Naanearü ügüchiga 2
2
1Rü yemaacü ningu i ngẽma daxũwa ngẽxmagüxü̃ rü ñoma i naane rü guxü̃ma i nawa ngẽxmagüxü̃.
2Rü yexguma norü 7 ga ngunexü̃wa nanguxgu rü Tupana rü marü nayanguxẽxẽ ga guxü̃ma ga yema naxüxü̃. Rü inarüngü̃.
3Rü yexguma ga Tupana rü mexü̃ namaxã naxuegu ga yema norü 7 ga ngunexü̃. Rü nüxü̃ nixu nax noxrü yixĩxü̃ ga yema ngunexü̃ yerü nagu inarüngü̃ nawa ga guxü̃ma ga yema puracü ga naxüxü̃.
4Rü yemaacü nixĩ ga naxüxü̃ i ngẽma daxũwa ngẽxmagüxü̃ rü ñoma i naane rü guxü̃ma i nawa ngẽxmagüxü̃.
Naane ga Edéü̃wa nayexma ga yatü
5Rü yexguma Cori ya Tupana noxri naxü̱xgu i ngẽma daxũwa ngẽxmagüxü̃ rü ñoma i naane, rü nataxuma ga nanetügü, rü taxũta narüxügü ga natüanegü yerü Tupana rü taxũta naaneétügu nanapuxẽxẽ. Rü nataxuma ga duü̃xü̃ ga nüxna dauxü̃ ga nanetügü.
6Natürü ga yema naane rü nanaxaiyaãchi nax guxü̃wama yawaianexü̃ca̱x.
7Rü yexguma Cori ya Tupana naxü̱xgu ga gumá yatü, rü waixü̃müte̱xewa nanaxü. Rü naraü̃gu nacue rü yemaacü maxü̃ nüxna naxã. Rü yexguma namaxü̃ã̱x ga yatü.
8Rü yemawena ga Cori ya Tupana rü inanató ga wüxi ga mexẽchixü̃ ga naane ga Edéü̃wa ga éstewaama yexmaxü̃. Rü yemagu nanamu ga gumá yatü ga nüma naxüãcü.
9Rü yemawa nanaxügüxẽxẽ ga naguxü̃raü̃xü̃ ga mexẽchixü̃ ga nanetügü ga chi̱xégaarü oṍxü̃. Rü yema naanearü ngãxü̃gu nanato ga yema nanetü ga maxü̃ nawa yexmaxü̃. Rü inanató ta ga yema nanetü ga nawa nüxü̃ icuáxü̃ i mexü̃ rü chixexü̃.
10Rü yema naane ga Edéü̃gu ãégaxü̃wa ne nada ga wüxi ga natü ga yawaimüanexẽẽxü̃ ga yema naane. Rü yéma Edéü̃wa nixĩ ga inaxügüxü̃ ga nax naxãgümücüchacüüxü̃ ga yema natü.
11Rü yema wüxi ga nachacüxü rü Pichóü̃gu naxãéga, rü yema nachacüxü nixĩ ga yawaimüanexẽẽxü̃ ga Abiráane ga úiru nawa yexmaxü̃.
12Rü yema úiru ga yema naanewa yexmaxü̃ rü namexẽchi. Rü ngẽxgumarüxü̃ ta i ngẽma naanewa rü nayima ya yima nai ya pumara nagüwa ixüxüne. Rü nayima ta ya nuta ya nga̱xãẽruxü̃ ya ónichegu ãégacü.
13Rü yema to ga nachacüxü rü Guióü̃gu naxãéga, rü yema natü rü Cúxarü naanegu nipogüchigü.
14Rü yema norü tomaepü̱x ga nachacüxü rü Tígrigu naxãéga, rü Achíriaarü naanearü éstewaama nada. Rü yema norü ãgümücü ga nachacüxü rü Eufrátegu naxãéga.
