Sirak 7
7
Samfala gud advaes
1-2Sapos yu no duim eni nogud samting,
bae no eni nogud samting save kasem yu.
3Sapos yu plantem olketa sid
blong wei wea hemi no stret,
bae yu havestem plande ravis samting
winim wanem yu tingim.
4No askem Lod fo biknem
fo yu seleva,
o askem king fo yu kamap bikman.
5No trae fo laea long Lod
an sei yu wanfala stret man,
o tok praod abaotem waes blong yu
long ae blong king.
6No trae fo kamap
olsem wanfala jaj,
sapos tingting blong yu no strong nomoa
fo jaj long stretfala wei.
Sapos yu letem pipol wetem paoa
fo tanem stretfala tingting blong yu,
bae gud nem blong yu
hemi nogud nao.
7No duim eni nogud samting fo olketa pipol,
an no meksem long yu seleva
long ae blong olketa pipol.
8No mekem wanfala kaen sin long tufala taem,
bikos panis wea yu garem fastaem, hem naf nao.
9No tingim dat God
hu hemi hae tumas
bae hemi hapi fo tekem eni ofaring
wea yu wande mekem.
Hemi no kaontem
sapos yu givim staka seleni o nomoa.
10No taet fo prea,
an no misim eni gudfala taem
fo givim samting long olketa pua pipol.
11No laf long eniwan
wea pipol i daonem hem.
Lod nao save daonem man,
an hemi save putumap moa.
12No talem laea stori
abaotem olketa fren blong yu.
13Ya, yu no laea nao.
Hemi nating duim nomoa
eni gud samting fo yu.
14Taem pipol kam tugeta,
no talem enikaen iusles toktok.
An taem yu prea,
no gohed fo talem nomoa semsamting.
15No les fo waka long gaden
o duim olketa narafala bik waka,
God hu hemi hae tumas nao
hemi givim kam olketa waka ya.
16No joenem grup blong olketa nogud pipol,
yu mas save dat Lod bae hemi panisim olketa.
17Yu mas putum yu seleva daon,
bikos Lod bae hemi mekem faea fo bonem
olketa nogud pipol
an mekem olketa wom
fo kaikaim evriwan.
Frengud wetem narafala pipol
18No lusim wanfala fren
blong yu, fo seleni,
o tru fren, fo bikfala seleni.
19No lusim gudfala woman
hu hemi waes
wea yu laekem fo maritim.
Gudfala waef olsem,
hemi gud winim gol.
20No spoelem olketa wakaman
blong yu
hu i duim gudfala waka.
21Yu#Eksodas 21:2; Diutronomi 15:12-15. lavem olketa waes
wakaman blong yu
olsem yu lavem yu seleva,
an letem olketa fo go fri.
22Yu lukaftarem gud
olketa animol blong yu.
Sapos yu save tekem seleni long olketa,
yu mas kipim olketa.
23Sapos yu garem olketa san,
yu mas tisim olketa gudfala.
Tisim olketa long evri gudfala wei
taem olketa smol yet.
24Sapos yu garem olketa dota,
yu mas lukaftarem olketa long trabol,
no letem olketa fo falom tingting blong olketa seleva.
25Taem yu givim dota
fo maritim wanfala man,
bikfala waka blong yu hemi jes finis nao.
Bat yu mas givim hem long man
hu hemi save tingting gudfala.
26Sapos yu garem wanfala gud waef,
yu mas no lusim hem.
Bat yu no letem yu seleva fo maritim woman
wea yu nating lavem.
27Tinghevi#Eksodas 20:12. long dadi blong yu
wetem hol haat blong yu,
an no fogetem hao mami blong yu hemi safa taem yu bon.
28Yu mas tingim tufala ya nao
i givim laef blong yu.
?Hao nao yu save sensimbaek evrisamting wea tufala bin duim fo yu?
29Tinghevi long Lod
wetem hol haat blong yu,
an tinghae long olketa prist blong hem.
30Wetem hol haat blong yu,
yu mas lavem God hu hemi mekem yu,
an helpem olketa wakaman blong hem.
31Mekhae long Lod
an respektem olketa prist blong hem.
Givim olketa wanem God
hemi talem yu fo givim olketa,
olsem olketa fas frut long olketa kaikai,
olketa ofaring fo sin,
solda blong animol wea yu sakrifaesim,
an evri sakrifaes an bone ofaring wea yu mekem.
32Helpem olketa pua pipol,
mekem Lod hemi blesim yu.
33Kaen long evriwan hu laef yet,
an no fogetem olketa hu i dae finis.
34Sore wetem olketa
wea wanfala long olketa hemi dae,
an krae wetem olketa.
35No foget fo visitim
olketa hu i sik,
bae pipol i lavem yu fo olketa samting olsem.
36Nomata wanem yu duim,
yu mas tingim dat wan de bae yu dae.
Sapos yu tingim diswan olowe,
bae yu no save sin.
Currently Selected:
Sirak 7: SIDC
Highlight
Share
ਕਾਪੀ।
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.