Loma 13
13
Kabemani yadi veimea ta na vematayakeyakedi
1I lubwaineni tomotoga matatabuda kabemani yadi veimea ta na vematayakeyakedi fai veimea matatabuna i mai Yaubada 'wainega. Toveimeanidi Yaubada i silakaidi bega ma yadi veimea. 2Begaidi egavo toveimea yadi veimea i na baila, siwe 'asa'aiana wata Yaubada yana veimea i baila, taunidi 'adi vematavuloga i 'i'idewai. 3Egavo yadi sauluva 'atumaidi kebu i na kolologa kabemani yadi veimea faifaina, we'e mogitana egavo yadi veimea i geugeudi i na kololo. 'Ai'edi kebu nuanuami 'wa na kololo kabemani 'waidie 'wa na vevesauluva 'atumaina nika i na subiami yami sauluva faifaidi. 4Toveimeanidi Yaubada yana tofolovavo yami 'atumaina faifaina i folofolova, we'e 'ai'edi sauluva sakoina 'wa na 'idewaiga 'ana fata 'wa na kololoyedi fai 'akonadi yadi veimea i 'eno'eno vematavuloga faifaina. Toveimeanidi Yaubada yana tofolovavo bega tosakona Yaubada yana nuasako wata yana vematavuloga i na veluagadi toveimeanidi 'waidiega. 5Begaidi i lubwainemi toveimea yadi veimea 'wa na vevematayakeyakedi, kebu vematavuloga 'aisena faifaina 'wa na nuanua, siwe wata yada nuanua 'waidie ta vebaeda i lubwaineda ta na vevematayakeyakedi.
6 #Mad 22:21; Mak 12:17; Luk 20:25 Wata fai Yaubada kabemani i silakaidi, begaidi takesi 'wa na yatoyato. Toveimea yadi folova tulina tulina i 'i'idewadiga siwe 'asa'aiana Yaubada faifaina i folofolova. 7'Ai'edi tamu aitoi 'wa da tutuli tamu nani faifaina i lubwaineni 'wa na 'anivelenamo. Takesi tulina tulina 'wa na yatoyato wata toveimea 'aitamogana 'aitamogana 'wa na veve'ililibuyedi.
Ma edavo ta na vevenuakalikali fai Iesu yana vila-vaitugana sai'afoga
8'Ai'edi tamu nani 'wa na 'ewa-maimaigi 'alo 'wa na 'uneiga, i lubwainemi 'wa na tutuli kebu i na 'eno'enoga. We'e tamu nani kebu 'ami fata 'wa na tutuliga, fai 'ami nuakalikali bwaikina 'wa na tutula-wayogeni, i lubwainemi ma emiavo 'wa na vevenuakalikalimo. 'Ai'edi aitoi tomotoga i na nuakalikaliediga, siwe 'asa'aiana Yaubada yana veimea matatabuna i vevematayakeyakedi. 9#Sou 20:13-15,17; Vei 19:18; VeL 5:17-19,21Basenadiotoga Mosese Yaubada yana veimea i kilumidi Yaubada yana Buki nageneye, side bani'odi i vo,
Kebu 'wa na lauobuga, kebu 'wa na luvewafa, kebu 'wa na vainago,
kebu 'wa na nuagiva mali tomotoga yadi kukua 'alo tamu yadi nani faifaina."
De'e veimeanidi wata 'ifwaidi 'adi 'itava 'aitamogana, venuakalikali. Emiavo 'wa na nuakalikaliedi taunimi 'ami nuakalikali bani'odi. 10Egavo ediavo i na nuakalikaliediga kebu 'adi fata sauluva sakoina i na 'idewai 'waidie. Begaidi 'ai'edi ta na nuakalikali, siwe 'asa'aiana 'akonadi Yaubada yana veimea matatabuna ta vevematayakeyakedi.
11I lubwainemi ma emiavo 'wa na vevenuakalikali fai tutuya de'e ta 'asetai Iesu yana vila-vaitugana i vevelilivana. Basenadi tutuyanina ta vetumagana Iesu 'waineye ta vo, Iesu yana vila-vaitugana i velilivana." We'e 'asiau ta na vo, 'Akonadi i vagamai bega i na 'ita'ita'ieda." Fai yana mai sai'afoga, kebu 'wa na 'eno'enoga, 'wa na tovoi 'wa na lulukamata. 12Lovana sai'afoga i na 'a'ava, 'aiata 'akonadi i vagamai sai'afoga i na magetai, begaidi dudubala 'ana sauluva ta na bailedi, yada sauluva magemagetadi 'waidiega ta na vevetalaga Yaubada faifaina. 13'Ida mageta 'ana tomotoga, ava'ai sauluvaga i lubwaineda ta na 'i'idewadi. Kebu 'wa na toke ufa toketokena 'wa na yemu bola nuami i na lugaugaudi 'wa na lu'avo'avovo. Kebu 'wa na ve'avula-'avo'avovo, kebu bunu 'ana nuanua sakoidi faifaidi 'wa na nuanua, ve'ikwayekwayega 'wainega kebu 'wa na ve'alamagi'ai wata kebu 'wa na ve'unumagigi. 14Kebu bani'odi 'wa na vesauluvediga, we'e mogitana taunimi 'wa na tauyemi 'ada Toveimea Iesu Keliso 'waineye i na agemi, 'wa da vo taunimi 'wa da ve'wesenimi. Wata bunu 'ana nuanua sakoidi 'ana 'idewadewa kebu faifaina 'wa na nuanua.
Atualmente Selecionado:
Loma 13: YML
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Copyright © 1984, 1988, 2025 Wycliffe Bible Translators, Inc., and SIL Papua New Guinea; CC-BY-ND-NC
