Амос 1
1
1-тӥ ЛЮКЕТ
1Амослэн верам кылъёсыз. Фекояын пудо возьмаса улон дыръяз со Инмарлэсь Израиль пумысен верам кылъёссэ кылӥз. Та Иудеяын Озия, нош Израильын Иоаслэн Иеровоам пиез эксэйын пукон нуналъёсы, музъем зурканлэсь кык ар азьвыл вал.
2Со шуиз: «Кузё-Инмар Сӥонысен гудыртоз, Иерусалимысен куаразэ поттоз – соку пудо возьмасьёслэн улон интыоссы бӧрдозы, Кармил гурезьлэн йылыз куасьмоз. 3Тазьы шуэ Кузё-Инмар: ”Дамасклэн куинь йыружез понна, ньыль йыружез понна уг жаля сое, малы ке шуоно Галаадэз соос корт кутэсэн кутсазы. 4Азаиллэн юртэз вылэ тыл лэзё – Венададлэсь четлыкъёссэ-юртъёссэ тыл ньылоз. 5Дамасклэсь капка ворсэтъёссэ куашкато, Авен нёжалын улӥсьёсты быдто, Еден юртысь эксэй бодыез кутыса возисез но, соку арамей калык Кире пленэ нуэмын луоз”, – шуэ Кузё-Инмар. 6Тазьы шуэ Кузё-Инмар: ”Газалэн куинь йыружез понна, ньыль йыружез понна уг жаля сое, малы ке шуоно соос вань калыкез пленэ поттӥзы соосты Едомлы сётон понна. 7Газалэн борддор вылаз тыл лэзё – солэсь четлыкъёссэ-юртъёссэ тыл ньылоз. 8Азотысь улӥсьёсты быдто, Аскалонысь эксэй бодыез кутыса возисез но быдто; Экрон вылэ киме мычо – соку филистим калыклэн кылем люкетэз быроз”, – шуэ Инмар Кузё-Инмар. 9Тазьы шуэ Кузё-Инмар: ”Тирлэн куинь йыружез понна, ньыль йыружез понна уг жаля сое, малы ке шуоно соос вань пленэ шедемъёсты Едомлы сётӥзы, агай-вынлыко кусыпъёссэс тодазы ӧз вае. 10Тирлэн борддор вылаз тыл лэзё – солэсь четлыкъёссэ-юртъёссэ тыл ньылоз”. 11Тазьы шуэ Кузё-Инмар: ”Едомлэн куинь йыружез понна, ньыль йыружез понна уг жаля сое, малы ке шуоно со аслаз выныз сьӧры мечен уйылӥськиз, ӵыжы-выжы луонзэс кулэтэм кариз; вожзэ поттыса, ялан йыркуръяськыса улӥз, ялан лекъяськыса улӥз. 12Феман вылэ тыл лэзё, соку Восорлэсь четлыкъёссэ-юртъёссэ со ньылоз”. 13Тазьы шуэ Кузё-Инмар: ”Аммон пиослэн куинь йыружзы понна, ньыль йыружзы понна уг жаля соосты, малы ке шуоно соос асьсэлэсь музъемзэс бадӟыматон понна Галаадын нуны ваёно кышноосты коразы. 14Раввалэн борддорыз вылэ тыл ӝуато – солэсь четлыкъёссэ-юртъёссэ тыл ньылоз, ожмаськон нуналэ чир кесяськыкузы, сильтӧло нуналэ тӧлпери пельтыку. 15Соослэн эксэйзы пленэ нуэмын луоз, соин ӵош солэн кивалтӥсьёсыз но”, – шуэ Кузё-Инмар».
Atualmente selecionado:
Амос 1: УДМБИБ
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
(c) Библияез берыктонъя Институт, Хельсинки, 2013; 2016