Maliko 2
2
Yesʉ ʉkʉmʉkomya mʉntʉ nʉpoiye
Matayo 9:1-8; Lʉka 5:17-26
1Naɨyakɨla mahikʉ makehʉ, Yesʉ akatulya kʉ kɨsalɨ ka Kapelanaumu, antʉ akija kɨna ʉkolɨ kitolakwe. 2Ʉʉgwa, antʉ ɨdʉ akɨza, ingɨ yɨkatula kʉtilɨ lyoma pamʉlango. Yesʉ aɨ ʉkʉtanantya lʉkani lang’wi Itunda. 3Akapika antʉ annɨ amʉkenkile mʉlwae nʉpoiye amʉletile kʉng’wa Yesʉ. 4Akaleng’wa kʉmʉtwala pakʉpɨ nʉ Yesʉi, kʉnsoko amʉkoegano nʉwa antʉ. Ʉʉgwa akanankɨla kitembe akataʉla paɨ ʉmolɨ ʉ Yesʉi. Naɨ alija ɨlyoma, akamʉsimya mʉntʉ nʉwanso waze ʉlae mʉndɨlɨ. 5Yesʉ naɨwaona itɨ nɨamʉhʉɨɨe, akamʉɨla ʉ mʉntʉ nʉwanso naɨ ʉpoiye, “Mʉhʉmba mɨane, nakʉlekela ɨmɨlandʉ ako.”
6Amanyisi ang’wɨ nɨa amalagɨɨlyo ang’wa Musa naɨ ikiɨ pang’wanso akasɨga mʉnkolo yao, 7“Ʉkʉgema ʉlɨ kʉlʉnga itɨ? Ʉyʉ ʉkʉmʉbehʉla Itunda. Kʉtilɨ anga mʉntʉ nʉkʉlekeela ɨmɨlandʉ ingɨ Itunda wing’wene.”
8Pumpulugu Yesʉ naɨ walɨnga ɨmasɨgo ao, akaaɨla, “Nɨkɨ mʉkʉsɨga itɨ? 9Nɨkɨʉlɨ nɨkɨtontu, ‘Kʉmʉɨla mʉntʉ ʉyʉ nʉpoiye, ‘Walekelwa ɨmɨlandu ako,’ ang’wɨ kʉmʉɨla, ‘Uka! Hola ɨndɨlɨ ako ulongole?’ 10Ingɨ, ndoilwe mʉlɨnge kɨna, ʉnene Ng’waa Mʉntʉ nkete ʉhumi mʉ ʉnkumbigʉlʉ nʉwakʉlekela ɨantʉ ɨmɨlandʉ ao.” Ʉʉgwa, akamʉɨla ʉmʉntʉ ʉyʉ naɨ mʉlwae, 11“Kʉʉɨla ʉka, hola ɨndɨlɨ ako ʉlongole kitolako!”
12Papo paapo mʉntʉ nʉwanso akaʉka, akahola ɨndɨlɨ akwe akalongola akaziseseelya, ɨhi akaze aloeye. Akakʉɨlwa nangalu, akamʉlʉmbɨɨlya Itunda azelʉnga, “Ɨza kʉkɨlɨ kʉone ikani anga ɨlɨ!”
Yesʉ ʉkʉmitanga ʉ Lawi wamʉtyate
Matayo 9:9-13; Lʉka 5:27-32
13Yesʉ akalongola hangɨ kʉmpelo alʉzɨ nʉlʉkʉlʉ nʉla Galilaya. Milʉndo waantʉ ʉkamʉhanga, nʉyo akatula amanyisa. 14Naɨ ʉkʉkɨla mʉng’wanso, akamʉona Lawi ng’wana wang’wa Alupayo, wikiɨ pa ʉhoeelo nʉwa kodi, Yesʉ akamʉɨla, “Ntyate.” Lawi akaʉka akamʉtyata.
15Sʉnga ʉ Lawi akamana ʉ Yesʉi kʉlya ndya kitolakwe. Ahoeela kodi ɨdʉ nɨaʉya naɨ akumʉkile kɨna anyamɨlandʉ akamʉtyata ʉ Yesʉi palʉng’wɨ nɨamanyisigwa akwe, nɨantʉ ɨdʉ akalɨzanɨa ɨndya pang’wanso. 16Amanyisi amalagɨɨlyo ang’wa Musa ang’wɨ naɨɨza Apalisayo, naɨ aona ʉ Yesʉi ʉkʉlɨzania nɨahoeela kodi palʉng’wɨ nɨaʉya naɨ akumʉkile kɨna anyamɨlandʉ, akaakolya ɨamanyisigwa akwe, “Nɨkɨ ʉkʉlɨzanɨa nɨantʉ nɨakumʉkile kɨna anyamɨlandʉ?”
