Sirak 15
15
1Sapos yu tinghae long Lod
an falom stret lo blong hem,
bae yu save faendem Waes.
2Waes hemi olsem wanfala mami,
o wanfala gele hu hemi jes marit,
bae hemi welkamem yu.
3Bae hemi givim yu waes an save,
olsem mami save givim yu kaikai
an wata fo dring.
4Yu mas dipen long hem
fo hemi sapotem yu,
an bae yu no foldaon fo meksem long yu.
5Bikos yu garem Waes,
hem nao bae pipol i mekhae long yu.
An taem yu tok long olketa pipol,
bae hemi givim yu
olketa waes toktok fo talem
6An bae yu barava hapi,
an oltaem bae yu garem biknem.
7Pipol hu i no garem save,
an pipol hu i stap long sin,
bae i nating save lukim Waes.
8Waes hemi stap farawe long olketa
hu i tingim olketa seleva,
an hemi no stap long maen blong olketa
hu i save laea.
9Hemi nating stret fo pipol hu i sin
fo singim tambu singsing fo preisim God,
bikos wosip blong olketa hemi nating gud.
10Fo singim tambu singsing,
hem nao hemi somaot
wea man hemi garem Waes
wea Lod seleva nao hemi givim.
Falom tingting blong man seleva
11No#Sirak 17:1-12. talem dat Lod nao hemi torowem yu long sin, bikos Lod hemi no duim wanem hemi les long hem fo hapen. 12No tingim dat Lod nao hemi lidim yu long rong wei, bikos hemi no nidim pipol blong sin fo helpem hem an fo mekem waka blong hem hapen. 13Lod hemi les long evrisamting wea hemi nogud, an olketa hu i tinghae long Lod i nating save faendem enisamting gud long ravis wei. 14Long bifoa, taem Lod hemi mekem man, hemi letem tufala siusim wanem tufala laekem. 15Sapos yu laekem, yu save falom strongfala toktok blong Lod. Yu seleva nao yu siusim, yu wandem waka fo Lod o nomoa. 16Hemi olsem wea hemi putum faea an wata frant long yu. Saet blong yu nao fo holem wanem yu laekem. 17Yu nao fo siusim midol long dae an laef, an bae yu tekem wanem yu laekem. 18Ya, Waes an paoa blong Lod hemi bik tumas, an hemi luksave long evrisamting. 19Hemi save finis long evrisamting wea man hemi duim, an hemi lukaftarem olketa hu i tinghae long hem. 20Hemi no tokstrong long eniwan fo kamap nogud o letem eniwan fo sin.
Currently Selected:
Sirak 15: SIDC
Highlight
Share
ਕਾਪੀ।
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.