Numeros 31
31
Ang Pagpakig-away sang Israel batok sa Midian
1Ang Ginoo nagsiling kay Moises, 2“Siluti ang mga Midianhon tungod sang ila ginhimo sa mga tawo sang Israel. Sa tapos mo mahimo ini mapatay ka.”
3Gani ginsingganan ni Moises ang mga tawo, “Maghanda kamo para sa inaway, agod masalakay ninyo ang Midian kag masilutan sila tungod sang ila ginhimo sa Ginoo. 4Gikan sa tagsa ka tribo sang Israel magpadala kamo sing 1,000 ka mga tawo para sa inaway.”
5Gani ginpili ang 1,000 ka mga tawo halin sa tagsa ka tribo, 12,000 tanan ka mga lalaki nga handa sa pagpakig-away. 6Ginpadala sila ni Moises sa inaway, sa idalom sang pagmando ni Fineas nga anak ni Eleazar nga pari, nga gintugyanan sang balaan nga mga butang kag sang mga trumpeta sa paghatag sing mga paandam. 7Ginsalakay nila ang Midian, suno sa mando sang Ginoo kay Moises, kag ginpamatay nila ang tanan nga mga lalaki, 8lakip ang lima ka mga hari sang Midian nga amo sanday Evi, Rekem, Zur, Hur, kag Reba. Ginpatay man nila si Balaam nga anak ni Beor.
9Ang mga tawo sang Israel nagbihag sang mga kababayin-an kag mga kabataan nga Midianhon, ginkuha nila ang ila mga kabakahan kag mga panong, gin-agaw ang ila tanan nga manggad, 10kag ginsunog ang tanan nila nga mga siudad kag ang ila mga kampo. 11Gindala nila ang tanan nga mga naagaw, lakip ang mga bihag kag mga kasapatan, 12kag gindala nila ini tanan kay Moises kag kay Eleazar, kag sa katilingban sang mga tawo sang Israel, nga yara sa kampo sa mga kapatagan sang Moab sa tabok sang Jordan halin sa Jerico.
Ang mga Hangaway Nagbalik
13Si Moises, si Eleazar, kag ang tanan nga mga pangulo sang katilingban naggwa sa kampo sa pagsugata sang mga hangaway. 14Naakig si Moises sa mga opisyales, sa mga pangulo sang mga batalyon kag mga kompaniya, nga nagbalik halin sa inaway. 15Ginpamangkot niya sila, “Ngaa bala ginbilin ninyo nga buhi ang tanan nga mga kababayin-an? 16Dumdoma#Num. 25:1-9. ninyo nga ang mga babayi amo ang nagsunod sang mga gintudlo ni Balaam, kag gindala ang mga tawo sa pagkadi-matutom sa Ginoo didto sa Peor. Amo ini ang kabangdanan sang pagkalamatay sang mga tawo sang Ginoo. 17Gani, karon pamatya ninyo ang tagsa ka bata nga lalaki, kag pamatya ang tagsa ka babayi nga nakaagi sing pagpakighilawas, 18pero ibilin para sa inyo kaugalingon ang tanan nga mga dalaga kag tanan nga mga babayi nga mga birhen. 19Karon tanan kamo nga nakapatay kay bisan sin-o ukon nakatandog sang isa ka bangkay kinahanglan magpabilin sa gwa sang kampo sa sulod sang pito ka adlaw. Sa ikatlo kag sa ikapito nga adlaw magpaninlo kamo sang inyo kaugalingon kag ang mga babayi nga inyo ginbihag. 20Kinahanglan inyo man tinloan ang inyo mga bayu kag ang tagsa ka butang nga nahimo sa panit, bulbol sang kanding, ukon kahoy.”
21Si Eleazar nga pari nagsiling sa mga tawo nga nagbalik halin sa inaway, “Amo ini ang mga pagsulondan nga ginhatag sang Ginoo kay Moises. 22-23Ang tagsa ka butang nga indi masunog, kaangay sang bulawan, pilak, bronsi, salsalon, lata, ukon tingga, kinahanglan pagatinluan paagi sa kalayo. Ang iban nga butang pagatinluan paagi sa tubig. 24Sa ikapito nga adlaw kinahanglan labhan ninyo ang inyo mga bayu, dayon manginmatinlo kamo kag pagatugotan nga makasulod sa kampo.”
