काम 17
17
थिसलूनिकी नगरी म पोलुस अर सीलास
1इकै पाछै बे अम्फिपुलिस अर अपुलोनिया होताहोया थिसलूनिकी म आया, जठै यहूदि मिनखा की एक अरदास करबाळी झघा ही। 2पोलुस आपकी बाण गेल बाऊँ मिलबा गयो अर बाऊँ यहूदिआ क तीन अरामहाळा दिन सास्तर का बचनानै लेर चरचा करी। 3अर धरमसास्तर को बखान कर आ साबित कर्यो क दुख भोगबो अर मरेड़ा मऊँ जिंदो होबो मसी ताँई जरूरी हो। सागैई बो आ बी बोल्यो क, “ईसुई छुटकारो देबाळो राजा ह। जिकी बाता म थानै बताऊँ हूँ।” 4बामैऊँ क्युंक जणा बिस्वास कर्या अर पोलुस अर सीलास म जार मिलगा। अंय्यां का बोळा परमेसर का भगत यूनानी मिनख अर मानी-थानी लूगाया बी अंय्यांई करी।
5इपै यहूदि जळता-बळता पिसा देर क्युंक बदमास मिनखानै आपकै सागै कर लिओ अर नगरी म बिदरो मचाबा लागगा। बे पोलुस अर सीलासनै भीड़ क सामै ल्याबा क चकर म यासोन क घरा धावो बोल्यो। 6बठै बानै बे कोनी लाध्या जणा बे यासोन अर क्युंक भायानै नगरी का अधिकारीया क कनै लेग्या अर चिलार कह्या, “बे सगळी दुनिया का मिनखा म उथल-पुथल मचार इब अठै आया हीं।” 7यासोन बानै आपकै घरा राख्यो अर अ सगळा बोली हीं ईसु नाम को कोई ओर राजा ह, अर अ रोम का राजा कैसर को आदेस कोनी मान्यो। 8आ सुणर नगरी का मिनख अर नगरी का अधिकारी लाल-ताता होगा। 9जणा अधिकारी यासोन अर दुसरा बिस्वास्यानै जमानत लेर छोड दिआ।
बिरीया नगरी म पोलुस अर सीलास
10जणा बठै का बिस्वासी भाईड़ा पोलुस अर सीलासनै रात्यु-रातई बठैऊँ बिरीया भेज दिआ अर बे बठै पुगर सिदा यहूदिआ क अरदास करबाळी झघा गया। 11अठै का यहूदि थिसलूनिकी का यहूदि मिनखाऊँ चोखा हा अर बे पूरा मनऊँ बचननै अपणाया अर बे रोजकी बाकी बोलेड़ी बातानै सास्तर म टोता हा क बे बंय्यांई ह क कोनी। 12जिऊँ बोळा मिनख बिस्वास कर्या अर बामै यूनानी मिनख अर मानी-थानी लूगाया ही। 13अर जद थिसलूनिकी का यहूदि मिनखानै ओ बेरो पड़्यो की पोलुस बिरीया म बी परमेसर को बचन सुणार्यो ह जणा बे बठै आर भीड़नै बाकै खिलाप भर दिआ। 14जणा बठै का मसी भाईड़ा तावळासा पोलुसनै बिदा कर समदर किनारै भेज्या पण सीलास अर तिमूतियूस बिरीया मई रेह्गा। 15पोलुस का साती बिनै एथेंस नगरी ताँई छोडर बिको ओ आदेस लेर आया क सीलास अर तिमूतियूस मेर कनै बेगाऊँ बेगा आवै।
एथेंस म पोलुस को परचार
16पोलुस जद एथेंस म उडिकर्यो हो। जणा बो बि नगरी म मूरत्या की भरमार देखी अर बानै देखर बिकी अन्तर-आत्मा बोळी दुखी होई। 17जि बजेऊँ बो अरदास करबाळी झघा म यहूदि अर गैर-यहूदि मिनखा क सागै जखा परमेसर का भगत हा। अर रोजकी चोक म आबाळा जाबाळा क सागै बी चरचा करतो हो। 18बठै बो क्युंक एपिकूरी अर स्तोइकी ज्ञानी मिनखा क सागै बी चरचा करी। क्युंक मिनख कह्या, “ओ गेलो म्हारूँ काँई खेबो चावै ह?” अर क्युंक खेता हा, “लागै ह क ओ कोई पराया देवता की बात करै ह।” क्युं क बो ईसु अर बिकै मर्या पाछै ओज्यु जीबा का चोखा समचार को परचार करतो हो। 