Maliko 15
15
Yesʉ ʉtwawe pantongeela ang’wa Pilato
Matayo 27:1-2; 11:14; Lʉka 23:1-5; Yohana 18:28-38
1Naɨ weleela, Apolyi nɨakʉlʉ nɨanyampala nɨamanyisi amalagɨɨlyo ang’wa Musa, ianza ɨlɨ lɨhi akigombya kʉmʉtunga ʉ Yesʉi, akamʉtwala kʉngwa Pilato, mʉtongeeli nʉpembeeye kʉ Lumi. 2Pilato akamʉkolya ʉ Yesʉi, “Itɨɨ, ʉewe wɨ mʉtemi Nʉ Ayahudi?”
Yesʉ akasʉkɨɨlya, “Eee, anga ʉewe nʉtambʉe.”
3Apolyi nɨakʉlʉ akamʉsemela ʉ Yesʉi makani ɨdʉ. 4Sʉnga Pilato akamʉkolya hangɨ ʉ Yesʉi, “Itɨɨ, nɨkɨ shanga ʉkʉsʉkɨɨlya anga lʉkani? Kolwa antʉ akʉʉsemela makani ɨdʉ itɨ.”
5Ingɨ Yesʉ shanga akasʉkɨɨlya, Pilato akakʉɨlwa.
Yesʉ ʉkʉpɨsɨɨligwa kʉbʉlagwa
Matayo 27:15-26; Lʉka 23:13-25; Yohana 18:39; 19:16
6Matungo iloeelya la Pasaka, Pilato aɨ wizɨɨe kʉmʉtungʉɨla mʉtungwa ʉng’wɨ antʉ nɨamʉloilwe. 7Itɨ gwa, aɨʉkolɨ mʉntʉ ʉng’wɨ lina lakwe aɨ Balaba, aɨʉtungilwe palʉng’wɨ atungwa angɨɨza kʉnsoko aʉpɨlʉki nʉ ʉbʉlagi nʉwa antʉ mʉminyomo. 8Antʉ ɨdʉ akalongola kʉng’wa Pilato waatendeele anga ɨntendo akwe. 9Pilato akaakolya, “Itɨɨ, mʉloilwe nʉmʉlekele Mʉtemi nʉwa Ayahudi?” 10Pilato aɨ ʉtambʉe itɨ kʉnsoko aɨ ʉlɨngɨle kɨhenga kɨna Apolyi nɨakʉlʉ aɨamʉtwae ʉ Yesʉi kʉng’wakwe kʉnsoko awɨlu.
11Ingɨ Apolyi nɨakʉlʉ aɨ aapemile ɨantʉ amʉlompe Pilato wamʉlekele ʉ Balaba kimɨkɨɨli kang’wa Yesʉ. 12Pilato akaakolya hangɨ, “Itɨ gwa, itungo ɨlɨ mʉloilwe nʉmʉtende ʉlɨ mʉntʉ ʉyʉ nɨmʉkʉmitanga Mʉtemi nʉ Ayahudi?”
13Antʉ ɨhi akitʉnta hangɨ “Mʉkononteele mʉ mʉsalaba!”
14Pilato akaakolya, “Itɨɨ! Ʉgazile ntʉni?” Ingɨ nɨanso akalongoleka kintʉnta, “Mʉkononteele mʉ mʉsalaba!”
15Pilato aɨ ʉloilwe waliloeelye ilʉndo nɨla antʉ, ʉʉgwa, akamʉlekela ʉ Balaba kʉpuma mʉkadulumu. Sunga akalagɨɨlya Yesʉ wakʉwe misheleti, nʉkʉmʉkononteela mʉ mʉsalaba.
Amboi akʉmʉdalaha ʉ Yesʉi
Matayo 27:27; Yohana 19:2-3
16Sʉnga amboi akamʉhola ʉ Yesʉi akamʉtwala kʉ nyʉmba ang’wa Pilato, nyumba nanso itangwa Paitolio. Mʉng’wanso akatankana niʉmbɨ lɨhi nɨla amboi. 17Akamʉtugala itugalo nɨla kɨtemi, akanonia ngala amija, akamʉtugalya ʉ Yesʉi kitwe. 18Akatula mʉlamʉsha azemʉona ʉpʉngʉ, “Ʉlɨ adɨ Mʉtemi nʉwa Ayahudi!” 19Akamʉkʉa mɨlanga mitwe, akamʉtyɨla matɨ, akatugama nʉ kʉmʉkʉlya azemʉdalaha. 20Naɨ akondya kʉmʉona ʉpʉngʉ, akamʉtugʉla itugalo ɨlo nɨla kɨtemi, akamʉtugala matugalo akwe, akamʉtwala kʉmʉkononteela mʉ mʉsalaba.
