أيث-روما 10
10
1 ينَّا-ٱسن بُوْلُس: آي اَيثْمَا، مشْحَاڒ تْمنِّيغ س وُوْڒ ينُو تْࢲَادْجِيغ إِ أَربِّـي اَذ تنْجم لْأُمَّا ينُو. 2نش شهّْذغ خَاسن رزُّوْن اَذ ݣّن لْوَاجِب اَك أَربِّـي، وَلَكِن وَار سِّينن شَا اَذ ݣّن لْوَاجِب. 3وَامِي وَار سِّينن شَا مَامّش يݣَّا أَربِّـي يسمْصْڒَاح اَكِذس بْنَاذم، كَّرن نِثْنِي ذْفَارن اَبْرِيذ نْسن نِّيث وَار قْبِيڒن شَا اَبْرِيذ ن أَربِّـي. 4لِأَنَّا لْمَسِيح ذَايس ذِي نتَّا إِي ثْكمّڒ شَّرِيعَا حمَا مَارَّا وِي زَّايس غَا يَامْنن اَذ يمصْڒَاح اَك أَربِّـي.
مَارَّا يوْذَان زمَّرن اَذ نجْمن
5شُوْف، مَامّش يدْجَا وبْرِيذ ن صُّلْح عْلَاحْسَاب شَّرِيعَا؟ يُوْرَا خَاس مُوْسَى ينَّا: مَارَّا وِي غَا يخذْمن س ثْمسْڒَايِين-أَ ثِيْنَا، أَتَاف اَزَّايْسنْت يعِيش. 6وَلَكِن مِين يقَّار لْكِتَاب خ ونِّي يرزُّوْن اَذ يمصْڒَاح اَك أَربِّـي اَزَّايس يَامن؟ ئِقَّار: وَار قَّار شَا ذݣ وُوْڒ نّش: مِين يعْنَا وِي غَا يݣَعّْذن غَار وجنَّا (يعْنِي بَاش اَذ د يسهْوَا لْمَسِيح)؟ 7نِغ: مِين يعْنَا وِي غَا يهْوَان غَار ڒَادْجغ بْڒَا ڒَاحدّ (يعْنِي بَاش اَذ د يَارّ لْمَسِيح زݣ يِنِّي يمُّوْثن)؟ 8إِيوَا مِين يقَّار لْكِتَاب؟ ئِقَّار: <أَوَاڒ-أَ يُوْذس إِ شك، أَقَاث ذݣ وقمُّوْم نّش ذ وُوْڒ نّش.> يعْنِي اَوَاڒ-أَ نتَّا ذ لإِيمَان إِي زِي نتْحدَّاث. 9قَا مڒَا ثْشهْذذ س وقمُّوْم نّش إِلَّا عِيْسَى ذ سِيذِيش، مڒَا ثُوْمْنذ س وُوْڒ نّش إِلَّا أَربِّـي يسكَّر-يث-يذ زِي ڒْموْث، أَتَاف اَذ تْنجْمذ. 10لِأَنَّا س وُوْڒ نّش شك تَامْنذ، أَش يسمْصْڒَاح أَربِّـي اَكِذس. أُو س وقمُّوْم نّش شك ثْشهّْذذ، شك ثْنجْمذ. 11أَقَا لْكِتَاب يقَّار: <مَارَّا ونِّي زَّايس غَا يَامْنن وَار ث يتْخِيِّيب شَا.> 12لِأَنَّا وَار ذِنِّي بُو ڒْفَارْق جَار يئِسْرَائِيليْين ذ يِنِّي وَار يدْجِين شَا زِي أَيث-إِسْرَائِيل مِينْزِي سِيذِي أَربِّـي ذ يجّن، أَقَاث خَانغ مَارَّا. ئِتنْفيَّاض-د ڒْخِير نّس خ مَارَّا ونِّي خَاس يتْڒَاغَان. 13أَقَا <مَارَّا ونِّي إِي غَا يڒَاغَان س يِيسم ن سِيذِي أَربِّـي اَتَاف اَذ ينْجم.>#10.13 خْزَر لْكِتَاب ن نَّبِي وَائِل 2:32.
14إِذن، مَامّش غَا ݣّن اَذ ڒَاغَان خ ونِّي إِي زِي وَار يُوْمِينن شَا؟ مَامّش غَا ݣّن اَذ اَمْنن زݣ ونِّي ؤُمِي وَار خَاس سْڒِين شَا؟ مَامّش غَا ݣّن اَخَاس سْڒن مڒَا وَار ذَاسن يتْحدِّيث حَدّ؟ 15أُو مَامّش غَا ݣّن اَذ حدّْثن مڒَا وَار ذَاسن د يسّكّ حَدّ؟ أَقَا يقَّار لْكِتَاب: <مشْحَاڒ صبْحَان يضَارن ن يِنِّي يتْبشَّارن س لْإِنْجِيل.> 16لْإِنْجِيل وَلَكِن وَار ث قْبِيڒن شَا مَارَّا يوْذَان. أَقَا مِين يقَّار نَّبِي إِشَعْيَا زِي زْمَان: <آ سِيذِي أَربِّـي، وِي يُوْمْنن س مِينْزِي نتْبشَّار؟> 17فَلِهَذَا، لإِيمَان يتَاس-د زِي مِين نتْسْڒَا، أُو مِين نْتسْڒَا نتَّا ذ اَوَاڒ ن لْمَسِيح.
18وَلَكِن نش تْسقْسِيغ، مَا وَار سْڒِين شَا؟ وَاه، سْڒِين. أَقَّا مِين يقَّار لْكِتَاب:
<ذِي مَارَّا ثَمُوْرْث يفّغ-د صُّوْت نْسن،#10.18 يعْنِي، صُّوْت ن يِنِّي يتْبشَّارن.
أَوَاڒن نْسن ؤُوْضن اَڒ ڒَاحدّ ن دُّنشْت.>
19عَاوذ نش تْسقْسِيغ، أَيث-إِسْرَائِيل مَا وَار فْهِيمن شَا؟ ذ اَمزْوَارُو ينَّا-ٱسن مُوْسَى:
<أَكنِّيو جّغ اَذ تْحسْذم يِنِّي وَار يدْجِين شَا ذ لْأُمَّا،
أَكنِّو سْعصّْبغ س يِجّن ن لْأُمَّا وَار يفهّْمن.>
20منْبَعْد يزْعم نَّبِي إِشَعْيَا ينَّا:
<يِنِّي وَار خَافي يرزُّوْن شَا ؤُفِين-اَيِي،
سْمظْهَارغ-د يخف ينُو إِ يِنِّي وَار خَافِي يتْسقْسِين.>
21وَلَكِن خ أَيث-إِسْرَائِيل يقَّار:
<نش يفَاسّن ينُو ضڒْقغ-ثن-د نْهَار يكْمَاڒ
غَار يِج ن شَّعْب يعْصَان، ذَايْسن ثَغنَّانْت.>
Atualmente selecionado:
أيث-روما 10: ريف
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão