Hechos 1
1
Socoro
1:1-26
Jesúcã Espíritu Santo watiatere wedesʉguerigue
1Teófilo,#1:1 Teófilo Roma macã macʉ̃ ĩcʉ̃ wapacʉtigʉ niyugʉ. Cʉ̃ya wãme “Manigʉ̃rẽ maĩgʉ̃” o “Manigʉ̃cã maĩyogʉ” ĩrugaro ya. Judío basocʉ nihericapeicã Manigʉ̃rẽ wedewõgʉ̃ niyugʉ. yʉ mʉrẽ sʉgueropʉ ĩcãpũ ojawʉ nipetire Jesúcã mamarõpʉ tisocoriguere cʉ̃cã basocare bueriguere.#1:1 Lucacã Teófilore Jesucristoye maquẽrẽ ojasocoriapũ Lucas wãmecʉti. 2Pʉ cʉ̃cã bueyapatico ʉmʉãwesepʉ mʉãwaria bʉrecopʉ ojatʉocowʉ. Jesús cʉ̃cã ʉmʉãwesepʉ mʉãwato sʉguero Espíritu Santo masĩrẽ nʉnirẽmena cʉ̃ buera cʉ̃cã beseriarare dotire cũrĩgʉ niwĩ cʉ̃jãcã tiatere.#Lc 24:36-49. 3Cʉ̃cã cõwõã masãriasiro, cʉ̃jãrẽ bajuanigʉ̃ “Nirõrã cʉ̃rã ñawĩ catiwi” ĩ masĩñerõcã tiyugʉ. Cuarenta bʉrecoriwatoare pajeri cʉ̃jãrẽ bajua Manigʉ̃cã cʉ̃yarare dotigʉ nirẽ maquẽrẽ#Mt 4:17; 10:5-7; 12:28; 28:18-19; Lc 17:20-21; Ef 1:18-23; 1Pe 3:22. wedenemoyugʉ.#1Co 15:5-8.
4Jesús cʉ̃jãmena nigʉ̃rã cʉ̃jãrẽ abiro ĩyugʉ:
—Mʉjã ano Jerusalénrã pʉtʉaya. Icãta aperopʉ, apemacãpʉ waherimocãña. Yʉpacʉcã sʉgueropʉ ‘Mʉjãrẽ Espíritu Santore ticogʉacu’ ĩriguere yueya marĩcʉ̃.#Jer 31:31-34; Ez 36:22-34; Jn 14:16-17; 2Co 3:17-18; Ga 3:14; Ef 1:13. Yʉcã mʉjãrẽ tierena wedesiawʉ. 5Juan mʉjãrẽ nirõrã ocomena wãmeõtirigʉ niwĩ. Buri pẽrõgãsiro yʉpacʉpe mʉjãrẽ Espíritu Santomena wãmeõtigʉ cʉ̃rẽ tidujiocogʉagawi cʉ̃rẽ mʉjãmena nirucũmocãro ĩgʉ̃#1:5 Nipetirare cʉ̃jãcã ñañarẽ tirecʉtirere wãcũpasʉti wasoa Jesúre wedewõñerõcã Manigʉ̃ cʉ̃jãrẽ Espíritu Santore nʉnigawi cʉ̃jãrẽ titamu nirucũmocãro ĩgʉ̃. Cʉ̃ tairo tigʉ cʉ̃jãrẽ Espíritu Santomena wãmeõtigʉ tigawi. ―ĩyugʉ Jesús.
Manigʉ̃cã Jesúre ʉmʉãwesepʉ newʉmʉãrigue
6Siro Olivos wãmecʉtiriburopʉ neãporiwatoa cʉ̃ buera Jesúre abiro ĩ sãĩñayura:
—Ʉ̃sã Nirũpʉ̃ ¿Mʉ marĩcʉorogãrẽ Roma macãrã nirũpãrãrẽ cõãmocãgʉagari? ¿Cʉ̃jãrẽ cõãriasiro Israelyabumacãrã nirũpãrãrẽ sonegʉagari? Marĩ ñecʉ̃ Davícã atidita macãrãrẽ dotiriarora abiro ¿marĩcʉorogãrẽ mʉ ʉ̃sã nirũpʉ̃ nigʉagari? ―ĩyura cʉ̃rẽ.
