PHUNGTHLÛKBIA 31
31
1Siangpahrang Lemuel phungthlukbia, anu nih a cawnpiakmi hna cu. 2Zeidah a si, ka fapa? zeidah a si ka chungchuak fapa? ka chiatserhnâk fapa, rak ngai tuah. 3Siangpahrang hna hmanh a hrawktu nu sinah na ṭhawnnâk pe hlah. 4Maw lemuel, siangpahrang hna caah a si lo, siangpahrang hna caah misur hang din awk a si lo; siangpahrang fale zong nih zu an din awk a si lo. 5Culoahcun nawlbia an philh lai, cun misifâk mi hna covo zeirello in bia an ceih sual lai. 6Alotlau cuahmah mi kha zu ṭhawngphun pe hna u law lungkuai mi kha zu dinter hna u. 7Ding hna sehlaw, an sifahnâk kha philh hna seh, an ngaihchiatnâk philh lak in ding hna seh. 8Mahca i â chimkho lomi hna kha chimpiak hna law, thi ding i bia an khiahmi hna zong kha chimpiak hna. 9Na kâ pau in ding tein bia ceih, misifâk le chambaumi hna kha nawlpiak hna. 10Nupi fel ngai hi ahodah a hmu kho lai? lungvar nâk in a sunglawi deuh. 11Ava pa nih a lungthin in â bochan i a caah san a tlai tuk hringhran. 12A nunchung vialte, Ṭhatlonâk lei si loin ṭhatnâk lei longin thil a tuah piak. 13Tuu hmul le la kha a kawl i lunglawm tein a kut in a ṭuan tawn. 14Chawlet mi hna tilawng bantuk a si i ram hlapi in ei awk a lâk tawn. 15Khuadei hlan in a tho i a chung le kha ei awk a pêk tawn hna; cun sinum ngaknu hna kha rian a phawt zamh tawn. 16Dûm tuahnâk ding ram a zoh i a cawk, a ṭuanmi man in misur dûm a ser tawn. 17Thazâng thar in atai â sawm i a bantha a ṭhawnter hna, 18Chaw a lehnâk a hlawk ti kha a hngalh i zanhmanh ah a meiin a mit bal lo. 19A kut in lakhernâk kut a tlaih i a kut khat te lei in hmuifung â tlaih. 20Misifâk bomhnâk ah a kut kha a zau, asi, chambaumi hna tiangin a kut nih a phanh dih. 21Hawhra zong tla hmanhsehlaw a chungle caah ṭih awk a um lo, zeitintiah a chung le vialte nih puanlum an i aih dih. 22Ṭuangphah ding puandawh â ser i a hnipuan cu lahmangṭhia le maimaw puan an si. 23Ava pa cu kutkâ ah a min a lang ngai ngai, ram chung i hotu hna sinah a ṭhu tawn. 24Maimaw puan a tah i a zuar tawn, chawlet mi hna sinah taisawm kha a zuar tawn. 25Ṭhawnnâk le upatnâk cu â thomhnâk a si, a ra laimi cân zongah â lawm vima ko lai. 26Fimnâk he bia a chim tawn i a lei hna cu zawnruahnâk nawlbia a si. 27An innchungkhar khuasak tintuknâk ṭha tein a tuaktân dih, cun rawl zong daithlang ngai in a ei bal lo. 28Afa le nih annu cu an thangṭhat i anpa zong nih a thangṭhat. 29“Nutling ngai tampi an um ko nain nangnih cun na lonh dih hna,” tiah a ti. 30Iang hi hlennâk a si i dawhnâk zong an ziam, asinain BAWIPA a ṭihzahtu nu cu thangṭhat a si lai. 31Akut in a ṭuanmi theitlai pe u law, kutkâ ah amah hrimhrim kha a tuahmi nih thangṭhat seh.
Atualmente Selecionado:
PHUNGTHLÛKBIA 31: HAKABSI
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
