मरकुस 11
11
यरूसलेम म ईसु की जे-जैकार
(मत्ती 21:1–11; लूका 19:28–40; यहून्ना 12:12–19)
1जद बे यरूसलेम क सांकड़ै जेतून डूँगर की ढाळ प बसेड़ी बेतफगे अर बेतनिया नगरी क कनै आया जणा ईसु आपका चेला मऊँ दो जणानै अंय्यां बोलर अगाऊ भेज्यो, 2“थे आगला गाँव म जाओ। थानै बि गाँव म एक गधेड़ी को बच्यो बांदेड़ो मिलसी जिनै इब ताँई कोई काम म कोनी लिओ ह बिनै खोलर ल्याओ। 3अर थानै कोई बुजै थे ओ काँई करो हो? थे बानै बोलज्यो ‘ओ परबुनै चाए ह’ अर बे थारै सागै बिनै भेज देसी।”
4बे जार बि गधेड़ी का बच्यानै गळिआरा म कुआड़ा क भंदेड़ो देखर बिनै खोलबा लाग्या 5बठै खड़्या मिनखा मऊँ कई मिनख बानै बोल्या, “थे काँई करो हो, इनै क्याले खोलर्या हो?” 6जंय्यां ईसु बानै आदेस दिआ हा, बंय्यांई बे बा मिनखानै बोल्या अर बे बाकी बात सुणर बानै गधेड़ी का बच्यानै लेज्याबा दिओ। 7बे गधेड़ी का बच्यानै ईसु कनै लेग्या, अर बिपै आपका गाबा गेर्या अर ईसु बिपै बेठगो। 8जद ईसु बि बच्या प बेठर जार्यो हो जणा लोग गेला म आपका गाबा बिछाबा लाग्या अर कई लोग खेताऊँ हरी-भरी डाळ्यां का'टर आवभगत करबा ताँई बिछा दि। 9अर जत्ताबी मिनख ईसु क आगै-पिछै हा बे जोर-जोरऊँ जे-जैकार कर बोलर्या हा,
“परबु की मेमा हो, ओ परबु क नामऊँ आर्यो ह इनै परमेसर आसिरबाद दे।
10म्हारा बडका दाऊद को राज आर्यो ह इनै परमेसर आसिरबाद दे। ओ म्हान ह ईस्बर नगरी म परबु की मेमा हो!”
11ईसु यरूसलेम पुग्यो अर बठै मनदर म गयो अर बठै बो च्यारूमेर की सगळी चिजानै देख्यो अर मोड़ो होगो जणा बो आपका चेला क सागै बेतनिया गयो।
अंजीर क पेड़नै दूरसिस देणो
(मत्ती 21:18,19)
12आगला दिन जद बे बेतनिया मऊँ चाल पड़्या जणा ईसुनै भूख लागी। 13ईसु दूरऊँ एक अंजीर को पेड़ देख्यो जखो हर्यो-भर्यो हो बो बिकन गयो जिऊँ बिका फळ खा सकै। पण बि पेड़ म पत्तानै छोडर क्युंई कोनी हो। क्युं क बा अंजीर का फळा की रुत कोनी ही। 14ईसु बि पेड़ऊँ बोल्यो, “इबऊँ तेरो फळ कोई कदैई कोनी खासी।” अर इ बातनै ईसु का चेला सुणर्या हा।
ईसु मनदर म गयो
(मत्ती 21:12–17; लूका 19:45–48; यहून्ना 2:13–22)
15जद बे यरूसलेम आया, जणा ईसु मनदर म गयो अर बठै जत्ताबी बेचबाळा अर खरीदबाळा हा बानै बठैऊँ बारनै काडबा लाग्यो। रिपीआ को लेणदेण करबाळा का पाटियानै बगा दिओ अर कबूतर बेचबाळा का पाटियानै उंदो कर दिओ। 16अर मनदर मऊँ कोईनैई क्युंई कोनी लेज्याबा दिओ। 17इकै पाछै बो बानै सीख देतो होयो बाऊँ बोल्यो, “पबितर सास्तर म मंडर्यो ह,
‘मेरो मनदर धरती का सगळा कूणबा का मिनखा ताँई अरदास को घर होसी।’ पण थे इ घरनै डाकूआ की खोळ बणा दि।”
