Matayo 28
28
Yesu etaka kuli he kigame
Mariko 16:1-10; Luka 24:1-12; Yohana 20:1-10
1Muaze wa kufufu ureatakho, muaze wa bosi wa ijuma hachalhenu ama ama, Maria kuli Magidala nahu Maria mhali vekaso kurawesia mbira. 2Wato oto hekakhwa na ikushiko igiru la idi, kwaite mzasughawa wa Kiumbi eedimie kuli ana he are ana he Kiumbi ekaso ekalidongolosha hu isaheru ekazokhodi to ana he isaheru. 3Vubasa vwahu mzasughawa waare ana he Kiumbi vweeakue sa luatame lwa lubambara na gomae kuu jeeakue swe. 4Hu vakilaaru va mbira vekambughenuisha naho vekazingiza vekalhu atadi sa vegae. 5Hu mzasughawa wa Kiumbi ekavaba hu valage, “Musibughenu, kwaite nireile ite mumdaa Yesu eemaiwe misumari he msaraba. 6Teaha ii, kwaite aaka kuli he kigame, sakigi eeyoe. Litani iji muhawesie hodi ho veembodije. 7Naho muso nakawe murevabaya vahina kuu ite, ‘Aaka kuli he kigame, naho etamukaeiya kuso Galilaya, are niho munemuakho. Hulhani yayo nimubaiye.’ ” 8Kwato hu valage vekahaka to he mbira ilai vebughenu mira velhamuishishwe, vekaso nakawe kuravabaya vahina vakwe Yesu ka mburi. 9Wato oto Yesu ekasahe navo, ekavaba, “Nimuholu!” Hu valage vekamheiya sina vekamdara masame kuu, vekumuaresi. 10Niho Yesu ekavaba, “Musibughenu. Soni murevabaya vabakhu gho vaso Galilaya, niho veneniakho.”
Vakilaaru vetayo mburi jo veakhoe
11To hu valage veeaha kwalhi vekuso, vakilaaru vakuwe veekulaa mbira vekaso he muang'a kuravabaiya velo ugiru va kuaresija kira kigi chilijanye. 12Iji, vareasahe velo ugiru va muaresi na vagiru va Vayahudi vekaiseko kuvalhanu hu vakilaaru mihaku mikumure, 13vekavaba, “Mudumuwe muyo ite, vahina kuu veelitie naama kumgwa nne tweeie.” 14Kai mgiru eneile ya mburi, nne tuneyo nau kalo musiebuu he kharo. 15Kwato hu vakilaaru vekadoria hu mihaku navo vekaboi sahucho vebaiwe. Ya mburi ikailika he Vayahudi sari wai.
Yesu etavalianyija vahina kuu
Mariko 16:14-18; Luka 24:36-49; Yohana 20:19-23; Miboire 1:6-8
16Iji hu vahina ikado na muwe vekaso sari Galilaya hehu lubwa lwo Yesu eevaajie. 17Vareamuakho, vekam'aresi mira vakuwe veelo bughu. 18Yesu ekavaliaha nakuvaba, “Naaowe lumuruisho lukhabuna waare ana he Kiumbi nahe idi. 19Kwato iji, soni he idi izime murevaboi vahe vakhabuna vakhwa vahina gho, mukuvabatija kwa ilhe la Aba nala Muinyi nala Saa wa Kiumbi, 20nakune vahinyeni kudara mburi khabuna jo nimubaie kune. Kweri ani niaha hawe na kune maaze khabuna, sari mkhto wa idi.” Nachikhwa to.
Currently Selected:
Matayo 28: NTMBL2025
Highlight
Share
ਕਾਪੀ।
Want to have your highlights saved across all your devices? Sign up or sign in
The New Testament in Mbugu @The Word for The World International and Mbugu Language translation, 2025. All rights reserved.