Михей 1
1
1-тӥ ЛЮКЕТ
1Иудеяын Иоафан, Ахаз, Езекия эксэйын пукон аръёсы Самария но Иерусалим пумысен Кузё-Инмар Морасфитысь Михейлы тазьы вераз. 2«Кылзэлэ, вань калыкъёс, музъем но мар отын вань, кабыл басьтэ! Инмар Кузё-Инмар – адӟись, тӥледлы пумит Со Аслаз святой храмысеныз Ачиз мед вералоз! 3Уго тани, Кузё-Инмар Аслаз интыысьтыз потэ, васькоз но музъемлэн ӝужыт интыосыз вылэ лёгиськоз, – 4Со улын гурезьёс тыл азьысь сюсь кадь сылмозы, нёжалъёс люкиськылозы меӵ гурезьысь усись вуос кадь. 5Ваньмыз та Иаковлэн сьӧлыклэсь кышкатэк улэменыз сэрен, Израиль юртлэн сьӧлыкъёсыз понна. Кин бордысь потэ Иаковлэн сьӧлыклэсь кышкатэк улонэз? Самария бордысь ӧвӧл-а? Иудеяе кин ӝужыт интыосты пуктылӥз? Иерусалим ӧз-а? 6Со понна Самарияез бусыысь из люклы, виноград будэтон интылы пӧрмыто; изъёссэ нёжалэ зӥръяло, инъетсэ гольык кельто. 7Солэн вань сульдэръёсыз сузмытэмын луозы, азыса-калгыса поттэм вань саламъёсыз тылын сутэмын луозы; вань сульдэръёссэ-идолъёссэ куашкатыны сёто, уго азыса-калгыса поттэм кузьымъёсын со соосты пуктылӥз; азон-калгон кузьымлы ик соос пӧрмытэмын луозы. 8Та пумысен мон бӧрдо, викышъяло; талам, гольык кылем мурт кадь ветло, шакалъёс кадь вузо, страусъёс кадь бӧрдо. 9Уго вӧсь луись яраосыз Иуда доры вуизы, калыкелэн капкаосыз дорозь ик вуизы, Иерусалим дорозь. 10Та сярысь Гефын эн ивортэ, бадӟым куараен отын эн бӧрдэ; Офра гуртысен астэ пенен пызьна. 11Шафирын улӥсьёс, возьдаськон интыосыныды гольык кылемъёс, мукет интые улыны выже; Цаанын улӥсь но пегӟыны уз быгаты; Ецельысь бӧрдэм куара отчы тӥледыз дугдыны уз лэзьы. 12Марофаын улӥсь аслаз ваньбурез пумысен кайгыре, уго Кузё-Инмар дорысь шугадӟон васькиз Иерусалимлэн капкаез доры. 13Лахисын улӥсь, ожмаськон уробояд кыткы шаплыесь валъёстэ; тон Сӥон ныллэн сьӧлыканэзлэн кутскон сётӥсез, уго тон дорын Израильлэн йыружъёсыз шараяськизы. 14Соин ик тон Морешеф-Гефе саламъёс-кузьымъёс ыстылод; но Ахзив карысь Израиль эксэйёслы юрттэт уз вуы. 15Морешын улӥсь, тон доры эшшо люкет басьтӥсез ваё; со Одолламозь, Израильлэн данлыкез дорозь, вуоз. 16Туж яратоно нылпиосыд пумысен куректыса, йырысьтыд йырсидэ басьты, ӵышкы; тылыосыз усьылэм ӧрӟилэн кадь, соосын сэрен пилештэ паськытаты, уго соос тон дорысь мукет азе улыны нуэмын вал».
Atualmente selecionado:
Михей 1: УДМБИБ
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
(c) Библияез берыктонъя Институт, Хельсинки, 2013; 2016