19जणा बे बिनै अरियुपगस#17:19 एथेंस का ज्ञानी मिनखा की एक टोळी जखा न्याय करबाळा की जंय्यां हा। की सभा म लेग्या अर बिऊँ बुज्या, “थे आ कूणसी नई सीख देर्या हो। 20थे म्हानै अणजाणी सीख बताओ हो, जणाई म्हें आको मतबल जाणबो चावां हां।” 21सगळा एथेंस का रेह्बाळा अर दुसरा देसाऊँ आर बसेड़ा परदेस्या को करीब-करीब सगळो टेम नई-नई बाता खेबा अर सुणबा मई बिततो हो।
22अरियुपगस की भरी सभा म पोलुस खड़्यो होर बोल्यो, “एथेंस म रेह्बाळो म आयो जणाऊँ देखबा लागर्यो हूँ क थे सगळी बाता म बोळा धरमी हो। 23म जद हांडतो-फिरतो थारी पूजबा की चिजा देख्यो हो जणा बठै मनै एक अंय्यां की बेदी दिखी जिपै मंडर्यो हो अणजाण देवता ताँई। थे जि ईस्बरनै बिना जाण्या पूजो हो म थानै बि ईस्बर क बारां मई बताऊँ हूँ। 24#काम 7:48बो परमेसर जखो इ सरस्टि अर इपै जोक्यु बी दिखै ह बिनै बणायो अर बोई ईस्बर नगरी अर धरती को मालिक ह। बो हाताऊँ बणाएड़ा देवरा म कोनी रेह्वै। 25बिनै काँई बात की कमी? जखो बो मिनखा की सेवा लेवै? बो तो सगळा जिवांनै सांस, जीवन अर सक्यु देवै ह। 26बो एकई मिनख क जरिए इ धरती प च्यारूमेर मिनख फेलाया। अर बाका टेम अर परदेसा की सीमा ते करी। 27अर बो अंय्यां इ ताँई कर्यो क, मिनख बिनै टोवै अर बिनै पावै, पण बो आपणाऊँ दूर कोनी ह। 28क्युं क क्युंक बोली हीं, ‘बिमैई आपणा पिराण, बिमैई आपा डोला-फिरां हां अर बिमैई आपणो बजूद ह।’ जंय्यां क थारा कबी बोलगा क, ‘आपा बिका टाबर हां।’ 29अर आपा परमेसर का टाबर हां, जणा आपानै ओ समजबो चाए क परमेसर आपणै हातऊँ घड़ेड़ी सोना-चाँदी अर भाठा की चिजा जंय्यां को कंय्यां हो सकै ह? 30परमेसर बि टेम का मिनखा को लेखो कोनी लेबो चायो जद बे बिनै कोनी जाणता हा, पण इब बो हुकम देवै ह क सगळी धरती का सगळा मिनख पापऊँ तौबा करै। 31क्युं क एक दिन परमेसर पेल्याऊँ ते करेड़ा मिनख क हातऊँ#17:31 ते करेड़ा मिनख क हातऊँ ईसु जगत का मिनखा को सचाई क सागै न्याय करसी। इ बात को सबूत देबा ताँई परमेसर बिनै मरेड़ा मऊँ जीवायो।” 32मरेड़ा मऊँ ओज्यु जीबा की बात सुणर क्युंक मिनख बिपै हसबा लागगा। अर क्युंक बिऊँ बोल्या की, “इ बारां म म्हें ओज्यु कदै सुणस्यां।” 33जणा पोलुस बठैऊँ चलेगो। 34इकै पाछै कई मिनख बिस्वास कर्या अर बिकै गेल गया। आ मिनखा म अरियुपगस सभा को एक मिनख जिको नाम दिओनुसीस अर दमरिस नाम की एक लूगाई अर ओर बी बोळा मिनख हा।
Atualmente selecionado:
काम 17: एस डब्लु वी
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
(c) 2010-2017, New Life Computer Institute. All rights reserved