Deuteronomio 6
6
Ang Daku nga Sugo
1“Karon yari ang tanan nga mga kasugoan nga ginsugo sa akon sang Ginoo nga inyo Dios nga itudlo sa inyo. Tumana ninyo ini sa duta nga inyo pagakadtuan kag panag-iyahan. 2Samtang kamo nagakabuhi, kamo kag ang inyo mga kaliwat dapat magkahadlok sa Ginoo nga inyo Dios kag magtuman sang tanan niya nga mga kasugoan nga akon ginahatag sa inyo, agod mag-estar kamo didto sing malawig. 3Mga tawo sang Israel, pamatii kag tumana ninyo ini! Dayon ang tanan manginmaayo para sa inyo kag mangingamhanan kamo nga pungsod kag mag-estar sa maayo kag mapatubason nga duta suno sa ginsaad sang Ginoo nga Dios sang aton mga katigulangan.
4“O#Mar. 12:29. Israel, dumdoma ini! Ang Ginoo—ang Ginoo lamang—amo ang aton Dios.#6:4 Ang Ginoo…amo ang aton Dios: ukonAng Ginoo, aton Dios, amo lamang ang Dios; ukonAng Ginoo nga aton Dios isa lamang. 5Higugmaa#Mat. 22:37; Mar. 12:30; Luc. 10:27. ang Ginoo nga imo Dios sa bug-os mo nga tagipusoon, sa bug-os mo nga kalag, kag sa bug-os mo nga kusog. 6Indi#Deut. 11:18-20. mo pagkalimtan ini nga mga sugo nga akon ginahatag sa imo sini nga adlaw. 7Itudlo ini sa imo mga kaanakan. Ihambal ini sa imo mga kabataan kon yara ka sa imo balay ukon sa iban nga lugar, sa imo pagpahuway ukon sa imo pag-obra. 8Ihigot ini sa imo mga butkon kag ibutang ini sa imo nga agtang subong pagpahanumdom sa imo. 9Isulat ini sa mga bakalan sang imo balay kag sa mga gawang sang imo banwa.
Paandam batok sa Pagkadi-matinumanon
10“Subong#Gen. 12:7; Gen. 26:3; Gen. 28:13. nga ang Ginoo nga inyo Dios nagsaad sa inyo mga katigulangan nga si Abraham, si Isaac, kag si Jacob, ihatag niya sa inyo ang duta nga may dalagku kag mainuswagon nga mga siudad nga wala ninyo ginpatindog, 11ang mga balay nga puno sing maayo nga mga butang nga wala ninyo ginpangabudlayi; mga bubon nga wala ninyo ginkutkot kag mga talamnan sing ubas kag olivo nga wala ninyo gintanom. Kon ang Ginoo magdala sa inyo sa sini nga duta kag yara ang tanan nga luyag ninyo kaunon, 12mag-andam kamo nga indi magkalimot sa Ginoo nga nagdala sa inyo pa gwa sa Ehipto sa diin gin-ulipon kamo. 13Tahura#Mat. 4:10; Luc. 4:8. ang Ginoo nga inyo Dios, sia lamang ang inyo simbahon, kag magsaad kamo sa iya lamang ngalan. 14Indi kamo magsimba sa iban nga mga dios, sa bisan ano nga mga dios sang mga tawo sa palibot ninyo. 15Kon himuon ninyo ini, ang kaakig sang Ginoo magaabot sa inyo subong sang kalayo nga magalaglag sa inyo sing bug-os, tungod kay ang Ginoo nga inyo Dios nga nagaupod sa inyo, maimon nga Dios.
16“Indi#Mat. 4:7; Luc. 4:12; Exo. 17:1-7. pagsulaya ang Ginoo nga inyo Dios subong sang inyo ginhimo sa Masa. 17Tumana gid ang tanan nga mga kasugoan nga iya ginhatag sa inyo. 18Tumana ang ginasiling sang Ginoo nga maayo kag matarong kag ang tanan manginmaayo para sa inyo. Sarang kamo makapanag-iya sang maayo nga duta nga ginsaad sang Ginoo sa inyo mga katigulangan, 19kag pagatabugon ninyo ang inyo mga kaaway, suno sa iya ginsaad.
20“Sa ulihi ang inyo mga kaanakan magapamangkot sa inyo, ‘Ngaa nga ginmanduan kami sang Ginoo nga aton Dios nga tumanon ang tanan nga mga kasugoan?’ 21Dayon singgana sila, ‘Gin-ulipon kami sang hari sang Ehipto, kag ang Ginoo nagluwas sa amon paagi sa iya daku nga gahom. 22Nakita gid namon sang amon kaugalingon nga mga mata ang ginhimo niya nga mga milagro kag makahaladlok nga mga butang sa mga Ehiptohanon, sa ila hari kag sa iya tanan nga mga opisyales. 23Ginpagwa niya kami sa Ehipto agod dalhon diri kag ihatag sa amon ini nga duta, suno sa iya ginsaad sa aton mga katigulangan. 24Dayon ang Ginoo nga aton Dios nagsugo sa amon sa pagtuman sini tanan nga mga kasugoan kag sa pagtahod sa iya. Kon tumanon namon ini, iya gid bantayan ang aton pungsod kag pauswagon niya ini. 25Ang Dios mahamuot sa aton kon magpadayon kita sa pagtuman sang tanan nga iya ginasugo sa aton.’#6:25 Ang Dios…ginasugo sa aton: ukonAng matarong nga buhaton naton amo ang pagtuman sing matutom sa tanan nga ginmando sang Dios sa aton.
Atualmente Selecionado:
Deuteronomio 6: MBBHIL12
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Maayong Balita nga Biblia © Philippine Bible Society, 2012
