1 أيث-كورينث 4
4
ڒْخذْمث ن اَرُّسُل
1شُوْف، أَمُّو يتْخصَّا اَذَانغ ࢲرن يِوْذَان يعْنِي نشِّين ذ يخدَّامن ن لْمَسِيح، نشِّين نتْكلَّاف خ ثْمسْڒَايِين ينُوْفَّرن ن أَربِّـي. 2أُو لَابُد يِنِّي يتْكلَّافن يتْخصَّا اَذَايْسن ثِيڒِي تِّيقث. 3نش وَار ذَايِي يتْهِيمِّي شَا اَطَّاس مڒَا تْحَاكَامم-اَيِي كنِّيو نِغ ذ شَان لْمَحْكَامَا نّغْنِي. ؤُڒَا ذ نش وَار دْجِيغ بُو ذ ڒْقَاضِي خ يِيخف ينُو. 4نش ضَّمِير ينُو مرْتَاح إِي يدْجَا، وَلَكِن نش مَا بَرِيء إِي دْجِيغ عْلَاحْسَاب ضَّمِير ينُو؟ لَّا، ذ سِيذِي أَربِّـي إِي ذَايِي غَا يُوْشن ڒْحُكم-أَ. 5خ مَانَايَا وَار قَّارم وَالُو خ ڒْحُكم قْبڒ ڒْوقْث، يعْنِي قْبڒ إِي د غَا يَاس سِيذِيثْنغ. ذ نتَّا إِي غَا يسْبيّنن ثِمسْڒَايِين نِّي غَار نُّوْر ڒخُّو نُوْفَّرنْت ذِي ثَادْجسْت، أَذ د يسْمظْهَار كُڒ لْغَرَض ن يِوْذَان إِي غَارْسن ذݣ وُوْڒَاون نْسن. ڒخْدّنِّي كُڒ يجّن اَغَارس يِيڒِي وسمْغَار نّس زِي أَربِّـي.
6آي اَيثْمَا قَّارغ مَانَايَا خ أَپُـوْلُّوْس ذ نش، مثّْلغ مَانَايَا حمَا اَزَّايس ثَاوِيم نّْفَع. كنِّيو اَذ تْڒمْذم زَّايْنغ مِين يعْنَا لْمِثَال نِّي يقَّارن "وَار تْبعَّاذث شَا زِي مِين يُوْرِين ذِي لْكِتَاب." أَمنِّي وَار ذِنِّي حَدّ اَذ يسشْنع شَان ورْيَاز خ ونّغْنِي. 7شك، وِي ش يسْشنْعن خ ونّغْنِي؟ كُڒ ڒْحَاجث إِي غَارك ثمُّوْش-اَش نِغ لَّا؟ ئِي شك، وَامِي يمُّوْش-اَش مَانَاينِّي مَايمِّي تفْتَخَرذ اَخْمِي وَار ذَاش يمُّوْش شَا؟
8كنِّيو، مَا صَـــافِي غَارْوم مَارَّا مِين تحْذَاجِيم؟ مَا صَـــافِي كنِّيو ثْذوْڒم ذ تْوَاجَر؟ كنِّيو، مَا ذ صَّح ثْذوْڒم ذ يزدْجِيذن بْڒَا نشِّين؟! إِيوَا مشْحَاڒ خْسغ بَاش اَذ يِيڒِي ذ صَّح كنِّيو تحْكَامم حمَا اَذ تْشَرْشم اَكِذْنغ ڒحْكَام نِّي نْوم. 9لِأَنَّا تْفكَّرغ بلِّي نشِّين اَرُّسُل يسْفُوْرُّوْج-اَنغ أَربِّـي ذ ينݣُّوْرَا ذِي لْملْعَب، يعْنِي نشِّين اَم يِوْذَان حكْمن خَاسن س ڒْموْث اَذ مّْثن ذِنِّي. ئِݣَّا-ٱنغ أَ نسْفُوْرُّوْج دُّنشْت-أَ ثكْمَاڒ، يعْنِي يوْذَان ذ لْمَلَائِكَاث. 10نشِّين ذ يبُوْهَاڒِيْين زَعْمَا عْلَاحْسَاب لْمَسِيح، ئِي كنِّيو مَا ذ يمِيغِيسن ذِي لْمَسِيح؟ نشِّين نضْعف، ئِي كنِّيو مَا ثْجهْذم؟ كَرّْمن-كنِّيو، نشِّين سْبهْدَاڒن-اَنغ. 11قَا عَاذ ذِي ثْسَعَّات-أَ ندْجُوْز، نْفُوْذ، أَقَانغ س يخَارْطِيطن، تْمَرَّاثن-اَنغ، وَار غَارْنغ مَانِي غَا نْدُوْرَّا. 12نشَّاث تَمَارَا، نْخدّم س يفَاسّن نّغ. مڒَا نِثْنِي تْزبَّاڒن ذَايْنغ، نشِّين نتْبَرَّاك-يثن. مڒَا نِثْنِي تْعدَّابن-اَنغ، نشِّين نْصبَّر. 13مڒَا نِثْنِي قَّارن خَانغ ڒْبَاطڒ، نشِّين نْتَارَّا-د خَاسن س يِجّن ن لْإِحْسَان. قَا نشِّين عَاذ اَڒ ڒخُّو نذْوڒ اَم ثْزوْبَايْث ن دُّنشْت-أَ ذ زْبڒ ن مَارَّا يوْذَان.
14مَاشِي ؤُرِيغ ثِمسْڒَايِين-أَ بَاش اَكنِّيو فضْحغ؛ لَّا، ؤُرِيغ-ثنْت بَاش اَكنِّيو نْهِيغ اَم شَا ن ثَارْوَا ينُو يعِيزّن. 15وَاخَّا اَكِذْوم عشْرَاڒَاف ن لْمُربِّيِين ذِي لْمَسِيح، وَار غَارْوم شَا اَطَّاس ن بَابَاثْوم. لِأَنَّا ذِي عِيْسَى لْمَسِيح نش ذ بَابَاثْوم ذِي لْإِنْجِيل. 16إِذن، تْشجَّاع-كنِّيو اَذَايِي ثْقلّْدم مَامش تݣّغ نش. 17خ مَانَاينِّي إِي خف كنِّيو د سّكِّيغ تِيْمُوْتَاوُس. نتَّا يعِيزّن خَافِي اَم شَان ممِّي، ذَايس تِّيقث ذِي سِيذِيثْنغ. أَكنِّيو يسْفكَّر خ يبْرِيذن ينُو ذِي لْمَسِيح مَامّش ثن سڒْمَاذغ ذِي مَارَّا يمُوْشَان ذ مَارَّا ثِجُمَاع ن ڒْمُوْمِنِين.
18فَا ڒبْعَاض زَّايْوم ذَايْسن تَّكبُّر، تْغِير-اَسن نش وَار غَارْوم د تِيسغ شَا. 19لَّا، قَا عْڒَاين اَغَارْوم د اَسغ مڒَا يخس أَربِّـي. يِنِّي إِي ذِي يدْجَا تَّكبُّر اَثن سّْنغ نش. مَاشِي اَثن سّْنغ مِين قَّارن؛ لَّا، أَثن سّْنغ مَا ذَايْسن شَان جّْهذ مَا لَّا. 20لِأَنَّا ڒْمُلْك ن أَربِّـي وَار يدْجِي بُو ذݣ وَاوَاڒ؛ لَّا، أَقَاث ذِي جّْهذ. 21مَامش ثْرزُّوْم اَذ د اَسغ؟ مَا س وعْمُوْذ مَا س ڒمْحِبّث اَك يِجّن ن وُوْڒ يصبَّرن؟
Atualmente selecionado:
1 أيث-كورينث 4: ريف
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão