GENESIS 2
2
1Huan, lei leh van leh asung a om tengteng siamzoh ahita hi. 2Pathian in a ni sagih ni’n a nasep a zou a; a ni sagih ni’n a nasep tengteng a khawlsanta hi. 3Pathian in a ni sagih ni a vualzawl a, a tangta hi. Huai ni a Pathian in a siam leh a bawl, a nasep tengteng a khawlsan tak ziak in.
Eden Huan
4Lei leh vante siam a a omlai ua a suante uh hiaite ahi; Toupa Pathian in lei leh van a siam ni’n, 5lei a loupa himhim a om naikei a, lei a anteh leng a pou naikei hi. Toupa Pathian in leitung ah vuah a zusak naikei a, leilet ding in mihing leng a om naikei hi. 6Himahleh lei apan mei a hong suaktou a, leitung tengteng a nomsak hi.
7 Toupa Pathian in lei a leivui in mi a bawl a, a nakvangte ah hinna hu a khalut a; huai mi, mihing a hong hita hi.
8 Toupa Pathian in suahlam a Eden ah huan a bawl a; a bawl pasal huai ah a omsakta hi. 9Lei a kipan Toupa Pathian in sing mit hiptak leh nektuak chiteng a pousak hi. Hinna sing leh sialehpha theihna sing leng huan laizang ah a pousak hi.
10Eden apan huan nomsak ding in lui a luang paisuak a; huai a kipan a ka zak a, ka li a hong hita hi. 11A khatna min Pison ahi, hiai Havilah gam tengteng kualkhum lui ahi. Huai ah dangkaeng a om hi. 12Huai gam a dangkaeng hoihtak ahi a, huai ah bedeli leh onik suang leng a om hi. 13Lui nihna Gihon ahi a; huai lui in Kush gam tengteng a kualkhum ahi.
14Lui thumna min Hiddekel ahi a; hiai Assuria gam suahlam a luang ahi. Lui lina bel Euphrates ahi.
15 Toupa Pathian in pasal a pi a, Eden huan ah a kem ding leh a veng ding in a koihta hi. 16Toupa Pathian in pasal kiang ah, “Huan a sing gah chiteng na utut na ne thei hi. 17A hoih leh a sia theihna sing gah bel na ne ding ahi kei. Na nek leh na nek ni mah in na si ngeingei ding hi” chi in, thu a pia hi.
18 Toupa Pathian in, “Pasal amah kia a om a hoih kei. Amah panpihtu ding a kilawm ka bawlsak ding,” a chi hi. 19Toupa Pathian in leitung a kipan gamsa chiteng leh tung a leng vasa chiteng a bawlta hi. A min ding ua bang sak ding ahia chih theihna ding in Adam kiang ah a hon pikhawm hi. Ganhing chiteng a min uh Adam in a na phuah, a min uh ahi den hi. 20Adam in gan tengteng, tung a leng vasa tengteng leh gamsa chiteng min a phuak chiat hi. Himahleh Adam panpihtu ding a omkei hi.
21 Toupa Pathian in nuamtak in Adam a ihmu sak a, huchi in a ihmuta a; a nakguh khat a la a, a tang ding in sa a pang dimsak hi. 22Toupa Pathian in Adam apan a lak nakguh apan in numei a bawl a, Adam kiang ah a honpita hi. 23Adam in,
“Hiai hial zaw ka guh a kipan guh,
Ka sa a kipan sa ahi.
Pasal a kipan lakkhiak
a hih ziak in,
Numei, chih ding ahi” a chi hi.
24Huaiziak in, pasal in a nu leh a pa a paisan dia, a zi ah a belh ding. Huchi in sa khat a hong hita ding uhi. 25Adam leh a zi vuaktang ahi tuak ua, a zum tuankei uhi.
Atualmente Selecionado:
GENESIS 2: PAITBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.