PHUNGTHLÛKBIA 13
13
1Fapa fim nih a pa cawnpiaknâk biapi ah a ruah, asinain zomhtaih a hmangmi nih chimhhrinnâk ngaih a duh lo. 2Mi nih a hmurkâ chuak theitlai kha ṭha tein a ei lai i zumh awk a tlâk lomi nunnâk cu zângennâk in an i cawm lai. 3A lei ṭha tein a kilvengtu nih a nunnâk a kilven, asinain kau piin a kâ a âng mi nih rawhralnâk a tong lai. 4Mithathu nunnâk nih a duh ngai nain zeihmanh a ngei lo, asinain miteima nunnâk cu rumter a si lai. 5Miding nih lihchim a huat, asinain misuaksual cu fihnung le ningzah phurtu a si. 6Sawi awk umlo in a nungmi hna cu dinnâk nih a kilven hna, asinain suahsualnâk nih misual kha a hlawnh tawn. 7Mirum ah ai ruat nain zeihmanh ngei ṭung lomi an um, cun sifak ngai in â ruat nain a rum ngai ṭungmi an um. 8Mirum nih i tlanhnâk chawva a ngei, asinain misifak nih sik a tong bal lo. 9Miding hna ceunâk cu â dawh ngaimi ceunâk a si, asinain misuaksual meiin cu hmih a si lai. 10Ruamkainâk nih sikṭhiatnâk dah ti lo zeidang a chuahter lo, asinain ruahnâk ṭha cheuhmi lâk hi fimnâk a si. 11Diklo ngai i chawva lak cu a lo zau ko lai, asinain ba ngai i ṭuannâk in hmuhmi cu a karh lai. 12Hngahmi hmuhzau lonâk nih lung a zawtter, asinain duhmi phâk cu nunnâk thingkung a si. 13Bia zei i a rel lomi cu rawhter a si lai i nawlpêk a ṭhzahtu cu ṭuanman pêk a si lai. 14Mifim nawlbia cu nunnâk tikhor a si, thihnâk rap hrialnâk lam a si. 15Theithiamnâk ṭha nih duhpiaknâk a hmuh, asinain zumhtlâklo a simi hna lam cu a har. 16Khuaruah-thiammi vialte nih hngalhnâk in an cawlcang, asinain mihrut nih a hruhning a langhter tawn. 17Lamkaltu suaksual cu buaibainâk ah a tlu tawn, asinain zumhtlâk lamkaltu cu ngandamnâk phortu a si. 18Palhmi-remhnâk zeiah a rel lomi cungah chamhbaunâk le ningzahnâk a phân lai, asinain chimhhrinnâk biapi i a ruatmi cu upat a si lai. 19Duhmi a tlinnâk hi nunnâk caah a thlum, asinain mihrut caah sual kaltâk hi fihnung ah a cang. 20Mifim hna nunin a nungmi cu an fim lai i mihrut komhtu cu hrawh an si lai. 21Misual cu Ṭhatlonâk nih a dawi tawn, asinain miding cu ṭhatnâk in cham a si lai. 22Miṭha nih a tu le ca tiangin ro a chiah hna, asinain misual hna chawva cu miding hna caah pumh a si tawn. 23Misifak leithuanmi ah facang tampi thar khawh a si, asinain diknâk a bau ruangah a lo tlau dih. 24Fung a hmang duh lomi nih a fa a huat a si, asinain a dawtu nih a chimhhrin tawn. 25Miding nih khim tein rawl a ei tawn, asinain misuaksual paw cu a lawng tawn.
Atualmente Selecionado:
PHUNGTHLÛKBIA 13: HAKABSI
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.