15Rü yexguma Cori ya Tupana yema naane ga Edéü̃wa nayexmaxẽẽgu ga gumá yatü rü nanamu nax mea nüxna nadauxü̃ca̱x ga guxü̃ma ga yema naanewa yexmaxü̃.
16Rü nüma ga Cori ya Tupana rü nanaxucu̱xẽ rü ñanagürü nüxü̃: —Marü name i cunangõ̱x i guxü̃ma i ñaa naanewa ngẽxmaxü̃ i nanetügüarü o.
17Natürü ngẽma nanetü i cua̱x i mexü̃ rü cua̱x i chixexü̃ nawa ngẽxmaxü̃, rü taxũtáma cunangõ̱x i norü o. Erü ngẽxguma tá cunangõ̱xgux rü cumaxã nüxü̃ chixu rü tá cuyu —ñanagürü.
18Rü yexguma ga Cori ya Tupana rü ñanagürü: —Tama name nax nüxica nangẽxmaxü̃ ya yatü. Rü ngẽmaca̱x tá chanaxü i wüxi i namücü nax norü ngü̃xẽẽruxü̃ i nüxü̃́ mexü̃ yixĩxü̃ca̱x —ñanagürü.
19Rü nüma ga Cori ya Tupana rü waixü̃müte̱xewa nanaxü ga naguxü̃raxü̃xü̃ ga naeü̃gü rü werigü. Rü gumá yatüxü̃tawa nanagagü nax nüma yaxüégaãxü̃ca̱x. Rü nüma ga gumá yatü rü nayaxüéga ga guxü̃ma ga yema naeü̃gü ga naxü̃nagü ixĩgüxü̃ rü yema naeü̃gü ga idüraexü̃ rü guxü̃ma ga yema naeü̃gü ga ixãxpe̱xatüxü̃. Rü yema naéga ga namaxã yaxüégaxü̃ rü ngẽmatama nixĩ i naéga i ñu̱xma namaxã nüxü̃ icuáxü̃.
20Rü yemaacü nüma ga yatü rü nayaxüéga ga guxü̃ma ga yema naeü̃gü ga naxü̃na ixĩgüxü̃, rü guxü̃ma ga yema naeü̃gü ga naixnecücüã̱x, rü guxü̃ma ga yema naeü̃gü ga ixãxpe̱xatüxü̃. Natürü yematanüwa rü nataxuma ga namücü ga gumá yatü ga nüxü̃́ mexü̃ nax norü ngü̃xẽẽruxü̃ yixĩxü̃.
21Rü yemaca̱x ga Tupana rü poraãcü nanapexẽxẽ ga gumá yatü. Rü yexguma napeyane rü nanayaxu ga wüxi ga naga, rü wenaxarü nayaxẽxẽxẽ ga namachi.
22Rü gumá nagawa rü Cori ya Tupana rü ngĩxü̃ naxü ga wüxi ga nge. Rü ñu̱xũchi gumá yatüxü̃tawa ngĩxü̃ naga.
23Rü yexguma ngĩxü̃ nada̱u̱xgu ga gumá yatü, rü ñanagürü: —Ñaa nge rü chauxchina̱xãtama rü chomachitama ngĩxca̱x iyixĩ. Rü ngẽmaca̱x ngexü̃gu tá ixãéga erü chowa nixĩ i ngĩxü̃ naxüxü̃ —ñanagürü.
24Rü ngẽmaca̱x ya yatü, rü tá nanatüna rü naéna nixũgachi nax naxma̱xmaxã wüxiwa nangẽxmagüxü̃ca̱x, rü ñoma wüxitama i duü̃xü̃rüxü̃ yixĩgüxü̃ca̱x i ngẽma taxre.
25Rü nüma ga gumá yatü rü ngĩma ga naxma̱x rü nangexchirugü. Natürü ga yema taxre rü tama nügü naxãnee ga woo nax yangexchirugüxü̃.
Atualmente selecionado:
Naanearü ügüchiga 2: tcaP
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2022, Wycliffe Bible Translators, Inc. All rights reserved.