Ang Pagpamartida sang mga Inagaw
25Ang Ginoo nagsiling kay Moises, 26“Ikaw kag si Eleazar, upod sang iban nga mga pangulo sang katilingban, mag-isip sang tanan nga mga inagaw, lakip ang mga bihag kag ang mga kasapatan. 27Partidaha sing palareho ang mga inagaw, isa para sa mga hangaway, kag isa para sa bug-os nga katilingban. 28Gikan sa bahin nga natuon sa mga hangaway, maghawid subong isa ka buhis para sa Ginoo sing isa sa tagsa ka 500 nga mga bihag, kag amo man nga kadamuon sa mga kabakahan, mga asno, mga karnero, kag mga kanding. 29Ihatag mo ini kay Eleazar nga pari subong isa ka pinasahi nga dulot sa Ginoo. 30Gikan sa parti nga natuon sa bug-os nga katilingban, magkuha ka sing isa sa tagsa ka singkwenta ka mga bihag, kag amo man nga kadamuon sa mga kabakahan, mga asno, mga karnero, kag mga kanding. Ihatag mo ini sa mga Levita nga gintugyanan sang Tolda sang Ginoo.” 31Gintuman ni Moises kag ni Eleazar ang sugo sang Ginoo.
32-35Ang masunod amo ang lista sang mga naagaw sang mga hangaway wala labot sang ila gintago para sa ila kaugalingon: 675,000 ka mga karnero kag mga kanding, 72,000 ka mga baka, 61,000 ka mga asno, kag 32,000 ka mga birhen. 36-40Ang katunga nga bahin sang mga hangaway 337,500 ka mga karnero kag mga kanding, kag ang buhis para sa Ginoo 675; 36,000 ka mga baka para sa mga hangaway, kag setentay dos subong nga buhis para sa Ginoo; 30,500 ka mga asno para sa mga hangaway, kag sesentay uno subong nga buhis para sa Ginoo; kag 16,000 ka mga birhen para sa mga hangaway, kag trayntay dos subong nga buhis para sa Ginoo. 41Gani, ginhatag ni Moises kay Eleazar ang buhis subong isa ka pinasahi nga dulot sa Ginoo, suno sa ginsugo sang Ginoo.
42-46Ang parti sang katilingban pareho man kadamo sang iya mga hangaway: 337,500 ka mga karnero kag mga kanding, 36,000 ka mga baka, 30,500 ka mga asno, kag 16,000 ka mga birhen. 47Gikan sa sini nga bahin nagkuha si Moises sing isa sa tagsa ka singkwenta ka mga bihag kag mga kasapatan, kag suno sa ginsugo sang Ginoo, ginhatag niya ini sa mga Levita nga amo ang gintugyanan sang Tolda sang presensya sang Ginoo.
48Dayon ang mga opisyales nga nagpangulo sang mga hangaway nagkadto kay Moises, 49kag nagsugid, “Gin-isip namon ang mga hangaway sa idalom sang amon pagmando kag wala gid sing isa sa ila nga kulang. 50Gani gindala namon diri ang mga alahas nga bulawan, mga hapin sa butkon, mga pulseras, mga singsing, mga aritos, kag mga kulintas nga nakuha sang kada-isa sa amon. Ginahalad namon ini sa Ginoo subong nga bayad sang amon mga kabuhi, agod iya kami amligan.” 51Ginbaton ni Moises kag ni Eleazar ang tanan nga mga alahas nga bulawan. 52Ang bug-os nga kadamuon sang mga dulot sang mga opisyales nagabug-at sing sobra sa 400 ka libra. 53Ang indi mga opisyales nagtago sang mga inagaw nga ila nakuha. 54Gani gindala ni Moises kag ni Eleazar ang bulawan sa Tolda, agod nga ang Ginoo magaamlig sang mga tawo sang Israel.
Atualmente Selecionado:
Numeros 31: MBBHIL12
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Maayong Balita nga Biblia © Philippine Bible Society, 2012