Maliko 8
8
Yesʉ ʉkʉalɨsa ndya antʉ magana amagana annɨ
Matayo 15:32-39
1Matungo nanso, milʉndo ʉkʉlʉ nʉwa antʉ akilinga hangɨ, aɨagila anga ndya. Ʉʉgwa, Yesʉ akaitanga amanyisigwa akwe akaatambʉɨla, 2“Kʉaonela kɨnyaʉwai antʉ awa kʉnsoko akolɨ palʉng’wɨ nʉnene mahikʉ atatʉ, agila nɨkakʉlya. 3Anga nɨaleke alongole kito kʉnʉ ɨze ahumilwe nzala akʉsha kɨsha mʉkanka mʉnzɨla, kʉnsoko nɨang’wɨ apumɨe kʉlɨ.”
4Amanyisigwa akwe akamʉkolya, “Apa itɨ wɨɨ kʉʉpumya pɨ ndya niakʉalɨsa antʉ awa ɨhi?”
5Yesʉ akaakolya, “Mʉkete mɨkate ɨnga?” Akasʉkɨɨlya, “Kʉkete mɨkate mʉpungatɨ.” 6Itɨ gwa, Yesʉ akaaɨla ɨantʉ ikiɨ pihɨ. Akahola mɨkate nanso nɨmʉpungatɨ, akamʉsongelya Itunda, akamɨeganɨa, akaapa amanyisigwa akwe agalanye ɨantʉ, akaagalanya. 7Aɨakete nipi samaki pikeehʉ. Yesʉ akapikembeta, akaaɨla agalanyi ɨantʉ. 8Antʉ ɨhi akalya akikʉta. Akilingɨla ɨmaminyangʉɨlwa akazoela akizɨlya itoto mʉpungatɨ. 9Aɨ alɨe anga antʉ magana amagana annɨ. Yesʉ akaalaga ɨantu alongole kʉmatolao, 10papo paapo akanankɨla mibɨnɨ nɨamanyisigwa akwe, akalongola kʉ kɨsalɨ ka Dalimanʉta.
Apalisayo akʉhiya kɨlɨngasɨɨlyo
Matayo 12:38-42; 16:1-4
11Apalisayo akapika, akatulitambʉlya nʉ Yesʉi, akaze mʉgema. Akahiya witume mampɨlʉ kʉlɨnga kɨna tai ʉlagɨigwe ni Itunda. 12Yesʉ akahupa kʉʉkɨa mʉnkolo akwe, akalʉnga, “Nɨkɨ ʉwileli ʉwʉ ʉloɨlwe kɨlɨngasɨɨlyo? Kʉmʉɨla ɨtai, wileli ʉwʉ shanga ʉkʉlagɨɨlwa anga kɨlɨngasɨɨlyo kɨhi.”
13Itɨ gwa, Yesʉ akaaleka, nʉwanso palʉng’wɨ nɨamanyisigwa akwe akanankɨla hangɨ mibɨnɨ, akandya ʉmʉhɨnzo nʉwa kʉlongola kitʉmbɨ nɨla kabɨɨlɨ nɨla lʉzɨ nʉlʉkʉlʉ.
Igaɨ niilʉlʉ nɨa Apalisayo nʉ Helode
Matayo 16:5-12
14Amanyisigwa aɨ ɨilwe kʉhola ɨmɨkate nɨdʉ, aɨ akete mʉkate ʉng’wɨ ʉdu mʉng’wanso mibɨnɨ. 15Yesʉ akaahʉgʉla, “Gozi kɨsa! Hʉgʉki niigaɨ niilʉlʉ nɨa Apalisayo nʉ Helode.”
16Amanyisigwa akatulitambʉlya ɨenso, “Ʉkʉtambʉla itɨ kʉnsoko kɨagila anga mɨkate.”
17Yesʉ aʉlɨngɨle nanso naɨ akitambʉɨla, akaaɨla, “Nɨkɨ mʉkitambʉlya kɨna mɨagila mɨkate? Itɨɨ, mʉkɨlɨ kʉmanya, hangɨ mʉkɨlɨ kʉlɨnga? Itɨɨ, nkolo yanyu nkaku kʉlɨnga? 18Itɨɨ, mʉkete ɨmiho shanga mʉkʉona? Mʉkete akʉtwɨ shanga mʉkija? Itɨɨ, shanga mʉkɨmbʉkile 19matungo ayo naɨmbegile mɨkate ɨtaano nʉkʉalɨsa iantʉ magana amagana ataano? Aɨmʉhoee nkapu inga nɨa ʉsago.” Akasʉkɨɨlya,
“Nkapu ikʉmi naibili.”
20“Hangɨ naɨ nɨmɨegile mɨkate mʉpungatɨ, nʉkʉalɨsa antʉ magana amagana annɨ, aɨmʉhoee nkapu inga nɨa ʉsago?” Akasʉkɨɨlya, “Nkapu mʉpungatɨ.” 21Sʉnga, akakolya, “Mʉkɨlɨ du kʉlɨnga?”
