PHUNGTHLÛKBIA 11
11
1Cuai deu hi BAWIPA caah fihnung a si i a dikmi tahnâk hi â lomhnâk a si. 2Ruamkainâk a um ahcun ningzahnâk nih a zulh tawn i toidornâk ah hin fimnâk cu a um. 3Midik hna zumtlâksinâk nih anmah a hruai hna lai, asinain zumhtlâk lo lungput a ngawimi nih anmah a hrawh hna lai. 4Thinhunnâk a chuah ahcun chawva nih sullam a ngei ti lo; asinain dinnâk nih thihnâk in a khamh lai. 5Sawiawk um lo dinnâk nih lam dik a hmuh sak lai i misuaksual cu a suahsualnâk lila ah a tlu lai. 6Midik hna dinnâk nih anmah a khamh hna lai i zumh a tlâk lomi hna cu anmah duhnâk nih a tlaih hna lai. 7Misuaksual a thih tikah â ruahchanmi vialte zong a tlau dih lai i midik lo ruahchannâk zong a lotlau dih lai. 8Miding cu buaibainâk chungin khamh a si tawn i cu buaibainâk hmun cu misuaksual hna nih an rawlh lai. 9Mi depde hna nih an hmurkâ in an innpa kha an hrawh tawn, asinain miding cu hngalhnâk in khamh an si lai. 10Miding hna ṭha tein an tluan lio ahcun khualipi an i lawm i misuaksual hna an thih tikah lunglawmhnâk a um. 11Miding hna nih thluachuah an co tikah khualipi zong cawisan a si, asinain misuaksual hna hmurkâ nih a hlawnh dih tawn. 12Fimnâk a ngei lomi nih a innpa a zomhtaih tawn, asinain theihthiamnâk a ngeimi cu daite in a um. 13Biaduh hna nih biathli an phuan tawn, asinain zumhtlâk thinlung a ngeimi nih thil a thuh tawn. 14Fimchimtu ṭha umlonâk ah mizapi an tlu tawn, asinain fimchimtu ṭha tamnâk ah himnâk a um. 15Hngalhlomi caah âmah â khântu nih a tuar lai i âmahkhân a huatu cu a him lai. 16Zângfahthiam nu nih upatnâk an co i zângfahnâk ngei lomi nih rumnâk an co. 17Vêl a ngeimi nih a nunnâk caah thilṭha a tuah, asinain zângfahnâk ngei lomi cu a taksa caah harnâk petu a si. 18Misuaksual nih hlennâk man a co tawn, asinain dinnâk ci a tuhtu nih a ṭuanman taktak a hmuh lai. 19Dinnâk nih nunnâk lamah mi a hruai bangin, Ṭhatlonâk a zultu nih a thihpi tawn. 20Lungthin a ngawimi cu BAWIPA caah fihnung an si i miding tlamtling hna nunning cu anmah lomhnâk lila a si. 21Lungrual tein an um hmanh ah, misuaksual hna cu dântat loin an um lai lo. Asinain miding hna techin fapar hna cu zalonter an si lai. 22Â dawhmi nu, ruahthiamnâk a baumi hna cu, vawk hnar i sui zunghruk thlaih bantuk a si. 23Miding duhnâk cu ṭhatnâk lawnglawng a si i misuaksual hngahmi cu thinhunnâk a si. 24Phawtzamh luaimai hi karh chin chinnâk a si i aiza mi pinlei tiang tlaih timh hi chamhbaunâk men a si. 25Nun a siangmi hna nun cu rumter a si lai, ti a toihtu nih amah zong â toih ve. 26Fangcang chuah siang loin a tlaihbawhtu cu mi nih chiat an serh lai i a zuartu hna cu thluachuah in a um lai. 27Ṭhatnâk biatak tein a kawltu nih upatnâk a hmuh lai i Ṭhatlonâk kawltu cungah harnâk a tlung lai. 28Chawva â bochanmi hna cu an tlu lai i miding hna cu ramkung bangin an hninghno lai. 29Mah chungkhar a buaitertu nih a comi ro cu thlitu a si lai i mihrut cu lungthin a fimmi hna sinum a si te lai. 30Miding hna theitlai cu nunnâk thing a si i thlarau tlaitu hna cu mifim an si. 31Miding hmanh lei ah cham an si ahcun, Pathian ṭihzahlo le misual hna cu zeitlukindah a si chin chin lai?
Atualmente Selecionado:
PHUNGTHLÛKBIA 11: HAKABSI
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.