Yesʉ ʉkʉkonenteelwa mʉ mʉsalaba
Matayo 27:32-44; Lʉka 23:26-43; Yohana 19:17-27
21Mʉnzila, aɨatankanile nʉ mʉntʉ ʉng’wɨ ɨlina lakwe Simoni, mʉnya kʉ Kʉlene. Nʉwanso aɨ ihe waa Alekisanda nʉ Lupo, matungo nanso aɨʉpumɨɨe kʉmʉgʉnda ʉkingɨla mʉkisalɨ. Itɨ gwa, amboi akamʉsinja waʉkenke mʉsalaba ang’wa Yesʉ. 22Sʉnga akamʉtwala ʉ Yesʉi kʉ nkɨka nitangwa Goligota, ndogoelyo akwe, ing’ang’a litwe 23Akamʉpa Yesʉ dibai nihangigwe nʉ ʉgota nʉitangwa manemane, nʉwanso akahita kʉng’wa. 24Itɨ gwa, akamʉkononteela mʉ mʉsalaba, akagalana matugalo akwe kʉ bʉnkʉlʉ bʉnkʉlʉ alamʉle nyenyu ʉkʉlija ntʉni. 25Aɨ anga saa tatʉ kɨdaʉ daʉ naɨ amʉkonontee ʉ Yesʉi mʉ mʉsalaba. 26Mʉmʉsalaba aɨ andɨkile igazo lakwe itɨ, “Mʉtemi nʉwa Ayahudi.” 27Sʉnga agazi abɨɨlɨ aɨ akononteewe mʉ mɨsalaba palʉng’wɨ Yesʉ, ʉmʉya ipande lakwe nʉla kɨgoha nʉmʉya ipande lakwe nʉla nkɨgɨ. 28Papo gwa ʉkakondanɨla ʉandɨkwa wang’wi Itunda nʉʉtambʉe kɨna, “Aɨ ʉaɨʉɨkilwe palʉng’wɨ nɨ ii.”#15:28 Bibilia niyakalɨ ngila nkani izi nia lʉkɨɨlɨ nula 28
29Antʉ naɨ akʉkɨɨla pang’wanso akamʉtʉkɨla, aze ahumilwe ikuo akamʉɨla, “Ee gwa! Ʉewe nʉhumile kʉkumʉla nʉkʉzenga ɨ Nyʉmba ang’wi Itunda kʉ mahikʉ ataatʉ! 30Itungo ɨlɨ, ikomole ʉewe, ʉsima mʉmʉsalaba!”
31Anga ɨantʉ naɨ akʉmʉdalaha, Apolyi nɨakʉlʉ palʉng’wɨ nɨamanyisi amalagɨɨlyo ang’wa Musa ga nɨenso akamʉdalaha akalʉnga, “Aɨʉakomoe nɨangɨza, nʉwanso shanga ʉhumile kikomola! 32Akalongoleka kʉlʉnga, age nʉwanso Kilisito, Mʉtemi nʉwa Aisilaeli! Kʉlʉlo nʉwasime kʉpuma mʉ mʉsalaba ingɨ ʉsese kʉone nʉ kʉmʉhʉɨɨla.”
Nɨantʉ awa naɨ akononteewe mʉmɨsalaba palʉng’wɨ nʉ Yesʉi nɨenso aɨ amʉtʉkɨe.
Yesʉ ʉkʉsha mʉmʉsalaba
Matayo 27:45-56; Lʉka 23:44-49; Yohana 19:28-30
33Kʉpʉma saa mʉtandatʉ ng’ʉng’wɨ kiti kɨkituma ihɨɨ ɨhi kʉ saa itaatʉ. 34Naɨ yapika saa kenda Yesʉ akalɨla akakʉta, akalʉnga, Eloi, Eloi, lama sabakitani?” Ndogoilyo akwe, “Itunda wane, Itunda wane, haɨ ka wandeka?”