Yesʉ ʉkʉmʉkomya mʉpokʉ kʉ Betisaida
22Yesʉ palʉng’wɨ nɨamanyisigwa akwe akapika kʉ kɨsalɨ ka Betisaida. Naɨ ʉkolɨ kʉng’wenso antʉ akamʉletela mʉpoku, akaminena amʉkomye. 23Yesʉ akamʉamba mʉkono mʉpokʉ nʉwanso, akamʉtwala kʉnzi akɨsalɨ. Akamʉtyɨla matɨ mʉmiho, akamʉlompeela, akamʉkolya, “Itɨɨ, ʉhumilene kʉona kɨntʉ?” 24Mʉpoku nʉwanso akagoza, akalʉnga, “Kʉaona antʉ anga mɨtɨ akʉgenda.” 25Sʉnga Yesʉ akamʉɨkɨɨlya hangɨ mɨkono mʉmiho, ɨmiho akapɨtya, akaona iza maintʉ ɨhi. 26Yesʉ akamʉɨla alongole kito lakwe, hangɨ akamʉlagɨɨlya, “Leka kingɨla mʉ kɨsalɨ!”
Petelo ʉkʉmʉgomba ʉ Yesʉi kɨna Kilisito
Matayo 16:13-20; Lʉka 9:18-21
27Sʉnga Yesʉ nɨamanyisigwa akwe akalongola kʉ isalɨ niya Kaisalia Pilipi. Naɨ amolɨ mʉnzɨla Yesʉ akakolya amanyisigwa akwe, “Antʉ akʉlʉnga ʉne nɨnyenyu?”
28Akamʉsʉkɨɨlya nɨang’wɨ akʉlʉnga ʉewe wɨ Yohana mʉbadisi, nɨang’wɨ akʉlʉnga mʉnyakɨdagʉ ang’wi Itunda ʉ Elia hangɨ nɨang’wɨ akʉlʉnga ʉng’wɨ nʉwa anyakɨdagʉ ang’wi Itunda.”
29Yesʉ akaakolya, “Unyenye, mʉnɨngile ʉnene nɨnyenyu?” Petelo akasʉkɨɨlya, “Ʉewe wɨ Kilisito.”
30Sʉnga ʉ Yesʉi akahʉgʉla mʉleke kʉmʉɨla mʉntʉ wɨhi kɨna ʉnene nɨ Kilisito.
Yesʉ ʉkʉpumya mʉloto nʉwa nsha akwe
Matayo 16:21-28; Lʉka 9:22-27
31Yesʉ akandya kʉamanyisa amanyisigwa akwe akaaɨla kɨna, itakɨwe ʉnene Ng’waa Mʉntʉ kagigwa nʉkʉhitwa nɨ anyampala nɨapolyi nɨakʉlʉ nɨamanyisa malagɨɨlyo ang’wa Musa. Hangɨ kʉbʉlagwa, lʉhikʉ nʉla kataatʉ kiʉka. 32Yesʉ aɨ ʉkʉatambʉɨla kɨhenga ikani nɨlanso. Papo gwa, ʉ Petelo akamʉtwala kʉmpelo, akatula mʉkenela. 33Ingɨ ʉ Yesʉi akapɨlʉka, akaagoza amanyisigwa akwe, akamʉkenela ʉ Petelo akamʉɨla, “Sʉka kʉnyuma ane. Ʉewe wɨ Shetani! Masɨgo ako shanga ang’wi Itunda ʉkete masigo akɨ ʉntʉ.”
34Sʉnga ʉ Yesʉi akaitanga milʉndo nʉwa antʉ palʉng’wɨ nɨamanyisigwa akwe, akaaɨla, “Mʉntʉ wɨhi nʉloilwe kʉtula mʉmanyisigwa wane, nʉihite ʉng’wenso, nʉwakenke nʉwagombe kagigwa kʉpikɨɨla ɨsha wantyate. 35Kʉnsoko mʉntʉ nʉloilwe kʉguna likalo lakwe, ʉkʉsha, nʉ mʉntʉ nʉloilwe kʉsha kʉnsoko alina lane hangɨ kʉnsoko a Nkani Nza, ʉkʉlʉguna. 36Itɨɨ, mʉntʉ ʉkʉlija nsaɨlo kɨɨ anga waʉlije ʉnkumbigʉlʉ wɨhi nʉkʉʉlimɨlya ʉlikalo lakwe? 37Ang’wɨ ʉ mʉntʉ ʉkʉpumya ntʉni wagune ʉpanga wakwe? 38Mʉntʉ wɨhi nʉkʉmonela mɨnyala mʉ wileli ʉwʉ nʉʉbɨ nʉʉmanyisi wane, nʉnene Ng’waa Mʉntʉ nzɨɨza mʉhita, matungo nɨ nzɨɨza mʉʉkʉlʉ wang’wa Tata wane palʉng’wɨ nɨ a malaɨka nɨelʉ.”
Currently Selected:
Maliko 8: IBV
Highlight
Share
ਕਾਪੀ।
Want to have your highlights saved across all your devices? Sign up or sign in
The New Testament in Isanzu @The Word for The World International and Isanzu Language translation. All rights reserved