18अर जद परधान याजक अर धरमसास्तरी ईसु की इ बातनै सुणी बे ईसुनै मारबा को गेलो ढुंढबा लाग्या। पण भीड़ ईसु क परबचना म रमर बिकै सागै ही इ बजेऊँ बे ईसुनै मारबाऊँ डरै हा। 19अर दिन आथगो जणा बे यरूसलेम नगरीऊँ बारनै चलेग्या।
सूकेड़ा अंजीरऊँ सीखाबो
(मत्ती 21:20–22)
20आगला दिन जद ईसु आपका चेला क सागै जार्यो हो जद बे बि अंजीर का पेड़नै पत्ताऊँ लेर जड़ ताँई सूकेड़ो देख्यो 21अर पतरसनै ईसु की बोलेड़ी बात याद आई बो ईसुनै बोल्यो, “ओ गरूजी देखो जि पेड़नै थे दूरसिस दिआ हा बो सूकग्यो ह!” 22ईसु बाऊँ बोल्यो, “परमेसर म बिस्वास राखो 23#मत्त 17:20; 1 कुरन्थी 13:2म थानै सची-सची खेऊँ हूँ ज कोई इ डूँगरऊँ ओडावै क ‘तू अठैऊँ हटर समदर क मांयनै डूबज्या’ अर बि मिनख क हिया म इ बात प जमाई भेम नइ होवै पण इकै बदला म पूरो बिस्वास होवै जणा जंय्यां बो आपका मुंडाऊँ बोल्यो बि ताँई बंय्यांई होज्यासी। 24जणाई म थानै खेऊँ हूँ थे अरदास म ओ बिस्वास कर माँग्या करो क थे जोक्यु बी माँगर्या हो बो थानै मिलगो ह जणा बो थानै मिल ज्यासी। 25#मत्त 6:14,15अर जद थे अरदास करबा लागो जदई थे बा मिनखानै माफ करो जखा थारो बुरो कर्यो ह जिऊँ थारो परम-पिता जखो ईस्बर नगरी म ह बो थारा पाप माफ करसी। 26(अर थे बिनै माफ कोनी करो जणा थारो बाप जखो ईस्बर नगरी म ह बो बी थारा पाप माफ कोनी करसी।”)#11:26क्युंक मानी-थानी हाताऊँ मांडेड़ी पुराणी पोथ्या म अ बाता कोनी।
ईसु क हक प यहूदि नेता को सुवाल
(मत्ती 21:23–27; लूका 20:1–8)
27बे ओज्यु यरूसलेम म आया। ईसु मनदर म घूमर्यो हो जद परधान याजक, सास्तरानै सीखाबाळा अर यहूदि नेता ईसु कनै आया। 28अर बे ईसुनै बोलबा लाग्या, “तू अ काम किका हकऊँ करै ह अर ओ हक तनै कूण दिओ ह?” 29ईसु बाऊँ बोल्यो, “म बी थानै एक सुवाल बुजूँ ज थे मनै इ सुवाल को जुबाब देद्यो जणा म बी थानै बता देस्युँ क म ओ काम किका हकऊँ करूं हूँ? 30थे बताओ यहून्नानै पाणी को बतिस्मो देबा को हक परमेसरऊँ मिल्यो क मिनखाऊँ?” 31बे ईसु की इ बातनै सुणर आपसरी म बतळाबा लाग्या, बे बोल्या, “ज आपा खेवां बिनै परमेसरऊँ हक मिल्यो ह जणा ईसु आपानै खेसी क, ‘थे बिपै बिस्वास क्युं कोनी कर्या।’ 32अर आपा खेवां, बिनै मिनखाऊँ हक मिल्यो हो जणा अ लोग आपणा प झाळ काडसी, क्युं क अ लोग यहून्नानै परमेसर की खेबाळो मानी हीं।” 33इ बजेऊँ बे ईसुनै बोल्या, “म्हें कोनी जाणा क बिनै ओ हक कठैऊँ मिल्यो हो?” ईसु बाकी इ बातनै सुणर बाऊँ बोल्यो, “म बी थानै कोनी बताऊँ क म किका हकऊँ ओ काम करूं हूँ।”
Atualmente selecionado:
मरकुस 11: एस डब्लु वी
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
(c) 2010-2017, New Life Computer Institute. All rights reserved