Fakahā 1
1
1Ko e ngaahi me‘a eni na‘e fakahā ‘e he ‘Otuá kia Sīsū Kalaisi, koe‘uhí ka ne toki fakahā ‘e ia ki he‘ene kau tamaio‘eikí ‘a e ngaahi me‘a kuo vave ‘ene hoko maí. Pea na‘e fekau ‘e Kalaisi ‘a ‘ene ‘āngeló ke ne ‘alu ‘o fakahā ki he‘ene tamaio‘eiki ko Sioné. 2Pea na‘e fakahā ‘e Sione ‘a e folofola ko ia mei he ‘Otuá, pea mo e ngaahi me‘a na‘e lea‘aki ‘e Sīsū Kalaisí, ‘io, ‘a e me‘a kotoa pē na‘á ne mamata ki aí.
3‘E tāpuaki‘i ‘a ia te nau lau ‘a e tohi fakapalofisai ko ení, mo kinautolu te nau fanongo mo fai ki he me’a kuo tohí: he ko hono ‘aho kuo ofi mai.
Ko e Fakafe’iloaki ki he Ngaahi Siasi ‘e Fitú
4Si‘i Siasi ‘e fitu ‘o ‘Ēsia.
Ko au Sione ‘oku ou tohi atú.
‘Oku ou fakatauange ke mou ‘inasi
he ‘ofa lī‘oa mo e tāpuaki mei he ‘Otuá,
‘a ia ko e ‘Otua ‘oku ‘i aí ni,
pea na‘e ‘i ai,
pea ‘e hā‘ele maí.
Tauange ke mou ‘inasi
‘i ha ‘ofa mo ha tāpuaki
mei he laumālie ‘e fitu
‘oku nau haha‘o atu
ki he ‘afio‘anga ‘o e ‘Otuá.
5Pea tauange ke mou ‘inasi
‘i he ‘ofa lī‘oa mo e tāpuaki meia Sīsū Kalaisi.
Ko e toko taha ia ‘oku falala‘anga ‘ene folofolá.
Ko Sīsū na‘e ‘uluaki fokotu‘u mei he maté.
Pea ko ia e pule ‘o e ha‘a tu‘i kotoa ‘o māmaní.
‘Oku ‘ofa ‘a Kalaisi ‘iate kitautolu,
pea kuó ne fakatau‘atāina kitautolu
‘aki hono ta‘ata‘á
mei he‘etau ngaahi angahalá.
6Kuó ne ‘ai kitautolu ko ha pule’anga-fakatu‘i
mo fai fatongia faka-taula‘eiki
ki he ‘Otua ko ‘ene Tamaí.
Tauange ke ‘o‘ona ai pē ‘a e lāngilangí mo e mālohí
‘o ta‘e ngata pea ta‘e ngata. ‘Ēmeni.
7Ko ena ‘oku ne hā‘ele mai ‘i he ‘aó.
Pea ‘e mamata ki ai ‘a e kakai kotoa pē,
‘o a‘u kiate kinautolu na‘a nau hoka‘i ia
‘aki e heletaá.
‘E tangi mamahi e kakai kotoa ‘o māmani,
koe‘uhí ko ia.
‘Io, ko e me‘a ia ‘e hokó. ‘Ēmeni
8Pea ko e folofola ē ‘a e ‘Eiki ‘Otua Māfimafí, “Ko aú ko e Kamatá mo e Faka‘osí, ko au ia ‘oku ‘i aí ni, pea na‘e ‘i ai, pea ke teu ke hoko mai.
Ko e Hā Mai ‘a e ‘Eiki Toe Tu‘ú
9Ko Sione au, ko e kaungāmuimui mo kimoutolu. ‘Oku tau mo‘ua he ngaahi mamahi koe‘uhí he ko hotau Tu‘í ‘a Sīsū. Ka ‘okú ne fakaivia kitautolu ke tau lava ‘o makātaki‘i. Na‘e fakahee‘i au ki he motu ko Pātimosí, koe‘uhí ko ‘eku malanga‘i e Folofola ‘a e ‘Otuá mo e mo‘oni na‘e fakahā ‘e Sīsuú. 10Pea hoko mai e ‘Aho ‘o e ‘Eikí kuo fā‘ofale ‘a e Laumālié ‘iate au, pea ongo mai mei hoku tu‘á ha fu‘u le‘o na‘e hangē ha talupité. 11Pea pehē mai e le‘ó, “Hiki tohi ‘a e me‘a ‘okú ke mamata ki aí. Pea ‘ave ia ki he fitu‘i siasi ‘o ‘Efesō, Sīmana, Peakamosi, Taiataila, Sātisi, Filatelifia, pea mo Leotisia.”
12Peá u tafoki hake ke vakai pe ko hai ‘oku lea maí, tā kuo ‘asi mai ha tu‘unga-maama koula ‘e fitu. 13Pea ‘oku tu‘u he vahavaha‘a tu‘unga-māma koulá ha toko taha na‘e hangē ko e Foha ‘o e Tangatá. Na‘e pulupulu tōtōlofa ‘o a‘u hifo ki hono tunga‘i va‘é, pea āfei tupenu koula, 14pea na‘e hina paki ‘a hono fofongá mo hono lou‘ulú ‘o hangē ko e fisi‘i peaú, pea hangē ha ongo afi kakahá ‘a hono ongo fofongá. 15Na‘e uloulo hono ongo va‘é ‘o hangē ha palasa ‘oku haká, pea ‘u‘ulu hono le‘ó ‘o hangē ha vaitoó. 16Na‘á ne puke ha fo‘i fetu‘u ‘e fitu ‘i hono nima to‘omata‘ú, pea kuo ‘alu atu ha heletā fakatoumata mei hono ngutú. Na‘e huhulu hono fofongá ‘o hange ko e la‘aá i he ho‘atā mālié.
17Ko ‘eku mamata pē ki aí, peá u tō ki lalo ‘i hono ve‘e va‘é, ‘o hangē ha taha kuo maté. Pea ala mai leva ia kiate au ‘aki hono nima to‘omata‘ú, ‘o ne pehē mai,
“‘Oua te ke manavahē. Ko au ‘a e ‘uluakí mo e faka‘osí. 18Ko au ia ‘oku mo‘uí. Na‘á ku mate, ka kuó u mo‘ui, pea te u mo‘ui ai pē. ‘Oku ou pule au ki he maté pea mo e fonua ‘o e kakai maté. 19Hiki tohi ‘a e ngaahi me‘a kuó ke mamata ki aí, mo e me‘a ‘oku lolotonga hokó, pea mo ia ‘e hoko ‘a muí. 20Te u fakamahino atu ‘a e ‘uhinga loloto ‘o e fitu‘i fetu‘u na‘á ke mamata ki ai ‘oku ‘i hoku tafa‘aki to‘omata‘ú, mo e fitu‘i tu‘unga-maama koulá. Ko e fitu‘i fetu‘ú e kau ‘āngelo ‘o e fitu‘i siasí. Pea ko e fitu‘i tu‘unga māmá ‘a e fitu‘i siasí.
Atualmente Selecionado:
Fakahā 1: TCNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Tongan Contemporary New Testament © Bible Society of the South Pacific, 2011.
