मरकुस 11
11
ईसू को यरूसलेम में आणो
(मत्ती 21:1–11; लूका 19:28–40; यहुन्ना 12:12–19)
1पछे जदी वीं यरूसलेम के भड़े जेतुन का मंगरा पे बेतफगे अन बेतनियाँ नगर में पूग्या, तो ईसू आपणाँ चेला मूँ दो जणा ने ओ केन आगला गाम में खन्दाया के, 2“थें आगला गाम में जावो। वींमें पूगताई एक गदेड़ी को बच्यो बन्दयो तको मली। जिंका पे पेल्या कुई ने बेटो तको हे, वींने खोलन अटे लावो। 3अन जदी कुई थाँने पूछे, ‘थें ओ काँ कररिया हो?’ तो थाँकाणी केज्यो, ‘परबू ने ईंकी सावना हे, पाछो परबू ईंने जट खन्दा देई।’”
4जदी वीं वटूँ पराग्या अन गेला का भड़े एक घर की पोळ में गदेड़ी को बच्यो बन्दयो तको देक्यो, तो वाँकाणी वींने खोलबा लागा। 5थोड़ाक मनक, ज्यो वटे ऊबा हा, वणा पूँछ्यो, “थाँ यो कई कररिया हो? ईं गदेड़ी का बच्या ने काँ खोलरिया हो?” 6ईसू का चेला वाँ लोगाँने आ बात अस्यान की, जस्यान ईसू वाँने बतई। ईं वाते वाँकाणी वाँने जाबा दिदा।
7पछे वे गदेड़ी का बच्या ने ईसू का नके लेन आया। वाँकाणी वींपे गाबा मेल्या अन पछे ईसू वींपे बेटग्या। 8घणा मनक वाँकी आवभगत करबा का वाते आपणाँ गाबा गेला में बसा दिदा अन घणा जणा खेताँऊँ डाळ्याँ काटन वटे नाक दिदी। 9#भज 118:25,26वे मनक ज्यो आगे हा अन ज्यो पाच्छे हा, बोलरिया हा, “परमेसर की जे हो, परबू का नामऊँ आबावाळा राजा ने परमेसर आसिरवाद दे। 10आपणाँ बड़ाबा दाऊद को राज आरियो हे, वीं राज ने परमेसर आसिरवाद दे। हरग में परमेसर की जे हो।”
11ईसू यरूसलेम का मन्दर में आया अन च्यारूँमेर हारी चिजाँ देकी। पण दन आँतवाने हो, ईं वाते वो बाराई चेला की लारे बेतनियाँ नगर में परोग्यो।
बना फळवाळो अंजीर को रूँकड़ो
(मत्ती 21:18,19)
12आगले दन जदी वे बेतनियाऊँ पाच्छा निकळरिया हा, तो ईसू ने भूक लागी। 13थोड़ाक छेटी वाँने एक अंजीर को हरियो-भरियो रूँकड़ो नजर आयो। तो वीं फळ पाबा की आस में रूँकड़ा के भड़े ग्या, पण वाँने वटे पान्दड़ाइस दिक्या, काँके अंजीर का फळ लागबा की टेम कोयने ही। 14जदी ईसू रूँकड़ा ने क्यो, “अबे कुई कदी थारो फळ ने खाई।”
वींका चेला ओ हुण लिदो हो।
ईसू यरूसलेम का मन्दर में ग्या
(मत्ती 21:12–17; लूका 19:45–48; यहुन्ना 2:13–22)
15पछे वे यरूसलेम आया अन मन्दर में ग्या, तो ईसू वाँ लोगाँने ज्यो मन्दर में बेंचबा अन लेबावाळा लेण-देण कररिया हा, ईसू वाँने बाणे निकाळबो सरू कर दिदो। तो वे रिप्या को लेण-देण करबावाळा की तकता उळट-पुळट कर दिदा अन परेवड़ा बेंचबावाळा का बाजोट्या उळट-पुळट कर दिदा। 16अन वणा किंने भी मन्दर का चोक मूँ कसी भी चिजाँ ने लेजाबा ने दिदी। 17#यसा 56:7; यर 7:11पछे वणा उपदेस देता तका क्यो, “परमेसर का बचना में ओ ने लिक्यो हे, ‘मारो घर हारई देसा का मनकाँ का वाते परातना करबा की जगाँ केवाई’ पण, थाँ ईंने ‘चोरा को ठाणो’ बणा दिदो हे।”