35Antʉ ang’wɨ naɨ ɨmɨkile pang’wanso, naɨ igule itɨ, akalʉnga, “Tegeelyi! Ʉkʉmitanga mʉnyakɨdagʉ wang’wi Itunda ʉ Elia.” 36Mʉntʉ ʉng’wɨ akamanka, akahola ipʉpi akina mʉ kɨlʉʉlwi, akakensha mʉlʉkito nʉlʉlɨpu, akamʉpa wanune, wazelʉnga, “Kʉonegwa ang’wi ʉ mʉnyakɨdagʉ wang’wi Itunda Elia ʉzee mʉsimya mʉ mʉsalaaba!”
37Yesʉ akakʉta, akasha.
38Ʉʉgwa, ipazɨa naɨlɨkolɨ nkɨka nɨ nelʉ mʉ Nyʉmba ang’wi Itunda lɨkatamʉka ʉtoompo ʉbɨɨlɨ kʉpuma migʉlya kʉpikɨɨla pihɨ. 39Mʉkʉlʉ ʉng’wɨ nʉwa amboi naɨ wimɨkile pantongela a mʉsalaba naɨ waona ʉ Yesʉi ʉkʉsha itɨ, akalʉnga, “Kʉlʉ kʉʉlʉ mʉntʉ ʉyʉ aza Ng’wana wang’wi Itunda!”
40Aɨ akolɨ asʉngʉ naɨ ɨmɨkie kʉlɨ aloeye, ang’wɨ ao aɨ Maliamu kʉpuma kʉ kɨsalɨ ka Magidala nʉ Solome nʉ Malia nyinya nʉwa a Yakobo nʉ mʉniino nʉ Yose. 41Asʉngʉ nɨanso aɨ amʉtyatile ʉ Yesʉi naɨ ʉkolɨ kʉ Galilaya nʉkʉmitʉmɨla. Aɨ akolɨ asʉngʉ aʉya ɨdʉ naɨazile ʉ Yesʉi kʉpuma kʉ Yelusalemu aɨ akolɨ pang’wanso.
Yesʉ ʉkʉɨkwa
Matayo 27:57-61; Lʉka 23:50-56; Yohana 19:38-42
42Nai ihumbee kʉtula mpɨndɨ, kʉnsoko aɨ lʉhikʉ lakihamba kʉ lʉhikʉ nʉla kʉsupya Ayahudi, 43akaza ʉ Yosepu naɨ mʉnya kʉ Alimataya, mʉnyampala wianza nikʉlʉ, nʉsanigwe nangalu. Nʉng’wenso aɨʉlindɨɨe kʉza kʉ ʉtemi wang’wi Itunda. Ʉʉgwa, shanga akogopa akamʉhanga ʉ Pilato, akalompa wapegwe ʉmʉimba wang’wa Yesʉ. 44Pilato aɨʉkʉɨwe kija kɨna ʉ Yesʉi wakʉza. Ʉʉgwa, akamitanga mʉkʉlʉ nʉwa amboi, akamʉkolya kɨna taine ʉ Yesʉi wakʉza. 45Pilato naɨ watambʉɨlwa nʉ mʉkʉlʉ nʉwa amboi, kɨna tai Yesʉ wakondya kʉsha, akamʉgombya ʉ Yosepu kʉʉhola ʉmʉimba wang’wa Yesʉ. 46Papo gwa ʉ Yosepu akagʉla shanda, akaʉsimya pihɨ ʉmʉimba nʉwanso, akaʉtunga shanda. Akaʉɨka mʉkɨbɨɨla naɨ kɨpʉʉwe migwe, sʉnga akapingilitɨlya igwe ikʉlʉ akakiɨla. 47Nɨenso ɨa Maliamu nʉwa kʉ Magidala nʉ Malia nyiya wang’wa Yosepu aɨ aine pang’wanso naɨ ʉɨkilwe ʉmʉimba wang’wa Yesʉ.
Currently Selected:
Maliko 15: IBV
Highlight
Share
ਕਾਪੀ।
Want to have your highlights saved across all your devices? Sign up or sign in
The New Testament in Isanzu @The Word for The World International and Isanzu Language translation. All rights reserved