Fakahā 9
9
1Pea ko ‘ene ifi pē ‘e he ‘āngelo hono nimá ‘ene talupité, peá u sio atu ‘oku tō hifo ha fo‘i fetu‘u mei langi ki māmani. Na‘e ‘oange ki ai ‘a e kī ki he hifo‘anga ki he luo ta‘e-hano-takelé. 2Pea ko ‘ene fakaava pē e hifo‘angá kuo kohu hake, ‘o hange ha fu‘u ngoto‘umú. Na‘e fakapo‘uli ai ‘a e la‘aá mo e langí. 3Pea ‘oho mai ha fanga he‘e mei he ‘ahú ‘o ‘ufi‘ufi ‘a māmani. Pea na‘e ‘oange kiate kinautolu e fa‘ahinga mafai ‘oku ‘i he sikopió.
4Na‘e fekau e he‘é ke ‘oua te nau faka‘auha e mohuku ‘i māmaní, pe ko ha ‘akau lalahi pe iiki, kae tautea pē ‘a e kakai ‘oku ‘ikai ke hā ‘i honau la‘é ‘a e faka‘ilonga ‘o e ‘Otuá. 5Na‘e fakangofua e he‘é ke nau fakamamahi‘i e kakaí ‘o māhina ‘e nima, ka na‘e ‘ikai ke fakangofua ke nau tāmate‘i kinautolu. Ko e fakamamahi na‘a nau faí na‘e hangē ko e u‘u ‘a e sikopió. 6‘E faka‘amu ‘a e kakaí he ngaahi ‘aho ko iá ke mate, ka he‘ikai ke nau lava ‘o mate. Te nau fie mate, ka ‘e hola meiate kinautolu ‘a e maté.
7Ko e fanga he‘é, na‘e hangē ha fanga hoosi kuo teu ki he taú. Na‘e hangē ‘oku nau kalauni koulá, pea nau mata ‘o hangē ha tangatá. 8Ko honau lou‘ulú na‘e hangē ko e lou‘ulu ‘o ha fefiné, pea nau nifo ‘o hangē ha laioné. 9Na‘a nau kofu tau ukamea. Pea ngahaha honau kapakaú ‘o hangē ko ha kongakau sāliote ‘oku ‘oho atu ke taú. 10Na‘e hangē ha hiku‘i sikopió honau hikú ‘o me‘a huhu, pea na‘e lava ‘o lavea ai ha taha ‘o māhina ‘e nima. 11Ko honau tu‘í ‘a e ‘āngelo na‘e pule he fu‘u luó. Ko hono hingoá ko ‘Apatoni (ko Faka‘auha) ‘i he lea faka-Hepeluú, pe ko ‘Apolioni ‘i he lea faka-Kalisí.
12Na‘e pehē ‘a e hoko mai e ‘uluaki me‘a fakalilifú. Kae tatali si‘i pē, he ‘oku kei toe e me‘a fakalilifu ‘e ua.
13Pea ifi ‘e he ‘āngelo hono onó ‘ene talupité, peá u fanongo atu ‘oku ongo mai ha le‘o mei he ngaahi tuliki ‘e fā ‘o e ‘ōlita ‘oku tu‘u ‘i he ‘afio‘anga ‘o e ‘Otuá. 14Pea pehē mai ‘a e le‘ó ki he ‘āngelo hono onó, “Vete ange ‘a e kau ‘āngelo ‘e toko fā kuo ha‘i ‘i he ve‘e Vaitafe ‘Eufaletesí.” 15Na‘e teu‘i ‘a e kau ‘āngelo ‘e toko fā ko iá ki he houá ni, mo e ‘ahó ni, mo e uiké ni, mo e māhiná ni, mo e ta‘ú ni. Pea ko honau tuku ange eni ke nau faka‘auha ha vahe tolu ‘e taha ‘o e kakai kotoa ‘i māmani.
16Na‘e mahino kiate au ‘i he‘eku fanongo atú ‘oku laka he toko uangeau miliona tupu ‘a e kau tau heka hoosi na‘e ‘i aí. 17Peá u sio au ‘i he‘eku vīsoné ‘oku nau teunga tau lanu-kulokula momoho, mo lanu-moana fakapōpō‘uli, mo lanu-engeenga. Na‘e ‘ulu‘i laione ‘enau fanga hōsí, pea ‘alu atu e afi mo e ‘ahu mo e sūlifa mei honau ngutú. 18Na‘e mate ‘a e vahe tolu ‘e taha ‘o e kakai ‘o māmaní ‘i he me‘a fakalilifu ko ia ‘e tolú, ‘a e afí mo e ‘ahú, mo e sūlifá. 19Ko e mālohi ‘o e fanga hōsí na‘e ‘i honau ngutú mo honau hikú. Pea ko honau hikú na‘e hangē ha ngata ‘oku u‘u kona mo fakatupu laveá.
20Ko e toenga ‘o e kakaí, ‘a ia ko e kakai na‘e ‘ikai ke mate he ngaahi faingata‘a fakalilifu ko ení, na‘e ‘ikai ke tuku ‘enau lotu ki he ngaahi me‘a na‘a nau ngaohí. Na‘e ‘ikai pē ke tuku ‘enau lotu ki he fanga tēvoló, kae hoko atu pē ‘enau ‘otua‘aki e ngaahi tamapua na‘a nau ngaohi‘aki e koula, mo e siliva, mo e polonise, mo e maka, pea mo e ‘akau. Na‘e ‘ikai ha taha he ngaahi tamapua ko iá ‘e lava ‘o sio, pe fanongo, pe ‘alu. 21Pea na‘e ‘ikai ha taha ia ‘e tuku ‘ene fakapoó, pe ko ‘ene fakalou‘akaú, pe ko ‘ene tō‘onga fakalieliá, pe ko ‘ene kaiha‘á.
Atualmente Selecionado:
Fakahā 9: TCNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Tongan Contemporary New Testament © Bible Society of the South Pacific, 2011.