18जदी मुक्य याजकाँ अन मूसा का नेमा ने हिकाबावाळा ओ हुण्यो, तो वींने मारबा को गेलो होदबा लागा। पण वे वाँकाऊँ दरपता हा, काँके हारई मनक वाँका उपदेसाऊँ अचम्बा में पड़ जाता हा।
19पछे जदी दन आँतबा लागो तो ईसू अन वाँका चेला नगरऊँ बाणे निकळन पराग्या।
अंजीर का रूँकड़ाऊँ हिक
(मत्ती 21:20–22)
20आगले दन हवेर पेल्याँ जदी ईसू आपणाँ चेला के लारे जारिया हा, तो वणा अंजीर का रूँकड़ा ने जड़मूँ हूक्यो तको देक्यो। 21जदी पतरस वीं बात ने आद करन ईसुऊँ क्यो, “हो गरुजी, थाँ देको, जीं अंजीर का रूँकड़ा ने थाँ हराप दिदो हो, वो हुकग्यो हे।”
22ईसू वाँने जबाव दिदो, “परमेसर पे विस्वास राक। 23#मत्ती 17:20; 1 कुरि 13:2मूँ थाँने हाँची केऊँ हूँ, जदी कुई मंगरा ने ओ केवे के, ‘थूँ अटूँ उखड़न समन्द में जान पड़जा’ अन वींका मन में कस्यो भेंम ने वे अन परमेसर पे विस्वास राके, तो जस्यान वो केवे वस्यानीस वे जाई अन वींका वाते वस्योई वे जाई। 24ईं वाते मूँ थाँने केऊँ हूँ, थाँकाणी परातना में ज्यो भी माँगो, विस्वास करो के, वो थाँने मलग्यो। तो थें ज्यो माँगो वो थाँने मल जाई। 25#मत्ती 6:14,15अन जदी थाँकाणी परातना करबा ने ऊबा वेवो, तो कणी थाँको बुरो किदो वे, तो वींने माप कर दो। जींऊँ परमेसर ज्यो हरग में रेबावाळो थाँको बाप हे, थाँका पाप भी माप कर देई। 26अन जदी थें माप ने करो, तो ज्यो हरग में थाँको बापू हे, वो थाँने भी माप ने करी।”#11:26 कुई युनानी लेकाँ में ओ बचन कोयने हे।
ईसू का हक पे यहूदी नेता को सवाल
(मत्ती 21:23–27; लूका 20:1–8)
27एक दाण पाच्छा वीं यरूसलेम आया। ईसू जदी मन्दर का चोक में फररिया हा, तो खास याजकाँ, मूसा का नेमा ने हिकाबावाळा अन दाना यहूदी नेता हारई वाँका नके आया। 28अन पूँछ्यो, “थने ओ काम करबा को कई हक हे? ओ हक थने कूण दिदो?”
29पछे ईसू वाँने क्यो, “मूँ थाँने एक बात पूँछू हूँ, जदी थाँकाणी मने जबाव दे देवो, तो मूँ भी थाँने बता देऊँ के, मूँ ओ काम किंका हकऊँ कररियो हूँ। 30मने जबाव दो, ज्यो बतिस्मो यहुन्नो देतो हो, वो हक वींने कटूँ मल्यो परमेसरऊँ कन मनकाऊँ?”
31वीं एक-दूजाऊँ बात-बच्यार करबा लागा, “आपाँ कई केवाँ? जदी आपीं ओ केवाँ के, ‘ओ हक वींने परमेसरऊँ मल्यो हे’, तो पछे वो केई, ‘थाँकाणी यहुन्ना पे विस्वास काँ ने किदो?’ 32पण, जदी आपाँ अस्यान केवाँ, ‘वो मनकऊँ मल्यो हो’, तो लोग-बाग आपाँ पे रिस्याँ बेळी।” वीं लोगाऊँ घणा दरपता हा, काँके हारई जणा ओ मानता हा के, यहुन्नो सई में एक परमेसर का आड़ीऊँ बोलबावाळो हो। 33ईं वाते वाँकाणी ईसू ने जबाव दिदो, “में ने जाणा।”
ईं बात पे ईसू वाँने क्यो, “तो पछे मूँ भी थाँने आ ने बतऊँ के, मूँ ओ हारोई काम किंका हकऊँ करूँ हूँ।”
Atualmente selecionado:
मरकुस 11: एम टी आर
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
(c) 2010-2017, New Life Computer Institute. All rights reserved