17Yesʉ naɨwija akaasʉkɨɨlya, “Nɨ apanga shanga ɨhiyaa ʉmʉkilɨki, ingɨ nɨalwae ɨhiyaa mʉkilɨki. Shanga aza nzile aduma nɨagombekile kʉng’wi Itunda, aza nzile aduma anyamɨlandʉ.”
Yesʉ ʉkimpyania ʉmanyisi wakwe nʉ ʉmanyisi nʉwa kalɨ
Matayo 9:14-17; Lʉka 5:33-39
18Itungo lɨng’wɨ amanyisigwa ang’wa Yohana nɨ Apalisayo aɨ agwaiye kʉlya. Ʉʉgwa, ɨantʉ akamʉkolya ʉ Yesʉi, “Kʉnɨkɨ amanyisigwa ang’wa Yohana nɨ Apalisayo ɨgwalya kʉlya, ingɨ amanyisigwa ako shanga ɨgwalya kʉlya?”
19Yesʉ akaasʉkɨɨlya, “Itɨɨ, antʉ nɨanilwe kʉwɨnga ahumile ʉlɨ kʉgwalya kʉlya anga ʉmʉtɨzɨɨla waze ʉmolɨ palʉng’wɨ nɨenso? Matungo ɨhi nɨamolɨ palʉng’wɨ nʉmʉtɨzɨɨla shanga akʉgwalya kʉlya. 20Ingɨ mahikʉ apembilye nɨazehegeligwa ʉmʉtɨzɨɨla, papo gwa mahikʉ nanso azegwalya kʉlya.
21“Antʉ shanga ɨtema ɨkɨlaka mitugalo nɨpya nʉkʉkʉɨɨla mitaho. Anga akʉɨɨle, kɨlaka nɨkɨpya kɨkʉtaʉla mitaho nɨlanso, pa italʉkile ikʉtalʉka ikʉlʉ. 22Hangɨ ɨantʉ shanga ɨkɨtɨla ɨdibai nɨmpya mʉnsaʉda nɨkʉlʉpaae. Anga atende itɨ, ɨdibai ɨkʉtamʉla ɨnsaʉnda nanso, ɨdibai ɨkʉhunʉka nɨnsaʉnda ɨkʉgazɨka. Ɨdibai nɨmpya ɨkɨtɨlwa mʉnsaʉda nɨmpya.”
Yesʉ ng’wenso Isekʉlʉ nʉwa Lʉhikʉ nʉla Kʉsupya
Matayo 12:1-8; Lʉka 6:1-5
23Lʉhikʉ lʉng’wɨ mʉ mahikʉ akʉsupya nʉla Ayahudi, Yesʉ aɨʉkɨɨe mʉmɨgʉnda angano. Naɨakʉgenda, amanyisigwa akwe akatulapʉʉla nʉ kʉpigiha mapemba angano. 24Apalisayo akamʉkolya, “Goza! Nɨkɨ akitʉma ikani nɨlɨgiigwe kitʉng’wa lʉhikʉ nʉla kʉsupya nʉla Ayahudi?”
25Yesʉ akaasʉkɨɨlya, “Itɨɨ, shanga mʉsomilene mʉ Ʉandikwa nʉ Ʉza naɨʉtendile ʉ Daudi palʉng’wɨ nɨaʉya itungo naɨahumilwe ɨnzala? 26Daudi aɨwingɨe mʉnyʉmba ang’wi Itunda, akahola mɨkate aɨagombigwe kʉlɨgwa nɨapolyi du, akalya indya naɨ iɨkilwe ntongela ang’wi Itunda, akaapa nɨaʉya. Ikani nɨlanso aɨlitʉmilwe ʉ Abiasali aɨza mʉpolyi nʉ mʉkʉlʉ.”
27Ʉʉgwa, Yesʉ akaaɨla, “Lʉhikʉ nʉla kʉsupya aɨlʉɨkilwe kʉnsoko akʉa aɨɨlya antʉ, shanga antʉ kʉtula atʉʉng’wa a lʉhikʉ nʉla kʉsupya! 28Kʉlʉlo ʉnene, Ng’waa Mʉntʉ yʉ nene nɨ Mʉkʉlʉ nʉwa Lʉhikʉ nʉla Kʉsupya nʉla Ayahudi.”
Currently Selected:
Maliko 2: IBV
Highlight
Share
ਕਾਪੀ।
Want to have your highlights saved across all your devices? Sign up or sign in
The New Testament in Isanzu @The Word for The World International and Isanzu Language translation. All rights reserved