7Cʉ̃jãcã sãĩñañerõcã tʉogʉ cʉ̃jãrẽ abiro yʉyugʉ:
—Yʉpacʉ ĩcʉ̃rã masĩgawi. Cʉ̃cã ‘tairora waro’ ĩñerõcã tairora waroacu. Atie mʉjãye maquẽ niheri.#Mt 24:36; Mc 13:32; 1Ts 5:1-2. 8Mʉjãrẽ wede: marĩ Pacʉcã Espíritu Santore mʉjãpʉre niãcʉre ticoñerõcã mʉjã cʉ̃cã tutuarere ñerõãcu. Cʉ̃cã tairo tiñerõcã mʉjã cuiro manirõ wãcũtutuaremena basocare yaye maquẽrẽ wedewõnorã waroacu. Jerusalén macãrãrẽ, Judea dita macãrãrẽ, Samaria dita macãrãrẽ, nipetira atiditapʉ yoarocãrõ nirãcãrẽ wedera waroacu ―ĩyugʉ Jesús cʉ̃ buerare.
9Atiere tairo ĩ wedetuwaremena cʉ̃jãcã ĩñarĩwatoara Manigʉ̃ Jesúre ʉmʉãwesepʉ newʉmʉãyugʉ. Topʉ ʉ̃mebʉrʉa cʉ̃rẽ tubiatoañerõcã upatuti cʉ̃jã cʉ̃rẽ ĩñanemoheriyura. 10Jesúcã wariaropera cʉ̃jãcã ĩñaemʉõcorucũrĩwatoa wãcũña manirõ pʉ̃ãrã ʉmʉã suti botire sãñariara cʉ̃jã decopʉ bajuanʉcãyura. 11Abiro ĩyura:
—Mʉjã Galilea macãrã ¿dairo tira ʉmʉãwesepʉ ĩñaemʉõcorucũrĩ marĩcʉ̃? Ãni Jesús mʉjãmena niãrigʉ marĩcʉorogã ʉmʉãwesepʉ mʉãwarigʉra upatuti watigʉagawi tamʉ atiditapʉre. Mʉãwagʉre mʉjãcã ĩñariawãmerã abiro cʉ̃rẽ upatuti watigʉre ĩñarõãcu tamʉ ―ĩyura.#Dn 7:13; Mt 26:64; Mc 13:26; 14:62; Lc 21:27; Ap 1:7.
Judare wasoacʉre beserigue
12Jesús buera cʉ̃cã beseriara Olivos wãmecʉtiriburopʉ niãriara duiwa Jerusalénpʉ coepʉtʉayura tamʉ. To cʉ̃jãcã coepʉtʉaro yoaherogã yerisãrĩbʉreconorẽ ĩcã kilómetrora wadotirono niyuro.
13Jerusalénpʉ pʉtʉajeara pʉacasa cʉtiriwi cʉ̃jãcã canirĩwipʉ wayura. Emʉãrõ macã tatiapʉ sãwayura. Anocʉ̃ niyura: Pedro, Santiago, Juan, Andrés, Felipe, Tomás, Bartolomé, Mateo, Santiago Alfeo macʉ̃, ãpĩ Simón celote wãmecʉtiribumacʉ̃ Roma macãrã nirũpãrãrẽ cõãrugariarayabumacʉ̃ ĩñerõcã Judas Santiago macʉ̃ niyura. 14Cʉ̃jã nipetira toquẽrĩrã ĩcãrã nomiãmena neãpoicãyura Manigʉ̃rẽ ñubueradara. Cʉ̃jã watoare María Jesús paco ĩñerõcã Jesús baira niyura. 15Cʉ̃jã nipetira Jesúre wedewõrã tiwipʉre tairo neãpoicãrã ciento veintejoro niyura. Ĩcãbʉreco nipetira neãporopʉ Pedro cʉ̃jã watoapʉ wʉmʉnʉcã cʉ̃jãrẽ abiro ĩyugʉ:
16—Yara, sʉgueropʉ Espíritu Santocã masĩrẽ nʉnirẽmena marĩ ñecʉ̃ Davidcã Judare wate maquẽrẽ Manigʉ̃cã wederucũripũpʉ ojasʉgueriarora abiro queorora wawʉ. Tairo tigʉ Jesúre ñewʉmʉãnarẽ cʉ̃rẽ eñowĩ. 17Cʉ̃cã tairo tiatosʉguero ʉ̃sã cʉ̃mena docejoro nimiwʉ̃. Jesús ʉ̃sãrẽ beseriarora abiro cʉ̃cãrẽ besemiwĩ ʉ̃sãmena cʉ̃ye maquẽrẽ wededotigʉ. 18Judas cʉ̃cã ñañarõ tinigʉ̃ wapatariguemena ĩcãdita wapatiyoyuro. Tiemena wapatiatosʉguero topʉ cʉ̃basurupe dʉpowʉmena ñacũmuã, cʉ̃ya paga yegawa, cʉtamisĩ witibatea, cõwõãsurigʉ niwĩ.#1:18 Judacã cõwõãriasiro paia nirũpãrã tiditare wapatiyura cʉ̃jãcã Judare wapatimiriguemena (Mt 27:3-10). 19Judacã tairo warere nipetira Jerusalén macãrã masĩpetiasuyura. Tairo tira cʉ̃jã tiditare ‘Acéldama’ pisuyura. Cʉ̃jãyemena ‘Di Cõãriadita’ ĩrugaro tiga.
