Fakahā 15
15
Ko e Faingata‘a Fakalilifu Faka‘osí
1Pea hili ia, na‘á ku hanga hake ki he langí kuo toe ‘asi mai mo ha fu‘u faka‘ilonga fakaofo, ko ha kau ‘āngelo ‘e toko fitu ‘oku nau ‘omi e ngaahi faingata‘a fakalilifu ‘e fitu, ‘a ia ko e ngaahi faingata‘a faka‘osí ia. He ka hili ia, pea he‘ikai ke toe houhau ‘a e ‘Otuá ia. 2Pea ‘asi mai leva ha me‘a na‘e hangē ko ha tahi sio‘ata ‘oku fiofio afi, pea ‘oku tu‘u ai ha kakai. Ko e kakai eni kuo nau ikuna ‘a e manu fekaí, mo hono ‘īmisí, pea mo e fika na‘e faka‘ilonga‘i‘aki hono hingoá. Kuo nau to‘o ha ngaahi ha‘ape ne ‘oange ‘e he ‘Otuá ma‘anautolu, 3mo hua ‘a e hiva ‘a Mōsese ko e tamaio‘eiki ‘a e ‘Otuá, mo e hiva ‘a e Lamí. Pea ko ‘enau hivá eni,
“‘Eiki ‘Otua Māfimafi,
ko e ngaahi ngāue kāfakafa mo fisifisimu‘a
kuó ke faí.
Ko koe ‘okú ke pule
ki he kakai kotoa pē,
pea ‘oku ma‘a mo faitotonu ‘a ho‘o pulé.
4‘Eiki, ko hai ‘oku ‘ikai ke ‘apasia ki ai e kakai kotoa pē,
mo fakalāngilangi‘i ho huafá?
Ko koe toko taha pē ‘oku mā‘oni‘oní.
Pea ‘e ‘aukau mai e kakai kotoa pē
‘o lotu kiate koe.
He kuó ke fakahā mai ‘oku faitotonu
ho‘o fakamāú.”
5Peá u toe fakatokanga‘i mo ha me‘a ‘e taha ‘oku hā he langí. Kuo fakaava e matapā ‘o e tēniti tapu na‘e ngāue‘aki ko e temipale, 6pea ‘oku hū mai mei ai e kau ‘āngelo ‘e toko fitu kuo nau ‘omi e ngaahi faingata‘a fakalilifu ‘e fitu. Ko e līneni-lanu ma‘a mo fetapaki honau teungá, mo āfei lanu-koula. 7Pea hanga ‘e he toko taha he ngaahi me‘a mo‘ui ‘e faá ‘o tuku kiate kinautolu taki taha ha ipu koula kuo fonu ngutungutu ‘i he houhau ‘a e ‘Otua ‘oku mo‘ui ‘o tuputupu‘á. 8Na‘e fonu kotoa e temipalé he kohu ‘o e lāngilangi mo e māfimafi ‘o e ‘Otuá, pea na‘e ‘ikai ke toe lava ha taha ‘o hū ki ai, kae ‘oua kuo ‘osi hono hua‘i mai ‘e he kau ‘āngeló ‘a e ngaahi faingata‘a faka‘osi ‘e fitú.
Atualmente Selecionado:
Fakahā 15: TCNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Tongan Contemporary New Testament © Bible Society of the South Pacific, 2011.
