Luka 5
5
Yesu kowabagula waluko wa mosi
Matayo 4:18-22; Maluko 1:16-20
1Zua dimwe Yesu viyakalile kema habehi na Lwanda lwa Genezaleti, wanhu wengi wammemela wamsung'hasung'ha wahulike mbuli ya Usenga wa Mulungu. 2Kaziona ngalawa mbili hamgwazo ha ulwanda, zilekigwa baho na wavula somba wakalile wohambulahambula na kusonelela nyavu zao. 3Yesu viyeingile mgati ya ija ngalawa imwe ikalile ya Simoni, kampula yeikwese mgamazi hamwande chidogo kulawa mhwani. Amala kakala hasi na kufunda wanhu yeli muingalawa. 4Viyakomeleze kufunda, kamlongela Simoni, “Sambi sung'heni ngalawa muigale kuing'huta mvule somba. 5Simoni kamwidika kalonga, “Go Mndewa, cheye chisang'hana sang'hano ichilo chose hachipatile chinhu, mbali kwa ulonzi wako, noutanda lwavu mmazi.” 6Nao viwazitandile nyavu izo, wavula somba wengi ng'hani mbaka nyavu zimema na zisonga kudegeka. 7Ivo wawahungila makono kuwakema wayao wakalile muingalawa imwenga weze kuwataza. Nao weza wamemeza somba mzi ngalawa zose mbili zikala behi kudidimila. 8Simoni Petulo viyaonile gaja galawilile, kafugama mafindi haulongozi ha Yesu kalonga, “Go Mndewa segela hamwangu kwa vija niye nna malozo!” 9Simoni na wayage wose wazaganyika ng'hani kuvula somba wengi wengi 10Ivija Yakobo na Yohana na wanage Zebedayo, wakalile wavula somba wayage Simoni. Baho Yesu kamlongela Simoni, “Sekeudumbe, kulawa sambi hua mvula somba, mbali kowalagala wanhu Kumwangu.”
11Viwakomeleze kuzivikiza mhwani ngalawa zao, waleka vose na wamuwinza Yesu.
Yesu komhonya munhu yeli na dikulu
Matayo 8:1-4; Maluko 1:40-45
12Ikala zua dimwe Yesu viyakalile hanhu hamwenga, munhu imwe yeli na dikulu lukuli wose. Viyamonile Yesu katumbala mavindi kainamila hasi kampula Yesu kalonga, “Go Mndewa wahalonda kodaha kunihonya ili nidahe kumfugamila Mulungu!”
13Yesu kagolosa makono gake, kamwamha kalonga, “Nolonda, uhone!” Bahaja munhu ija kahona utamu wa dikulu na nipata nyafasi ya kumtogola Mulungu. 14Nayo Yesu kamgoma kalonga, “Sekeumulongele munhu yoyose, mbali uite ukailaguse kwa mkulu wa nhambiko, na kalave nhosa ya kulukuza, kama viyalagize Musa kuwagangamizila kua kuhona na kutogoligwa kumwangu na kumfugamila Mulungu.”
15Mbali mbuli za iyo Yesu zikala zenela chila hanhu, Mabumbila makulu ga wanhu gakala goiting'hanila kwiza kumtegeleza na kuhonyigwa vitamu vao. 16Hata ivo nayo kainega hanhu halibule wanhu, kaita kumpula Mulungu.
Yesu komhonya munhu yaholole lukuli
Matayo 9:1-8; Maluko 2:1-12
17Zua dimwe Yesu viyakalile yofunda, mafalisayo na wafundaji wa ndagizi, walawile mzikae za Galilaya na kulawa Muuyahudi na Yelusalemu, wakala uko. Na udaho wa Mndewa ukala nayo yadahe kuwahonya watamu. 18Ivija weza wanhu fulani wampapa mdikomwa mtamu imwe yaholole lukuli lwake. Wageza kumwingiza muing'anda na kumwika haulongozi ha Yesu. 19Mbali viwapotigwe kupata nzila ya kumwingiza muing'anda kwa dija bumbila kulu da wanhu, ivo wakwela kuchanha kuchiswili, watobola hanhu hayalile Yesu wapate nyafasi ya kumhulumusa imtamu na komwa jake haulongozi ha Yesu. 20Yesu viyaonile nhogoli yao, kamlongela mtamu ija, “Mbwiga, malozo gako galekesigwa.”