20”Marĩcʉorore sʉgueropʉ Salmopũpʉ Judaye maquẽrẽ ‘tairo waroacu’ ĩ ojayoriarora abiro queoro waro ya:
«Cʉ̃yawi basoca manirĩwi pʉtʉaro.
Tore icãta upatuti ĩcʉ̃no niherimocãro»#Sal 69:25.
ĩñerõcã:
«Ãpĩ cʉ̃cã padederiguere wasoaro»#Sal 109:8.
ĩ ojayoriaro niwʉ̃.
21-22”Tairo tira ĩcʉ̃ Judare wasoacʉre ʉ̃sãcã Jesúmena camesãrĩwatoare ʉ̃samena bapucamesãrĩgʉre, Juancã marĩ Nirũpʉ̃ Jesúre wãmeõtiriaromena#Mt 3:1-12; Mc 1:9; Lc 3:21. pʉ marĩ Pacʉ cʉ̃rẽ ʉmʉãwesepʉ newʉmʉãrĩwatoapʉ ĩñarigʉre besero bo. Tairo tigʉ ʉ̃sãmena wedewõnogʉ̃ wagʉagawi Jesúcã cõwõãrigʉpʉra masãmʉãriguere#1Co 15:12-23; Ro 1:4; 4:25. ―ĩ wedeyugʉ Pedro.
23Cʉ̃cã tairo ĩñerõcã tʉora titatiapʉ nirã pʉ̃ãrãrẽ beseyura. Ĩcʉ̃ José Barsabás wãmecʉtigʉre ãpẽrã cʉ̃rẽna griegoyemena Justo wãme pisuyura. Ãpĩpe Matías wãmecʉtigʉ niyugʉ. 24-25Besetuwa titatiapʉ nirãrã Manigʉ̃rẽ sãĩyura:
—Ʉ̃sã Nirũpʉ̃, mʉ ña nipetira basoca yeripũnarĩrẽ masĩgʉ̃. Mʉ merẽ ãnijã pʉ̃ãrãrẽ ĩcʉ̃ besesiatiyu Judare wasoacʉre. Ʉ̃sãrẽ cʉ̃rẽ eñoña. Judas mʉye maquẽrẽ wededotiriguere pitimocãwĩ cʉ̃cã marĩcʉoro nirõpʉ wagʉ ―ĩ sãĩyura.
26Manigʉ̃rẽ sãĩtuwara pʉape ʉ̃tãperigãpʉ cʉ̃jãya wãmerĩrẽ ojatuyura. Pigãpʉ sã, ĩcãpere ne, ĩñayura Manigʉ̃cã besearigʉ ni ñarĩ ĩrã. Matiayawãme ojatuariape niyuro. Tibʉrecomena cʉ̃ Jesús buera oncemena Jesucristoye maquẽrẽ wedeacʉ pʉtʉayugʉ.
Currently Selected:
Hechos 1: yui
Highlight
Share
ਕਾਪੀ।
Want to have your highlights saved across all your devices? Sign up or sign in
© 2026, SIL Global. All rights reserved.
