Аггей 2
2
2-тӥ ЛЮКЕТ
1Сизьыметӥ толэзьлэн кызь одӥгетӥ нуналаз Аггей пророк пыр Кузё-Инмар кыл вераз: 2«Табере тазьы вера Иудеялэн кивалтӥсезлы, Салафиильлэн Зоровавель пиезлы, но Иоседеклэн Иисус пиезлы, быдӟым иерейлы, калыклэн кылем люкетэзлы но: 3”Кылиз-а кин ке но тӥ пӧлы та Коркалэсь азьвыл данлыксэ адӟись мурт, кыӵеен тӥ али сое адӟиськоды? Тӥляд син азяды со номыр кадь но ӧвӧл-а? 4Нош али сэзь-сэзь кариськы, Зоровавель, – шуэ Кузё-Инмар, – сэзь-сэзь кариськы, Иоседеклэн Иисус пиез, – быдӟым иерей! Сэзь-сэзь кариськы, музъем вылысь вань калык, – шуэ Кузё-Инмар. Ужалэ, Мон тӥледын, – шуэ Саваоф Кузё-Инмар. 5Египетысь потэм берады Мынам тӥледлы сётэм сӥзён-косонэ, Мынам Духе тӥ пӧлын улэ: эн кышкалэ!” 6Уго тазьы шуэ Саваоф Кузё-Инмар: эшшо одӥг пол, – со ӝоген луоз, Мон сэзъяло инмез но музъемез, зарезез но кӧс интыез, 7вань калыкъёсты зуркато, соку вань калыкъёс пӧлысь быръемъёс лыктозы, соку Мон та Коркаез данлыкен тырмыто, – шуэ Саваоф Кузё-Инмар. 8Мынам азвесе, Мынам зарние, – шуэ Саваоф Кузё-Инмар. 9Берпумезлэн храмлэн данэз азьвылэзлэсь бадӟымгес луоз, – шуэ Саваоф Кузё-Инмар; та интыын Мон тупаса улон сёто, – шуэ Саваоф Кузё-Инмар».
10Укмысэтӥ толэзьлэн кызь ньылетӥ нуналаз, Дарий кыкетӥ арзэ эксэйын пукыку, Кузё-Инмар дорысь Аггей пророклы верамын вал: 11«Тазьы шуэ Саваоф Кузё-Инмар: священникъёслэсь закон сярысь юа но соослы шу: 12кин ке но дӥсь сӧзы вылаз поныса вӧсям сӥль нуыкуз, сӧзыеныз нянь борды яке пӧзьтэм сиён борды, яке вина борды, яке вӧй борды, яке кыӵе ке сиён борды йӧтӥськиз ке, со дун-чылкыт луоз-а?» Священникъёс ответ сётыса шуизы: «Уз». 13Собере Аггей шуиз: «Нош таос борды йӧтӥськиз ке кулэм мурт борды йӧтӥськыса саптаськем мурт, соку таос саптаськозы-а?» Священникъёс ответ сётыса шуизы: «Саптаськемын луозы». 14Соку Аггей ответ сётыса шуиз: «Сыӵе со та калык, сыӵе та выжы Мон азьын, – шуэ Кузё-Инмар, – сыӵеесь соослэн киынызы лэсьтэм вань ужъёс! Кыӵе гинэ соос курбон уг ваё, ваньмыз со кырсь, саптаськемын. 15Нош али сюлэмдэс-малпандэс берлане, та нуналлэсь азьвыл ортчем дырез эскерыны берыктэ, соку Кузё-Инмарлэн храмезлы из вылэ из понэмын ӧй на вал. 16Озьы луэ вал: чумолё пушкы кызь мера тэре вал, нош мертало но тодо: отын дас мера гинэ понэмын; вина нюртон гу доры лыктыса малпало вал витьтон мера омыртыны, нош отын, зэмзэ ке, кызь мера гинэ винаез. 17Ю-няньды вылэ сынэм висён уськытыса, ӵужектытыса, ас киыныды будэтэм емыштэс йӧзорен шуккыса, тӥледыз вӧсь кари, нош тӥ Мон пала ӧд берытске, – шуэ Кузё-Инмар. 18Сюлэмдэс-мылкыддэс туннэ нуналлэн берланяз – ортчем нуналэ – укмысэтӥ толэзьлэн кызь ньылетӥ нуналэз пала берыктэ. Соку Кузё-Инмарлэсь храмзэ пуктыны кутскемын вал ни. Со нуналъёс ӵоже мар луиз, сое эскере-чаклалэ, сюлэмдэс-мылкыддэс тае тодон пала берыктэ: 19кеносъёсады кидысты вань на-а? Татчыозь виноградпуд но, смоквапу но, гранатпу но емыш ӧз на сётэ; нош та нуналысен Мон соосты бакель каро».
20Толэзьлэн кызь ньылетӥ нуналаз кыкетӥ ползэ Кузё-Инмар дорысь Аггейлы верамын вал: 21«Иудеялэн кивалтӥсезлы Зоровавельлы шу: ”Мон инэз но музъемез зуркато; 22эксэйлыкъёслэсь престолъёссэс сэрпалто, язычникъёслэн эксэйлыкъёссылэсь кужымзэс быдто, ожмаськон уробооссэс кымалто отын пукисьёсыныз валче, погыртэмын луозы валъёссы, соос вылын пукисьёс но, ог-огзылы ваче пумит мечен султозы. 23Со нуналэ, – шуэ Саваоф Кузё-Инмар, – Мон тонэ, Зоровавель, Салафиильлэн пиез, Мынам ляльчие, – шуэ Кузё-Инмар, – бордам басьто но печатез кадь возё, уго Мон тонэ бырйи, – шуэ Саваоф Кузё-Инмар”».
Atualmente selecionado:
Аггей 2: УДМБИБ
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
(c) Библияез берыктонъя Институт, Хельсинки, 2013; 2016