21Mafalisayo na waja wafundaji wa ndagizi wasonga kuiuza wenyego, “Yelihi ino yomzeha Mulungu? Habule munhu yonda yalekese malozo mbali Mulungu yaiyeka!”
22Yesu kavimanya viwatonga kawauza, “Habali mogatonga gano mmoyo? 23Dilihi dibuhile kumwenu? Niye kulonga, ‘Kulekeseligwa malozogako, hebu kulonga, Ima uite?’ 24Baho molondeka mvimanye kua Mwana wa Munhu kana udaho wa kulekesa malozo ga wanhu muiisi.” Ivo kamlongela ija yaholole lukuli, “Nokulongela, ima upape komwa jako uite ukae yako.”
25Ija munhu yakalile yaholole lukuli kema bahaja hawali wanhu wose, kasola komwa jake diyagonele kaita ukae yake, kuno yomtogola Mulungu. 26Wanhu wose wakanganyika na kugwaya! Na wamwing'ha Mulungu nhogolwa walonga, “Lelo chiuona uzonza!”
Yesu komkema Lawi
Matayo 9:9-13; Maluko 2:13-17
27Yesu viyakomeleze gago kalawa kunze, kamwona munhu imwe yokemigwa Lawi kakala hanhu hake hakugogela kodi, Yesu kamlongela, “Niwinze.” 28Baho Lawi kema na kaleka chila chinhu na kamuwinza. 29Amala Lawi kamtandila Yesu galigali ukae yake, na dija bumbila kulu da wagoga kodi na wanhu wamwenga wakala woja hamwe nawo. 30Mbali Mafalisayo na wafundaji wa ndagizi wawanung'hunikila waluko wa Yesu, wauza, “Habali moja na kung'wa hamwe na wagoga kodi na weli na malozo?” 31Yesu kedika kawalongela, “Weli na ugima hawalonda mlaguzi, mbali weli na vitamu. 32Sizile kuwakema wanhu weli na nhogoli, mbali weli na malozo wagaleke.”
Mbuli ya kufunga kuja ndia
Matayo 9:14-17; Maluko 2:18-22
33Wanhu wamwenga wamlongela Yesu, “Waluko wa Yahana na waja wa Mafalisayo wofunga na kumpula Mulungu mala zose, mbali waluko wako wawo woja na kung'wa.” 34Mbali Yesu kawauza, “Modahaze kuwalongela wanhu wagonekigwe mdizengele waleke kuja na wahamwe na mfunga zengele? 35Mbali chipindi chovika mfunga zengele yahasegezigwa kumwao, ivo wonda wafunge.”
36Yesu kaweng'ha ulonzi uno, kalonga, “Habule munhu yonda yasole chilaka cha sambi yasonele mchivalo cha mwaka, yahatenda ivo, kokua kabananga kwa vija haviigala. 37Ivija habule munhu yonda yagele divai ya sambi mmifuko ya mbende ya mwaka, mbali yahagela umo ija divaiya sambi mmifuko ya mbende ya mwaka yobanangika. 38Divai ya sambi uwo wogeligwa mmifuko ya sambi. 39Habule munhu yonda yang'we divai ya sambi yahandusa divai ya mwaka, kolonga, ‘Ija yamwaka unoga ng'hani.”
Currently Selected:
Luka 5: KBV
Highlight
Share
ਕਾਪੀ।
Want to have your highlights saved across all your devices? Sign up or sign in
The New Testament in Kami @The Word for The World International and Kami Language translation. All rights reserved.
