Versículos Bíblicos Populares relacionados a Isaias 40

Compartilhar

Ginpapakusog niya adton mga magluya ngan kinakapoy.

Nanluluya bisan adton mga batan-on; matutumba hin kakapoy an batan-on nga kalalaken-an. Kundi adton mga nasarig han tambulig han GINOO tatagan hin bag-o nga kusog. Malupad hira sugad hin mga agila; madalagan hira kundi diri kakapoyon; magbabaktas hira kundi diri manluluya.

Diri ka ba maaram? Waray ka ba makabati? An GINOO amo an waray kataposan nga Dyos; gintuha niya an bug-os nga kalibutan. Diri gud hiya kinakapoy o ginugul-an. Waray gud nakakatugkad han iya mga panhunahuna.

Nagoliat in usa nga tingog, “Andama didto han kamingawan an dalan para han GINOO! Tadonga an mahawan nga dalan didto han kamingawan para han aton Dyos!

Oo, nalalaya an banwa ngan nararapdag an mga bukad, kundi nagpapadayon an pulong han aton Dyos.”

Niyan igpapadayag an himaya han GINOO, ngan hikikit-an ini han ngatanan nga katawhan. An GINOO ngahaw an nagyakan hini.”

Tak-opi an tagsa nga kahamub-an, panasa an tagsa nga bukid. Pataga an kapungtoran; ngan hamisa an batoon nga tuna.

Pagmamangnoan niya an iya panon sugad hin magmarangno han mga karnero; pagtitirokon niya an nati nga mga karnero, ngan iya hira kukugoson; ngan iya aagakon adton anakan nga mga karnero.

Hangad daw ngadto ha langit! Hin-o an nagtuha han mga bitoon nga imo hinkikit-an? Hiya nga nagpagawas ha ira sugad hin hugpo hin mga sondalo; maaram hiya han kadamo hini, ngan gintagan niya hin ngaran an kada usa! Tungod han iya pagkagamhanan waray gud usa hini nga nawawara!

Ginhimo ini hadton usa nga nalingkod didto han iya trono ha igbaw han tuna ngan lahos pa han langit; an mga tawo ha ubos sugad la hin mga tubak kagudtiay pagkit-on! Ginbitad niya an langit sugad hin biray, sugad hin tulda nga pag-uokyan.

Dasiga an mga tawo han Jerusalem. Sumati hira nga igo na an ira pag-antos, ngan ginpasaylo na an ira mga sala. Ginkastigo ko na hira hin igo tungod han ngatanan nira nga mga sala.”

Nagoliat in usa nga tingog, “Igsangyaw in usa nga mensahe!” Napakiana ako, “Ano nga mensahe an akon igsasangyaw?” “Igsangyaw nga an ngatanan nga mga tawo sugad la hin banwa sugad la han mga bukad ha kapatagan nga nalalaya la dayon. Nalalaya an banwa ngan nararapdag an mga bukad kon huypon ini han ginhawa han GINOO. An mga tawo sugad la han mga banwa!

Maabot na an GINOO nga Dyos paghadi makagarahum hiya nga hadi, ngan dara niya an mga tawo nga iya gintalwas.

“Pagliawa an akon mga tawo,” nasiring an aton Dyos, “Pagliawa hira!

May-ada ba makakagtakos han kalalawdan pinaagi hin mga harop, o makakagsukol han langit pinaagi han iya mga dangaw? May-ada ba makakasulod han bug-os nga tuna dida hin usa nga tasa, o makakagtimbang han kabug-at han kabukiran ngan kapungtoran pinaagi hin timbangan? May-ada ba makakasugo han GINOO han iya pagbubuhaton? Hin-o an makakagtutdo o makakagsagdon ha iya? Hin-o ba an pinapakianhan han Dyos basi mahibaro ngan makasabot hiya ngan makakag-aram kon uunanhon an pagbuhat han mga butang?