bantog; an inasaw-an nga babaye nga naglalalake nakakamatay han iya mga hinigugma. 23 An tawo nga matinalapason makakaangkon hin diri dyosnon nga asawa nga angay ha iya, kundi an tawo nga may pagtahod han Ginoo makakaangkon hin maunongon nga asawa. 24 An asawa nga waray alo nalilipay la hin pagpinakaalo ha iya ngahaw, kundi an maupay nga asawa maupay an panggios bisan nagduduhaan la hira ngan han iya bana. 25 In babaye nga ladnganan ayam hiya nga babayi, kundi an babaye nga buotan nagpapasidungog han Ginoo. 26 An asawa nga may pagtahod han iya bana magigin makinaadmananon hiya pagkit-on han ngatanan nga mga tawo; kundi kon diri hiya natahod han iya bana, mahibabaro an ngatanan nga diri hiya dyosnon nga babaye. Palaran an bana hin maupay nga asawa, kay mabubuhi hiya hin doble ka hilawig. 27 An langutab nga babaye sugad hin trompeta nga nagtutunog para hin pagsulong, ngan an tawo nga may-ada sugad nga asawa dayuday la araway ha bug-os niya nga kinabuhi.
Mga Makabibido nga mga Pagtigaman
28May-ada duha nga butang nga nakakabido ha akon ug an ikatulo nakakapasina ha akon: usa nga sundalo nga naghingalooy, mga mag-aram nga tawo nga diri tinatahod ug in usa nga matadong nga tawo nga nagbuhat hin maraot. Pagsisirotan han Ginoo in sugad hini nga mga tawo. 29An usa nga magtirigayon diri gud makakalikay hin pagbuhat hin maraot; an tagsa nga parabaligya makakasala man ta.
Atualmente Selecionado:
Sirac 26: MBBSAM
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Baraan nga Biblia © Philippine Bible Society, 1984